22-Feb-2022

ବଲାଙ୍ଗୀର,(ପ୍ରେରଣା ଖବର)-ଆଜି ବଲାଙ୍ଗୀର ଜିଲ୍କାରେ ତୃତୀୟ ପର୍ଯ୍ୟାୟରେ ବଲାଙ୍ଗୀର,ଦେଓଗାଁ ଓ ଗୁଡଭେଲା ବ୍ଲକରେ ମତଦାନ ହୋଇଛି । ମୋଟ ଉପରେ ନିର୍ବାଚନ ଶାନ୍ତିପୂର୍ଣ୍ଣ ରହିଛି । ଏହି ତିନିଟି ବ୍ଲକରେ ମୋଟ ୧ଲକ୍ଷ୯୫ହଜାର ୨୩୯ ଭୋଟର ରହିଥିବା ବେଳେ ୭୯୦ଟି ବୁଥରେ ୧,୫୮,୮୯୪ଜଣ ଭୋଟର ମତଦାନ କରିଛନ୍ତି । ମୋଟାମୋଟି ୮୨.୨୦% ମତଦାନ ହୋଇଛି । ବଲାଙ୍ଗୀର ଜିଲ୍ଲାରେ ଚାଲିଥିବା ୪ଟି ପର୍ଯ୍ୟାୟର ଏହା ହେଉଛି ସର୍ବାଧିକ ପ୍ରତିଶତ ରହିଛି । ଗୁଡଭେଲା ବ୍ଲକରେ ୮୫.୩୮% ଭୋଟିଂ ହୋଇ ରେକର୍ଡ କରିଛି । ସେହିପରି ବଲାଙ୍ଗୀର ବ୍ଲକରେ ୮୦.୧୯% ଓ ଦେଓଗାଁ ବ୍ଲକରେ ୮୧.୦୩% ମତଦାନ ହୋଇଛି ।

ବଲାଙ୍ଗୀର ନିର୍ବାଚନମଣ୍ଡଳି ଅନ୍ତର୍ଗତ ବଲାଙ୍ଗୀର ସଦରବ୍ଲକ ଓ ଦେଓଗାଁ ବ୍ଲକ ରହିଥିବା ବେଳେ ଟିଟିଲାଗଡ ନିର୍ବାଚନମଣ୍ଡଳିରେ ଗୁଡଭେଲା ବ୍ଲକ ରହିଛି । ଏହି ବ୍ଲକମାନଙ୍କରେ ହେଭିୱେଟ ନେତାଙ୍କ ଅଞ୍ଚଳ ହୋଇଥିବାରୁ ଅନେକ ବୁଥକୁ ଅତିସମ୍ବେଦନଶୀଳ ବୁଥ ଆକାରରେ ଘୋଷଣା କରାଯାଇଥିଲା । ବଲାଙ୍ଗୀର ବ୍ଲକରେ ୩୩ଟି ସମ୍ବଦନଶୀଳ ଓ ୧୦ଟି ଅତିସମ୍ବଦନଶୀଲ ବୁଥ,ଦେଓଗାଁ ବ୍ଲକରେ ୨୭ଟି ସମ୍ବେଦନଶୀଳ ଓ ୪ଟି ଅତିସମ୍ବେଦନଶୀଳ ବୁଥ ଓ ଗୁଡଭେଲାରେ ୯ଟି ସମ୍ବଦନଶୀଳ ଏବଂ ୧୨ଟି ଅତିସମ୍ବଦନଶୀଳ ବୁଥ ରହିଥିଲା । ଦେଓଗାଁ ବ୍ଲକର ସାଲେପାଲି ପଞ୍ଚାୟତର ସବୁ ବୁଥକୁ ସମ୍ବେଦନଶୀଳ ଘୋଷଣା କରାଯାଇଥିଲା । ଏଠାରେ ଦେଓଗାଁ ବ୍ଲକର ପୂର୍ବତନ ଅଧ୍ୟକ୍ଷ ଲକ୍ଷ୍ମଣକୁମାର ମେହେର ସମିତିସଭ୍ୟ ପ୍ରାର୍ଥିଭାବରେ ପ୍ରତିଦ୍ୱନ୍ଦିତା କରୁଛନ୍ତି । ତାଙ୍କୁ ବଲାଙ୍ଗୀର ବିଧାୟକ ନରସିଂହ ମିଶ୍ରଙ୍କ ପ୍ରାର୍ଥି ପ୍ରତିଦ୍ୱନ୍ଦିତା କରୁଛନ୍ତି । ସେହି କାରଣରୁ ବିଧାୟକ ଶ୍ରୀ ମିଶ୍ର ଏହି ପଞ୍ଚାୟତକୁ ବେଶି ଧ୍ୟାନ ଦେଉଛନ୍ତି । ତେଣୁ ପ୍ରଶାସନ ମଧ୍ୟ ଏଠାରେ ଶାନ୍ତିଶୃଙ୍ଖଳାର ସହିତ ନିର୍ବାଚନ କରାଇବାକୁ ସଚେତନ ରହିଥିଲେ । ନିଜେ ଜିଲ୍ଲାପାଳ ଚଞ୍ଚଳ ରାଣା ଓ ଏସପି ନୀତିନକୁସଲକର ଡାଗଡୁ ତାଙ୍କ ଟିମ

ସହିତ ପରିସ୍ଥିତିର ଅନୁଧ୍ୟାନ କରୁଥିଲେ । ଚଳିତଥର ନିର୍ବାଚନ କମିଶନ କେବଳ ମହିଳାଙ୍କ ଦ୍ୱାରା ପରିଚାଳିତ ପିଙ୍କବୁଥ କରିଥିଲେ । ସେଠାରେ ମହିଳା କର୍ମଚାରୀମାନେ ଉତ୍ସାହର ସହିତ ନିର୍ବାଚନ କରାଉଥିଲେ । ବଲାଙ୍ଗୀର ସଦରବ୍ଲକର ସଦାଇପାଲିରେ ଏଭଳି ଏକ ପିଙ୍କ ବୁଥରେ ଆମେ ପହଞ୍ଚିଥିଲୁ । ସେଠାରେ ଜଣେ ଦିବ୍ୟାଙ୍ଗ ମହିଳା ମଧ୍ୟ ଏକ ଚୌକି ସହାୟତାରେ ବୁଥରେ ପହଞ୍ଚି ଭୋଟଦାନ କରିଥିଲେ । ଲୋକଙ୍କ ଉତ୍ସାହ ଖୁବ ରହିଥିଲା ଓ ଉଚିତ ପ୍ରାର୍ଥିଙ୍କୁ ମତଦେଉଥିବା କହିଥିଲେ । ଗତ ଦୁଇଦିନ ହେଲା ବଲାଙ୍ଗୀର ଉପଜିଲ୍ଲାପାଳ ଲମ୍ବୋଦର ଧରୁଆ ଓ ଏସଡିପିଓ ତୁଫାନ ବାଗ ବିଭିନ୍ନ ଅଞ୍ଚଳ ବୁଲି ବୁଥଗୁଡିକର ସ୍ଥିତି ପରଖିଥିଲେ । ମୋଟ ଉପରେ ନିର୍ବାଚନ ଶାନ୍ତିପୂର୍ଣ୍ଣ ରହିଥିଲା ।