01-May-2022

ବିନିକା(ହିମାଂଶୁ ଶେଖର ପୁଟେଲ) ସୁବର୍ଣ୍ଣପୁର ଜିଲ୍ଲା ବିନିକା ମଏମ ମହାନଦୀ ବ୍ରିଜ ଉପର ରାସ୍ତାଦେଇ ବେଆଇନ ବାଲି ଚୋରା ଚାଲାଣ ହେଉଥିବା ୩ ହାଇୱା ଓ ୨ଟ୍ରାକ୍ଟରକୁ ରାଜସ୍ବ ବିଭାଗ ଜବତ କରିଛି |ସୂଚନା ଅନୁସାରେ ସୋନପୁର ପଟରୁ ହାଇୱାରେ ବାଲି ଚୋରଚାଲାଣ ହେଉଥିବା ନେଇ ରାଜସ୍ବ ବିଭାଗ ଖବର ପାଇଥିଲେ | ବିନିକା ଥାନା ସମ୍ମୁଖରେ ୨ଟି ହାଇୱା ଗାଡିକୁ ଅଟକାଇ ଯାଞ୍ଚ କରାଯାଇଥିଲା ଉକ୍ତ ଦ୍ବୟଗାଡି ନମ୍ବର ବିହୀନ ରହିଥିବାରୁ ତାହାକୁ ବର୍ତ୍ତମାନ ପର୍ଯ୍ୟନ୍ତ ଅଟକ ରଖାଯାଇଛି | ସେହିପରି ବିନିକା ବ୍ରିଜ ଉପରେ ହାଇୱା ନଂ -(ଜେଏଚ,0୩ଆର,୨୪୮୭)କୁ ଅଟକାଇ କାଗଜପତ୍ର ଯାଞ୍ଚ କରାଯାଇଥିଲା | ସେ ଆବଶ୍ୟକ କାଗଜ ଦର୍ଶାଇନପାରିବାରୁ ତାଙ୍କ ଠାରୁ ୭୫ହଜାର ଟଙ୍କା ଜରିମାନା ଆଦାୟ କରାଯାଇଛି | ସେହିପରି ସେହି ରାସ୍ତାରେ ଯାଉଥିବା ୨ଟି ବାଲିବୋଝେଇ ଟ୍ରାକ୍ଟର ନଂ (ଓଡି,୩୧, ଏଫ ୨୫୯୮) ଏବଂ (ଓଡି,୩୧ଡି, ୭୦୯୦) କୁ ମଧ୍ୟ ଜବତ କରାଯାଇ ତାଙ୍କଠାରୁ ୧୦ହଜାର ଟଙ୍କା ଲେଖାଁଏ ୨୦ହଜାର ଟଙ୍କା ଜରିମାନା ଆଦାୟ କରାଯାଇଛି | ଏହିପରି ସର୍ବମୋଟ ୯୫ହଜାର ଟଙ୍କା  ଜରିମାନା ଆଦାୟ କରାଯାଇଛି | ଏହି ଚଢ଼ାଉରେ ବିନିକା ତହସିଲଦାର ମୁକ୍ତେଶ୍ଵର ପାଣିଗ୍ରାହୀ,ଅତିରିକ୍ତ ତହସିଲଦାର ଚାନ୍ଦିନୀ ମେହେର,ବିନିକା ରାଜସ୍ବ ନିରୀକ୍ଷକ ବସନ୍ତ କୁମାର ବରିହା,ସୁପରଭାଇଜର ନୀଳମଣି କୁଅଁର ପ୍ରମୁଖ ସାମିଲ ଥିଲେ |