26-Dec-2021

ସରକାରଙ୍କ ମାଳ ମାଳ ଯୋଜନା ପରେ ବି ଆମ ରାଜ୍ୟର ଅନେକ ଅଞ୍ଚଳରେ ଏବେ ବି ଲୋକେ ସରକାରୀ ଯୋଜନା ଠାରୁ   ଯୋଜନ ଯୋଜନ ଦୂରରେ ରହିଛନ୍ତି l ଓଡ଼ିଶାର ଅନ୍ୟତମ ବିକଶିତ ଜିଲ୍ଲା କୁହାଯାଉଥିବା ଗଞ୍ଜାମ ଜିଲ୍ଲାର ଏହି ଅଭାବନୀୟ ଚିତ୍ର ସରକାରଙ୍କ କାର୍ଯ୍ୟଦକ୍ଷତା ଉପରେ ଏକ ପ୍ରଶ୍ନବାଚୀ ସ୍ରୁଷ୍ଟି କରିଛି l ଏପରି ଏକ ସମ୍ବେଦନଶୀଳ ପ୍ରସଙ୍ଗ ଉପରେ 'ପ୍ରେରଣା' ର ଏକ ବିଶେଷ ଉପସ୍ଥାପନା 

ରିପୋର୍ଟ : ପବିତ୍ର କୁମାର ମହାପାତ୍ର 

ଗଞ୍ଜାମ ଜିଲ୍ଲାରେ ଥିବା ଉପାନ୍ତ ଇଲାକାର ଗ୍ରାମର ଗ୍ରାମବାସୀ ସରକାରଙ୍କ ସମସ୍ତ ଯୋଜନାରୁ ବଞ୍ଚିତ ହେଉଛନ୍ତି । ଏହି ଉପାନ୍ତ ଗ୍ରାମମାନଙ୍କର ଗ୍ରାମବାସୀ ନିଯେ ସମସ୍ତ ମୌଳିକ ସୁବିଧାରୁ ବଞ୍ଚିତ ହେଉଛନ୍ତି ଯାହାକି ସେମାନଙ୍କ ସାଧାରଣ ଜୀବନଯାପନ ପାଇଁ ବାଧା ଉପୁଜୁଛି।

ଗଞ୍ଜାମ ଜିଲ୍ଲାର ଉପାନ୍ତ ଇଲାକାରେ ଥିବା ଗ୍ରାମର ଗ୍ରାମବାସୀ, ସରକାରଙ୍କ ସମସ୍ତ ଯୋଜନାରୁ ବଞ୍ଚିତ ହେଉଛନ୍ତି।ଆମେ କହୁଛୁ ଭଞ୍ଜନଗର ନିର୍ବାଚନ ମଣ୍ଡଳୀର ଦଦରଲୁଣ୍ଡା ପଞ୍ଚାୟତର ମେଟ୍ରିକିଆ ଗ୍ରାମର କଥା।ଏହି ଗ୍ରାମରେ ରହୁଛନ୍ତି ୨୦ ଘର ଆଦିବାସୀ ପରିବାର।ଏହି ଗ୍ରାମର ଲୋକମାନେ ମୁଖ୍ୟତଃ ନିର୍ଭର କରନ୍ତି ଚାଷ ଉପରେ।ଧାନ, ସୋରିଷ, କୋଳଥ, ବିରି,ମୁଗ ଇତ୍ୟାଦି ଚାଷକରି ପରିବାର ପ୍ରତିପୋଷଣ କରନ୍ତି।କିନ୍ତୁ ମେଟ୍ରିକିଆ ଗ୍ରାମକୁ ନା ଅଛି ଗମନାଗମନ ସୁବିଧା ନା ଏହି ଗ୍ରାମରେ ଅଛି ପ୍ରାଥମିକ ଶିକ୍ଷା ବ୍ୟବସ୍ଥା।ସାଧାରଣ ଦେହ ଖରାପ ହେଲେ ପାହାଡ଼ର ପଥୁରିଆ ରାସ୍ତା ପ୍ରାୟ ୭ କିଲୋମିଟର ପାର ହୋଇ ୩୦ କିମି ଦୂରରେ ଥିବା ଭଞ୍ଜନଗର ମେଡିକାଲ କୁ ଯିବାକୁ ପଡେ।ସରକାରଙ୍କ ତରଫରୁ ସାଧାରଣ ପିଇବା ପାଣିର କୌଣସି ବ୍ୟବସ୍ଥା କରାଯାଇନଥିବା ଯୋଗୁଁ ସେହି ପୁରୁଣା ଝରପାଣିହିଁ ଏକମାତ୍ର ଭରସା।ଏହି ଆଦିବାସୀ ଗ୍ରାମରେ ବିଜୁଳି ଆଲୋକର ମଧ୍ୟ କୌଣସି ସୁବିଧା ଆଜିପର୍ଯ୍ୟନ୍ତ ହୋଇପାରିନାହିଁ।ଏହିପରି ସମସ୍ତ ସରକାରୀ

ଯୋଜନାରୁ ବଞ୍ଚିତ ହୋଇଛନ୍ତି ଏହି ଆଦିବାସୀ ଗ୍ରାମ।ଏଥିପାଇଁ ଆଜିର ଯୁବପିଢି ନିଜ ଗ୍ରାମ ଛାଡି ସହରମୁଁହା ହେଉଛନ୍ତି।ଏସବୁ ନିଜ ଆଖିରେ ଦେଖିଲା ପରେ " ହେଲ୍ପ ଇଣ୍ଡିଆ " ଭୁବନେଶ୍ୱର ର ଏକ ସମାଜସେବୀ ଦଳ ଏହି ମେଟ୍ରିକିଆ ଗ୍ରାମରେ ପଂହଁଚି ସୋଲାର ଲାଇଟ ମାଧ୍ୟମରେ ଗ୍ରାମକୁ ଆଲୋକ ପ୍ରଦାନ କରିଛନ୍ତି ଏବଂ ଗ୍ରାମବାସୀଙ୍କୁ ଶୀତବସ୍ତ୍ର ପ୍ରଦାନ କରିଛନ୍ତି l