20-Feb-2022

ବଲାଙ୍ଗୀର  ( ମଳୟ ମିଶ୍ରଙ୍କ ରିପୋର୍ଟ )  ଆଜି ତ୍ରିସ୍ତରୀୟ ପଞ୍ଚାୟତ ନିର୍ବାଚନର ତୃତୀୟପର୍ଯ୍ୟାୟ । ବଲାଙ୍ଗୀର ଜିଲ୍ଲାରେ ଆଜି ତୁରେକେଲା , ବଙ୍ଗୋମୁଣ୍ଡା ଓ ମୁରିବାହାଲ ତିନୋଟି ବ୍ଲକ୍ ରେ ଭୋଟଗ୍ରହଣ ହେଉଛି । 

ତେବେ ଚଳିତ ପଞ୍ଚାୟତ ନିର୍ବାଚନରେ ବିଭିନ୍ନ ବର୍ଗର ପ୍ରଚୁର ଟଙ୍କା ଖର୍ଚ୍ଚ କରୁଥିବା ପ୍ରାର୍ଥୀମାନେ ସକ୍ରିୟ ହୋଇ ଉଠିଥିବା ଲକ୍ଷ୍ୟ କରାଯାଇଛି ।  ନିର୍ବାଚନକମିଶନ ବା ପ୍ରଶାସନର ଯାବତୀୟ କଟକଣା ସତ୍ତ୍ୱେ  ଅଦ୍ୟାବଧି ଯାହା ଦେଖାଯାଇଛି , ଭୋଟରଙ୍କୁ କିଣିବାକୁ ଟଙ୍କାବଣ୍ଟା ଏକ ସାଧାରଣ ପରମ୍ପରାରେ ପରିଣତ ହୋଇଛି । ତା' ସହ ମଦମାଂସର ଭୁରିଭୋଜନ ଦେଇ ଟୋକାଙ୍କୁ ବୁଥ୍ ରିଗିଂ , ଧମକଚମକ ଓ  ଗାଁ ଅବରୋଧ ଭଳି ବେଆଇନ୍ କାର୍ଯ୍ୟକଳାପରେ ନିୟୋଜିତ କରାଯାଇଆସୁଥିବା ଶୁଣାଯାଉଥିଲେ ହେଁ , ବିଧିବଦ୍ଧ ଅଭିଯୋଗ ନଥିବା ଆଳରେ ପ୍ରଶାସନ କାନ୍ଧଖସାଇ ନେଉଛି । ଶାସକ ବିଜଦରୁ ଭାଜପା ଓ କଂଗ୍ରେସଦଳ ଏବଂ କେଉଁଠି ସ୍ବାଧୀନ ସ୍ବଚ୍ଛଳ ପ୍ରାର୍ଥୀମାନେ ସରପଞ୍ଚ , ବ୍ଲକ୍ଅଧ୍ୟକ୍ଷ ଓ ଜିଲ୍ଲାପରିଷଦ ଅଧ୍ୟକ୍ଷ ପଦ ହାସଲ କରିବାପାଇଁ ଜମିବାଡି , ସମ୍ପତ୍ତି ଓ ସୁନାରୂପା ବିକି ଅଥବା ଋଣକରି ଭୋଟରଙ୍କୁ କିଣିବାକୁ ବାଜି ଲଗାଇ ଦେଇଛନ୍ତି । ଏହି ପରିମାଣ ଆଉ ଶହ ବା ହଜାରରେ ସୀମିତ ରହିନାଇଁ , ଲକ୍ଷ ଲକ୍ଷରୁ କୋଟିରୁ ଅତିକ୍ରମ କରିଗଲାଣି । ବଲାଙ୍ଗୀର ଜିଲ୍ଲାର ପ୍ରଥମପର୍ଯ୍ୟାୟର ପଞ୍ଚାୟତ ନିର୍ବାଚନରେ ଜଣେ ବ୍ଲକ୍ ଅଧ୍ୟକ୍ଷ ପଦର