03-Jan-2022

ଗଞ୍ଜାମ (ଭଗବାନ ପାଢୀ) / ନିରାଶ୍ରୟ ମାନଙ୍କୁ ଘର ଯୋଗାଇ ଥଇଥାନ କରିବା ଲାଗି ସରକାରଙ୍କ ମାଳ ମାଳ ଯୋଜନା l ଏବଂ ଏହି ଯୋଜନାର ପ୍ରଚାର ପ୍ରସାର ଲାଗି ସରକାର ପ୍ରତ୍ୟେକ ଗଳି କନ୍ଦିରେ ବଡ ବଡ଼ ପୋଷ୍ଟର ଲଗାଇଛନ୍ତି l କିନ୍ତୁ ଆଜି ବି ଅନେକ ପରିବାର ରହିଛନ୍ତି ସେମାନେ ଏହି ସରକାରି ଯୋଜନା ଠାରୁ ବହୁ ଦୁରରେ l ସେମିତ ଏକ ପରିବାର ଯାହାର ନା ମୁଣ୍ଡ ଉପରେ ଛାତ ଅଛି ନା ଦିନକୁ ଦୁଇମୁଠା ଖାଇବାକୁ ମିଳୁଛି l କେବଳ ଦୁଇଖଣ୍ଡ ଜରି ପାଲ ତଳେ ଦୁଃଖ କଷ୍ଟେ ଚଳୁଛନ୍ତି ଗଞ୍ଜାମ ଜିଲ୍ଲା କୋଦଳା ଏନଏସି ଅନ୍ତର୍ଗତ ଏସ. ରାମଚନ୍ଦ୍ରପୁର ର ରମା ଡାକୁଆଙ୍କ ପରିବାର l

 ଦୁଇ ଖଣ୍ଡ ଜରି ପାଲ ବନ୍ଧା ଝାଟି ମାଟି ଘର l ଦିନ ରେ ସୂର୍ଯ୍ୟ ରାତିରେ ଜହ୍ନ ଦେଖାଯାଉଛି ଘରେ l ବର୍ଷାଦିନ କଥା ତ ନକହିବା ଭଲ ଦାଣ୍ଡରେ ପାଣି ନ ପଡ଼ୁଣୁ ଘରେ ପଡୁଛି ପାଣି l ଏହି ଦୃଶ୍ୟ କୌଣସି ପାହାଡି ଆଦିବାସୀ ଅଞ୍ଚଳର ନୁହଁ l ବରଂ ଏହି ଦୃଶ୍ୟ ଗଞ୍ଜାମ ଜିଲ୍ଲା କୋଦଳା ବିଜ୍ଞାପିତ ଅଞ୍ଚଳ ପରିଷଦ ର ଏସ.ରାମଚନ୍ଦ୍ରପୁର ର l ଏଠି ରୁହନ୍ତି ରମା ଡାକୁଆ ପରିବାର l ପରିବାର କହିଲେ ରମା ସହିତ ତାଙ୍କ ବିଧବା ଝିଅ ମାମି ବେହେରା ଓ ନାତି ମୁକେଶ ଡାକୁଆ l ରମା ଙ୍କ ସ୍ୱାମୀ ଦିନ ମଜୁରୀ କରି ତାଙ୍କ ପରିବାର ପ୍ରତିପୋଷଣ କରୁଥିଲେ l ସେ ଦଶବର୍ଷ ପୂର୍ବେ ମୃତୁ ବରଣ ପରେ ରମା ବେସାହାରା ହୋଇଯାଇ ଥିଲେ l ତାଙ୍କ ପାଖରେ ଦିନ କୁ ଦୁଇମୁଠା ଆହାର କି ମୁଣ୍ଡ ଗୁଞ୍ଜିବାକୁ ଜାଗା ନଥିଲା l ସେ ବାଧ୍ୟ ହୋଇ ସହର ଠାରୁ ଦୁରରେ ସରକାରୀ ଜାଗାଉପରେ ଝାଟିମାଟି କୁଡ଼ିଆ କରି ପରଘରେ ବାସନ ମାଜି କଷ୍ଟେ ମଷ୍ଟେ ପରିବାର ଚଳାଇ ଆସୁଛନ୍ତି l ରମା ଏଠାରେ ରହିବାର ଆଜକୁ ଦଶ ବର୍ଷରୁ ଉର୍ଦ୍ଧ ସମୟ ଅତିବାହିତ ହୋଇଗଲାଣି l ଏନ ଏ ସି ମଧ୍ୟ ତାଙ୍କଠାରୁ ଘର ପାନୁ ସଂଗ୍ରହ କରୁଛି l ତଥାପି ସରକାର ଙ୍କ କୌଣସି ଯୋଜନା ର ସୁଫଳ ପାଇପାରୁନାହାନ୍ତି ରମା l 

ସରକାର ନିରାଶ୍ରୟ ମାନଙ୍କ ଥଇଥାନ ଲାଗି ମାଳ ମାଳ ଯୋଜନା କରିଥିବା ବେଳେ ଏହାର ପ୍ରଚାର ପ୍ରସାର ପାଇଁ ପ୍ରତ୍ୟେକ ଗଳି କନ୍ଦିରେ ବଡ ବଡ଼ ପୋଷ୍ଟର ଲଗାଇଛନ୍ତି l କିନ୍ତୁ ଏହା ପ୍ରକୃତ ହିତାଧିକାରୀ ଙ୍କ କେତେ କାର୍ଯ୍ୟରେ ଲାଗୁଛି ତାହା ରମା ଡାକୁଆଙ୍କୁ ଦେଖିଲେ ସ୍ପଷ୍ଟ ବାରିହେଉଛି l ଅନ୍ୟପଟେ ବାରମ୍ବାର ରାଜନେତା ଓ ପ୍ରଶାସନିକ ଅଧିକାରୀଙ୍କ ନିକଟକୁ ଦୌଡ଼ିଲା ପରେ ରମା ଙ୍କୁ ସରକାରଙ୍କ ପକ୍ଷରୁ ମାସକୁ 5 କେଜି ଚାଉଳ ଓ ମାସିକ ଭତା ପ୍ରଦାନ କରାଯାଉଛି l  ରମା ଙ୍କ ଆଖିକୁ ଆଉ ଭଲ ଦେଖାଯାଉନଥିବା କାରଣରୁ ସେ ଆଉ ପରଘରେ ମୁଲଲାଗିବ ସମ୍ଭବ ହେଉନି l କେବଳ ସରକାର ଙ୍କ ସାହାଯ୍ୟରେ ରମା ଙ୍କ ପରିବାର ଦୁଃଖ କଷ୍ଟେ ଚଳୁଥିବା ବେଳେ ନାତି ବର୍ତମାନ ଦଶମ ଶ୍ରେଣୀରେ ପଢୁଛି l ପରିବାର ର ଆର୍ଥିକ ଅବସ୍ଥା ଦୃବଳ ଓ ଘରେ ବସି ପାଠ ପଢିବାକୁ କୌଣସି ସୁବିଧା ନଥିବାରୁ ପାଠ ପଢ଼ା ବ୍ୟାଘାତ ହେଉଥିବା ନାତି କହୁଥିବା ବେଳେ ମୁଣ୍ଡ ଗୁଞ୍ଜିବାକୁ ସରକାର ଗୋଟିଏ ଘର ଯୋଗାଇବାକୁ ଆକୁଳ ନିବେଦନ କରିଛନ୍ତି ଝିଅ ମାମି ବେହେରା l