25-May-2022

ବଲାଙ୍ଗୀର,(ପ୍ରେରଣା ଖବର) ବଲାଙ୍ଗୀର ଜିଲ୍ଲାରେ ଥିବା ବିଭିନ୍ନ ଚିକିତ୍ସାଳୟ ମଧ୍ୟରୁ ସ୍ଥାନୀୟ କଲେଜ ଛକ ଠାରେ ଥିବା ହୋମିଓପାଥି ଚିକିତ୍ସାଳୟ ଚିକିତ୍ସା ସୁବିଧା କ୍ଷେତ୍ରରେ ପ୍ରମୁଖ ଭୂମିକା ଗ୍ରହଣ କରିଛି । ହିସାବରୁ ଜଣାପଡିଛି ଯେ, ଏଠାରେ ବର୍ଷକୁ ହାରାହାରି ୧ଠହଜାର ରୋଗୀ ଚିକିତ୍ସା ପାଇଁ ଦୂରଦୂରାନ୍ତରୁ ଆସିଥାନ୍ତି । କଲେଜ ଛକ ସ୍ଥିତ ଉଭୟ ପାଶ୍ୱର୍ରେ ଥିବା ରାସ୍ତା ମଧ୍ୟରେ ୫୨ ବର୍ଷର ପୁରୁଣା ଏକ ହୋମିଓପାଥି ଚିକିତ୍ସାଳୟ ଅଛି ଯାହାର ଅବସ୍ଥା ଆଜି ଜରାଜୀର୍ଣ୍ଣ ହୋଇ ପଡିଛି । ସେଠାରେ କେବଳ ଜଣେ ମାତ୍ର ଡାକ୍ତର ଅଛନ୍ତି । ଏପରିକି ବିଦ୍ୟୁତ ସଂଯୋଗ ଟିଏ ମଧ୍ୟ ନାହିଁ କିମ୍ବା କୌଣସି ଚତୁର୍ଥ ଶ୍ରେଣୀ କର୍ମଚାରୀ ମଧ୍ୟ ନାହାନ୍ତି । ବଲାଙ୍ଗୀର ଜିଲ୍ଲାରେ ଥିବା ୧୮ଟି ଓ ସୋନପୁର ଜିଲ୍ଲାରେ ଥିବା ୫ଟି ଚିକିତ୍ସାଳୟକୁ ନେଇ ଏକ ସର୍କଲ ଅଫିସ ଅଛି ଯାହା କି ନିଛାଟିଆ ଜଳାରାମ ଧର୍ମଶାଳା ଗଳି ମଧ୍ୟରେ ଅବସ୍ଥିତ ।  ଆଜି ପର୍ଯ୍ୟନ୍ତ ସେହି କୋଠା ଟି ଭଡାରେ

ଚାଲୁଛି ଯାହାର ସମ୍ମୁଖରେ ସାଇନ୍ ବୋର୍ଡ ଟିଏ ମଧ୍ୟ ନାହିଁ । ମୋଟ ୨୩ ଜଣ ଡାକ୍ତରଙ୍କ ପଦବୀ ମଧ୍ୟରୁ ୧ଠଜଣଙ୍କ ପଦବୀ ଖାଲି ରହିଛି । ବଲାଙ୍ଗିର ନାଗରିକ କମିଟିର ସଭାପତି ବେଲାରସିଂ ଭୋଇ, ସାଧାରଣ ସଂପାଦକ ମନୋରଂଜନ ସାହୁ, ସହସାଧାରଣ ସଂପାଦକ ଡା.ଚକ୍ରପାଣି ଦାଶ, ଧର୍ମବ୍ରତ ରଥ ପ୍ରମୁଖଙ୍କ ନେଇ ଏକ ପ୍ରତିନିଧି ଦଳ ଚିକିତ୍ସାଳୟର ଡାକ୍ତର ଅଶୋକ କୁମାର ସେଠୀଙ୍କୁ ସାକ୍ଷାତ କରି ବିଭିନ୍ନ ସମସ୍ୟା ସମ୍ବନ୍ଧରେ ଆଲୋଚନା କରିଥିଲେ ।  ଡାକ୍ତରଙ୍କ ପ୍ରଚେଷ୍ଟାରେ ବର୍ତ୍ତମାନ ଥିବା ଚିକିତ୍ସାଳୟର ଜମି,  ୩ଠଠଠ ବର୍ଗ ଫୁଟ୍ ବିଶିଷ୍ଟ ଏକ ପାର୍ଚ୍ଚା ମଧ୍ୟ ପ୍ରସ୍ତୁତ ହୋଇଛି । ଯେଉଁଥିରେ କି ରୋଗୀ ମାନଙ୍କ ପାଇଁ ଅତ୍ୟାଧୁନିକ ବିଶ୍ରାମାଗାର, ପରିଶ୍ରାଗାର ସହ ସର୍କଲ ଅଫିସ ମଧ୍ୟ ତିଆରି ହୋଇପାରିବ । ଏହି ସମ୍ବନ୍ଧରେ କମିଟି ତରଫରୁ ରାଜ୍ୟ ନିର୍ଦ୍ଦେଶାଳୟ(ଆୟୁଷ) ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ତଥା ବଲାଙ୍ଗୀର ଜିଲ୍ଲାର ସମସ୍ତ ବିଧାୟକଙ୍କୁ ପତ୍ର ମାଧ୍ୟମରେ ଅବଗତ କରାଯାଇ କାର୍ଯ୍ୟାନୁଷ୍ଠାନ ପାଇଁ ନିବେଦନ କରାଯାଇଛି ।
  ସୂଚନାଯୋଗ୍ୟ ଯେ, ବଲାଙ୍ଗିର ଜିଲ୍ଲାର ୧୮ଟି ଚିକିତ୍ସାଳୟ ଯଥା- କଲେଜ ଛକ, ଝାଙ୍କରପାଲି, ଆଠଗାଁ, ଶିବତୁଲା, ମନହୀରା, ଖୁଜେନପାଲି, ପଟୁଆପାଲି, ଘାଗୁର୍ଲି, କୁସକେଲା, ଭୁସଲାଡ, ବିରିପାଲି, ତୁଷୁରା, ଜୁରାବନ୍ଧ, ଧରବଗଡ଼, ମାଲେସରା, କୁଇବାହାଲ, ବିଶିପାଲି ଓ ଭରତବାହାଲ ସେହିପରି ସୋନପୁର ଜିଲ୍ଲାର  ଖାରୀ, ଇଛାପୁର, ବିଶିପଡା, ଜାଲୋଇ ଓ ଗଜବନ୍ଧ ଛକ ଠାରେ ଥିବା ୫ଟି ଏପରି ମୋଟ ୨୩ ଟି ଚିକିତ୍ସାଳୟକୁ ନେଇ ଏକ ସର୍କଲ ଗଠିତ ହୋଇଛି ।