ଅତ୍ୟଧିକ ଆଶାୟୀ ସମିତିସଭ୍ୟ ପ୍ରାର୍ଥୀ ଜମିବାଡି ବିକି ପୂର୍ବସରପଞ୍ଚପଦବୀର କ୍ଷମତାବଳରେ ପ୍ରଚୁର ଉପାର୍ଜନରୁ ଦେଢକୋଟିରୁ ଉର୍ଦ୍ଧ୍ବଟଙ୍କା ଖର୍ଚ୍ଚକରି ଥିବା ତାଙ୍କ ବିଶ୍ବସ୍ତମହଲରୁ ପ୍ରକାଶ । ଏବଂ ସେ ଗୋଟିଏ ବ୍ଲକର ଅଧ୍ୟକ୍ଷ ହେବା ପ୍ରାୟ ନିଶ୍ଚିତ । ଏବଠୁ ଫଳାଫଳ ଘୋଷଣା ହୋଇ ନଥିଲେ ହେଁ , ଆବଶ୍ୟକ ସଂଖ୍ୟକ ସଭ୍ୟ ଅପହରଣରେ ସକ୍ରିୟ । ସେହିପରି ପ୍ରତିଦ୍ବନ୍ଦୀଙ୍କୁ ଗଧବେପାରରେ କିଣିନେଇ ଅପ୍ରତିଦ୍ଵନ୍ଦୀ ସରପଞ୍ଚ ପଦ ଜିତିସାରିଥିବା କେତେକ ତଥାକଥିତ ଲୋକପ୍ରତିନିଧି ପଞ୍ଚାୟତରେ ହେବାକୁ ଥିବା ୫ ବର୍ଷରେ ୫ କୋଟି ସରକାରୀ ଯୋଜନାର ଅର୍ଥ ଅନୁଦାନରୁ ସିଂହଭାଗ ବାଟମାରଣା କରିବାକୁ ଦାନ୍ତ ପଜେଇ ଅପେକ୍ଷା କରି ବସିଛନ୍ତି ।
ଆଜି ଓ ଆଗାମୀ ଦୁଇଟି ପର୍ଯ୍ୟାୟରେ ହେବାକୁ ଥିବା ଭୋଟଗ୍ରହଣରେ ମଧ୍ୟ ବିପୁଳ ଟଙ୍କାର ଖର୍ଚ୍ଚ କରାଯାଇ ଭୋଟ କିଣାଯିବା ପ୍ରାୟ ନିଶ୍ଚିତ ବୋଲି ଅନୁମାନ କରାଯାଉଛି । ସବୁଆଡେ ଟଙ୍କା ବଣ୍ଟା ଓ ମଦମାଂସର ଆସର । ଏହା ନିର୍ବାଚନକମିଶନଙ୍କଠାରୁ ପ୍ରଶାସନ , ପୁଲିସ୍ ସମସ୍ତଙ୍କର ସମ୍ପୂର୍ଣ୍ଣ ଜ୍ଞାତସାରରେ ଚାଲିଛି ।  କେଉଁଠି ସରକାରୀ କର୍ମଚାରୀ , ପୁଲିସ୍ , ଶାସକଦଳର ବିଧାୟକଙ୍କ ପର୍ଯ୍ୟନ୍ତ ସାମିଲ୍ ରହି ଧରାପଡିଲେଣି  ।

ଏଣୁ ଏହାକୁ ନିର୍ବାଚନ କୁହା ନଯାଇ ଅଗ୍ରୀମ ସରକାରୀ ଯୋଜନାର ଅର୍ଥଅନୁଦାନର ବାଟମାରଣା ନିମନ୍ତେ ସ୍ବୀକୃତି ବା ଏକପ୍ରକାର ଜୁଆଖେଳ କୁହିଯିବା କଥା ବୋଲି ବୁଦ୍ଧିଜିବୀମାନେ କଟାକ୍ଷ କରିଛନ୍ତି ।