16-Feb-2022

ବଲାଙ୍ଗୀର(ମଳୟମିଶ୍ରଙ୍କ ରିପୋର୍ଟ )  ଚଳିତତ୍ରିସ୍ତରୀୟ ପଞ୍ଚାୟତ ନିର୍ବାଚନର ପ୍ରଥମ ଭୋଟଗ୍ରହଣର ପୂର୍ବରୁ ପାଟଣାଗଡ ବିଧାନସଭା ନିର୍ବାଚନ ମଣ୍ଡଳୀର ବିଭିନ୍ନ ଗ୍ରାମରେ ପୁଲିସ୍ ଗାଡିରେ ପୁଲିସ୍ କର୍ମଚାରୀ ଓ ବିଧାୟକଙ୍କ ଲୋକ  ଭୋଟରଙ୍କୁ କିଣିବାକୁ ଟଙ୍କା ବାଣ୍ଟୁଥିବାର ଭିଡିଓ ଓ ଖବର ମିଡିଆରେ ଭାଇରାଲ୍ ହୋଇଛି । ଏଥିପାଇଁ ସେମାନେ ଘଟଣାସ୍ଥଳରେ ସ୍ଥାନୀୟଲୋକଙ୍କର ପ୍ରବଳ ବିରୋଧର ସମ୍ମୁଖୀନ ହୋଇଛନ୍ତି । ଏହାସତ୍ତ୍ୱେ , ଏ ସମ୍ପର୍କରେ ଥାନାରେ ଅଭିଯୋଗ , ଏତଲା ବା  ନିର୍ବାଚନ ଅଧିକାରୀ ବନାମ ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ଜଣାଯାଇନାହିଁ । ଅପରପକ୍ଷେ ସମ୍ପୃକ୍ତ ଅଭିଯୁକ୍ତପକ୍ଷ ବା ବିଧାୟକଙ୍କ  କିମ୍ବା ପ୍ରକାଶନ ପକ୍ଷରୁ ଏ ଖବର ଗଣମାଧ୍ୟମରେ ପ୍ରକାଶ ପାଇ ଚାଞ୍ଚଲ୍ଯ ସୃଷ୍ଟି କରିଥିଲେ ହେଁ , ଏଯାବତ୍ କୌଣସି ସ୍ପଷ୍ଟୀକରଣ ଦିଆଯାଇନାହିଁ ।

ଗଣମାଧ୍ୟମରେ ପ୍ରକାଶିତ ନିର୍ଭରଯୋଗ୍ୟ ସୂତ୍ରରୁ ପ୍ରକାଶ ଯେ  , ପ୍ରଥମ ପର୍ଯ୍ୟାୟ ଭୋଟଗ୍ରହଣର ଦିନକ ପୂର୍ବରୁ ଗତ ୧୫ ତାରିଖ ରାତିରେ ଲରମ୍ଭାଥାନା ଅନ୍ତର୍ଗତ ଫଟାମୁଣ୍ଡା ପଞ୍ଚାୟତର ପାଣ୍ଡେସରା ଗ୍ରାମରେ ପୁଲିସ୍ ପେଟ୍ରୋଲିଂଗାଡିରେ ପାଟଣାଗଡ ବିଧାୟକ ସରୋଜ ମେହେରଙ୍କ ସମ୍ପର୍କୀୟ ଭାଇ ତଥା ନୋମିନୀ ସୁଜିତ ମେହେରଙ୍କୁ ଭୋଟରଙ୍କୁ ଟଙ୍କା ବାଣ୍ଟୁଥିବାବେଳେ ଧରି ସ୍ଥାନୀୟଲୋକେ ଠେଲାପେଲା କରି ପ୍ରବଳ ବିରୋଧ ପ୍ରଦର୍ଶନ କରିଥିଲେ । 

