16-Dec-2021

ବଲାଙ୍ଗୀର, ଏଟିଏମ୍ ଖୋଲା ରହିବ, ନେଟ୍ ବ୍ୟାଙ୍କିଙ୍ଗ୍ ଚାଲିବ, ଘରୋଇ ବ୍ୟାଙ୍କ ଶାଖା ଖୋଲା ରହିପାରେ
 ବ୍ୟାଙ୍କ ଘରୋଇକରଣ ଲାଗି କେନ୍ଦ୍ର ସରକାର ନେଇଥିବା ନିଷ୍ପତ୍ତିକୁ ବି‌ରୋଧ କରି ଆସନ୍ତାକାଲି ଠାରୁ ୟୁନାଇଟେଡ୍‌ ଫୋରମ୍ ଅଫ୍ ବ୍ୟାଙ୍କ ୟୁନିଅନ୍ (ୟୁଏଫ୍‌ବିୟୁ) ପକ୍ଷରୁ ଦୁଇ ଦିନିଆ ଧର୍ମଘଟ କରାଯିବ। ଏହାର ପ୍ରଭାବରେ ରାଜ୍ୟରେ ୪ ହଜାରରୁ ଅଧିକ ବ୍ୟାଙ୍କ ଶାଖା ବନ୍ଦ ରହିବ। ଏହି ଧର୍ମଘଟରେ ରାଷ୍ଟ୍ରାୟତ୍ତ ବ୍ୟାଙ୍କରେ କାର୍ଯ୍ୟ କରୁଥିବା ରାଜ୍ୟର ୨୧ ହଜାରରୁ ଅଧିକ କର୍ମଚାରୀ ଭାଗ ନେବେ। ସର୍ବଭାରତୀୟ ସ୍ତରରେ ଏହି ଧର୍ମଘଟ ପ୍ରଭାବରେ ୧ଲକ୍ଷ ୫୮ ହଜାର ବ୍ୟାଙ୍କ ଶାଖା ବନ୍ଦ ରହିବ ଓ ଏଥିରେ ୧୦ ଲକ୍ଷରୁ ଅଧିକ କର୍ମଚାରୀ ଅଂଶଗ୍ରହଣ କରିବେ। ତେଣୁ ସରକାରୀ ବ୍ୟାଙ୍କର ଗ୍ରାହକମାନେ ଆସନ୍ତା ଦୁଇ ଦିନ ଶାଖାରେ ବ୍ୟାଙ୍କ ସେବା ପାଇବେ ନାହିଁ। କିନ୍ତୁ ଏଟିଏମ୍‌ଗୁଡ଼ିକ ଖୋଲାରହିବ। ଇଣ୍ଟରନେଟ୍ ବ୍ୟାଙ୍କିଙ୍ଗ୍ ଓ ମୋବାଇଲ୍ ବ୍ୟାଙ୍କିଙ୍ଗ୍ ସ୍ବାଭାବିକ ଭାବେ କାର୍ଯ୍ୟ କରିବ। ମୋବାଇଲ୍‌ ଆପ୍‌ ଜରିଆରେ ପେମେଣ୍ଟ୍‌ କରିବାରେ ଅସୁବିଧା ହେବ ନାହିଁ। ଏହି ଧର୍ମଘଟରେ କିଛି ନିର୍ଦିଷ୍ଟ ପୁରୁଣା ଘରୋଇ ବ୍ୟାଙ୍କର ଅଧିକାରୀ ଓ କର୍ମଚାରୀମାନେ ଯୋଗ ଦେଇଛନ୍ତି। ସେହି ବ୍ୟାଙ୍କଗୁଡ଼ିକର ଶାଖା ବନ୍ଦ ରହିବାର ଆଶଙ୍କା ରହିଛି। କିନ୍ତୁ ପ୍ରମୁଖ ଘରୋଇ ବ୍ୟାଙ୍କଗୁଡ଼ିକ ଯେହେତୁ ୟୁନିଅନ୍‌ର ଅଂଶ ନୁହନ୍ତି, ତେଣୁ‌ ସେମାନଙ୍କ ଶାଖାଗୁଡ଼ିକରେ କାରବାର ସ୍ବାଭିବକ ରହିବ ବୋଲି ଆଶା କରାଯାଉଛି । ୟୁଏଫ୍‌ବିୟୁର ଓଡ଼ିଶା ରାଜ୍ୟ ୟୁନିଟ୍ ପକ୍ଷରୁ ଆଜି ଏକ ସାମ୍ବାଦିକ ସମ୍ମିଳନୀରେ କୁହାଯାଇଛି ଯେ ରାଷ୍ଟ୍ରାୟତ୍ତ ବ୍ୟାଙ୍କ ଘରୋଇକରଣ କରିବା ଲାଗି ସରକାର ଯେଉଁ ନିଷ୍ପତ୍ତି ନେଇଛନ୍ତି ତାହା ବିରୋଧରେ ଜନ ଆନ୍ଦୋଳନ ହେବ। ଘରୋଇକରଣର ଅର୍ଥ ହେଉଛି ଜନ ସାଧାରଣଙ୍କ ସଞ୍ଚୟକୁ ବିପନ୍ନ କରିବା ଓ ଚାକିରି ଓ ଚାକିରିର ନିରାପତ୍ତା ଉପରେ ଆକ୍ରମଣ କରିବା। ୟୁନିଅନ୍ ପକ୍ଷରୁ ବ୍ୟାଙ୍କିଙ୍ଗ୍ ଆଇନ (ସଂଶୋଧନ) ବିଲ୍ ୨୦୨୧କୁ ବିରୋଧ କରାଯାଇଛି। ସାର୍ବଜନୀନ ବ୍ୟାଙ୍କଗୁଡ଼ିକର ଘରୋଇକରଣ ଅନୁଚିତ, ଜନ ବିରୋଧୀ ଓ ଆତ୍ମଘାତୀ ପଦକ୍ଷେପ। ଲକ୍ଷ ଲକ୍ଷ କୋଟି ଟଙ୍କାର ସାଧାରଣ ଜନତାଙ୍କ ଜମା ରାଶି ସହିତ ହଜାର ହଜାର ଶାଖାକୁ ପୁଞ୍ଜିପତିମାନଙ୍କ ହାତକୁ ଟେକି ଦେବା ଲାଗି ସରକାର ମସୁଧା କରିଛନ୍ତି। ଏହା ଅକ୍ଷମଣୀୟ, ଅସଙ୍ଗତ, ମନମୁଖୀ ଓ ସ୍ବେଚ୍ଛାଚାରୀ ନିଷ୍ପତ୍ତି। ଅନାଦେୟ ଋଣ ଆଦାୟ କରିବା ଲାଗି କଠୋର ନିୟମ ପ୍ରଣୟନ କରି ଦୋଷୀମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବ୍ୟାଙ୍କ ଶିଳ୍ପ ବାରମ୍ବାର ଦାବି କରୁଛି। କିନ୍ତୁ ସରକାର ସେ ଦିଗରେ ପଦକ୍ଷେପ ଗ୍ରହଣ ନକରି ବ୍ୟାଙ୍କିଙ୍ଗ୍‌ ବ୍ୟବସ୍ଥାକୁ ଦୋଷ ଦେବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ୟୁନିଅନ୍ ପକ୍ଷରୁ କୁହାଯାଇଛି।
ଏହି ଅବସରରେ ୟୁଏଫ୍‌ବିୟୁର ରାଜ୍ୟ ସଂଯୋଜକ ରଘୁନାଥ ପ୍ରସାଦ ଦାସ, ବେଫିର ସାଧାରଣ ସମ୍ପାଦକ ପ୍ରକାଶ ରାୟ, ଏଆଇବିଓଏର ସାଧାରଣ ସମ୍ପାଦକ ଅଜୟ କୁମାର ରାଉତରାୟ, ଏଆଇବିଓସିର ସାଧାରଣ ସମ୍ପାଦକ ଦୁର୍ଗା ପ୍ରସାଦ ମହାପାତ୍ର ଓ ଏସ୍‌ବିଆଇ ଅଫିସର ସଂଘର ସାଧାରଣ ସମ୍ପାଦକ ଅରୁଣ ବିଶୋୟୀ ଉପସ୍ଥିତ ଥିଲେ। ଧର୍ମଘଟ ସଫଳ କରିବାକୁ ବ୍ୟାଙ୍କ ଅଫିସର ସଂଘର ଉପଦେଷ୍ଟା ଦାମୋଦର ନନ୍ଦ ଆହ୍ବାନ ଦେଇଛନ୍ତି।

(ବଲାଙ୍ଗୀର ଜିଲ୍ଲାରୁ ଅନ୍ତର୍ୟାମି ସାହୁଙ୍କ ରିପୋର୍ଟ)