ଏହାର ଦୁଇଦିନ ପୂର୍ବରୁ ମଧ୍ୟ ଭଇଁଷା ପଞ୍ଚାୟତ ଅନ୍ତର୍ଗତ ମସିଣାଛାପର ଗ୍ରାମରେ ବିଳୋଧୀଦଳର କର୍ମୀମାନେ ବିଧାୟକଙ୍କ ପିଏସଓ ଗିରୀଶ ବେହେରାଙ୍କୁ ଗାଡିରେ ଭୋଟରଙ୍କୁ ଟଙ୍କା ବାଣ୍ଟୁଥିବା ଅଭିଯୋଗ କରି ଅଟକ ରଖି ପୁଲିସକୁ ଖବର ଦେଇଥିଲେ । ଏହାର କିଛିଦିନପୂର୍ବରୁ ଏହି ପୁଲିସ୍ କର୍ମଚାରୀ ଜଣକ ବିରୋଧରେ ମଧ୍ୟ ଶାଢୀବାଣ୍ଟିବାର ଅଭିଯୋଗ କରାଯାଇଥିଲା । ଏଠାରେ ପ୍ରକାଶଯୋଗ୍ୟ ଯେ , ଉକ୍ତ ପିଏସଓଙ୍କ ଅବସରପ୍ରାପ୍ତ ଶିକ୍ଷକ ପିତା ଏହି ପଞ୍ଚାୟତର ଜଣେ ସରପଞ୍ଚ ପ୍ରାର୍ଥୀ ବୋଲି କୁହାଯାଉଛି ।

ତେବେ ପୂର୍ବରୁ ଗିରଫ ହୋଇ ଜେଲ୍ ଯାଇଥିବା ଏପରି ଜଣେ ଚର୍ଚ୍ଚିତ ବିବଦମାନ ବିଧାୟକଙ୍କର ବିରୋଧରେ ବାରମ୍ବାର ଏଭଳି ନିର୍ବାଚନ ଆଚରଣ ବିଧି ଉଲ୍ଲଘଂନର ଗୁରୁତର ଅଭିଯୋଗ ପ୍ରକାଶ ପାଇବାପରେ ନିର୍ବାଚନ କମିଶନଙ୍କ ତଦନ୍ତପୂର୍ବକ  କାର୍ଯ୍ୟାନୁଷ୍ଠାନରେ ବିଳମ୍ବ କାହିଁକି ବୋଲି ଲୋକେ ପ୍ରଶ୍ନ ଉଠାଇଛନ୍ତି । ବଲାଙ୍ଗୀର ଜିଲ୍ଲାର ପ୍ରଥମ ପର୍ଯ୍ୟାୟର ପ୍ରଥମଦିନର ଭୋଟଗ୍ରହଣ ପୂର୍ବରୁ ଥରେ ନୁହେଁ , ଦୁଇ ଦୁଇଥର ସିଧା ପୁଲିସ୍ ଗାଡିରେ ପୁଲିସ୍ କର୍ମଚାରୀଙ୍କ ଜରିଆରେ ଏଭଳି ନିଆଁଗିଳା ଦୁଃସାହସ କାହା ଇଙ୍ଗିତରେ ହୋଇଛି ।  ଶ୍ରୀ ମେହେର ଜଣେ ଶାସକଦଳର ବିଧାୟକ ଭାବରେ ପୂର୍ବରୁ ମଧ୍ୟ ନିରଙ୍କୁଶ କ୍ଷମତାର ଅନୁପ୍ରୟୋଗ କରି ଦଣ୍ଡିତ ହୋଇଥିବା ସତ୍ତ୍ୱେ , ଶାସକ ବିଜେଡିଦଳର ତାଙ୍କ ମାଧ୍ୟମରେ ସିଧାସଳଖଭାବରେ ମୁକ୍ତ ଓ ଅବାଧ ଘୋଷଣା କରାଯାଇଥିବା ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନର ଆଚରଣବିଧିର ଏଭଳି ଉଲଙ୍ଘନ ତଥା ଆପରାଧିକ କାର୍ଯ୍ୟକଳାପର ନିର୍ବାଚନକମିଶନ ଓ ସରକାର କିଭଳି କାର୍ଯ୍ୟାନୁଷ୍ଠାନ ଗ୍ରହଣ କରିବେ , ଦେଖିବାକୁ ବାକି ରହିଲା ବୋଲି ଲୋକେ ଆଲୋଚନା କରୁଛନ୍ତି । ଆହୁରିମଧ୍ୟ , କାର୍ଯ୍ୟାନୁଷ୍ଠାନରେ ବିଳମ୍ବ କରାଗଲେ , ଆଗାମୀକାଲିଠାରୁ ବାକିଥିବା ଆଉ ଚାରିପର୍ଯ୍ୟାୟର ଭୋଟଗ୍ରହଣରେ ସରକାରୀଦଳ ପ୍ରତିନିଧିଙ୍କର ଏହି ବେଆଇନକାମ ପ୍ରଭାବ ପକାଇବ କି ବୋଲି ଆଶଙ୍କା କରାଯାଉଛି ।