08-Nov-2020

ଭୁବନେଶ୍ବର, (ପ୍ରେରଣା ଖବର) - ମୋଦି ସରକାରଙ୍କ ଶ୍ରମିକ- କୃଷକ ବିରୋଧୀ ଏବଂ ଜନବିରୋଧୀ ନୀତି ବିରୁଦ୍ଧରେ ଆସନ୍ତା ନଭେମ୍ବର ୨୬ଓ ୨୭ ଦୁଇ ଦିନ ଦେଶବ୍ଯାପୀ ସାଧାରଣ ଧର୍ମଘଟକୁ ସଫଳ କରିବା ପାଇଁ ଭାରତର ଟ୍ରେଡ୍ ୟୁନିୟନ କେନ୍ଦ୍ର (ସିଆଇଟିୟୁ),ଓଡିଶା କୃଷକ ସଭା (ଏ ଆଇ କେ ଏସ) ଓ ସର୍ବଭାରତୀୟ କୃଷି ଶ୍ରମିକ ସଂଘ (ଏ ଆଇଏଡବ୍ଲ୍ୟୁ ୟୁ)ପକ୍ଷରୁ ଭୁବନେଶ୍ଵର ଜୟଦେବ ବିହାର ସ୍ଥିତ ଉତ୍କଳମଣି ସଭାକକ୍ଷରେ ଅନୁଷ୍ଠିତ ହୋଇଯାଇଛି । ଏହି କର୍ମଶାଳାରେ ସିଆଇଟିୟୁ ଓଡିଶା ରାଜ୍ୟ ସଭାପତି ଜନାର୍ଦ୍ଦନ ପତି, ଓଡିଶା କୃଷକ ସଭା ରାଜ୍ୟ ସଂପାଦକ ସୁରେଶ ପାଣିଗ୍ରାହୀ, ଓଡିଶା କ୍ଷେତମଜଦୂର ୟୁନିୟନ ରାଜ୍ୟ ସଭାପତି ହରିଶ୍ଚନ୍ଦ୍ର ଦାସ, ଶ୍ରମିକ ନେତା ଯୁଷ୍ମନ୍ତ ଦାସ, ଚାଷୀ ନେତା ଜଗନ୍ନାଥ ମିଶ୍ର ପ୍ରମୁଖ ଯୋଗଦେଇ ଶ୍ରମିକ, ଚାଷୀ ଓ କୃଷି ଶ୍ରମିକ ମାନଙ୍କ ବିଭିନ୍ନ ଦାବି ସଂପର୍କରେ ଆଲୋଚନା କରିଥିଲେ । ସିଆଇଟିୟୁ ଓଡିଶା ରାଜ୍ୟ ସଭାପତି ଜନାର୍ଦ୍ଦନ ପତି କର୍ମଶାଳାର ଭିତ୍ତିପତ୍ର ଉପସ୍ଥାପନ କରିଥିବା ବେଳେ ଓଡିଶାର ବିଭିନ୍ନ ଜିଲ୍ଲାରୁ ଆସିଥିବା ପ୍ରତିନିଧି ମାନେ ଏହି ଭିତ୍ତିପତ୍ର ଉପରେ ଆଲୋଚନା କରିଥିଲେ । କୃଷକ ବିରୋଧୀ ୩ଟି କୃଷି ଆଇନକୁ ପ୍ରତ୍ୟାହାର କରିବା, ଶ୍ରମିକ ବିରୋଧୀ ନୂତନ ଶ୍ରମ କୋର୍ଡ ଗୁଡ଼ିକୁ ପ୍ରତ୍ୟାହାର କରିବା, ଶ୍ରମିକ ଓ କୃଷି ଶ୍ରମିକ ମାନଙ୍କ ଦୈନିକ ସର୍ବନିମ୍ନ ମଜୁରୀ ୭୦୦ଟଙ୍କା ପ୍ରଦାନ, ରାଷ୍ଟ୍ରାୟତ୍ତ ଉଦ୍ୟୋଗ ର ଘରୋଇକରଣ ବଂଦ କରିବା,ଶିକ୍ଷା, ସ୍ୱାସ୍ଥ୍ୟ, ବ୍ୟାଙ୍କ, ବୀମା, ଡାକ ,ତାର ସେବା କ୍ଷେତ୍ରରେ ଘରୋଇକରଣ ବଂଦ କରିବା, ଅତ୍ୟାବଶ୍ୟକ ସାମଗ୍ରୀର ଦର ନିୟନ୍ତ୍ରଣ କରିବା ଦାବୀରେ ଆସନ୍ତା ନଭେମ୍ବର ୨୬ ଓ ୨୭ତାରିଖ ଦୁଇ ଦିନିଆ ସର୍ବଭାରତୀୟ ଧର୍ମଘଟକୁ ଓଡିଶାରେ ସଫଳ କରିବାକୁ ଶ୍ରମିକ ଓ କୃଷକ ସଂଗଠନ ଗୁଡ଼ିକର ରାଜ୍ୟ ନେତୃବୃନ୍ଦ ଆହ୍ୱାନ ଦେଇଥିଲେ । ଓଡିଶାର ଅଗଣିତ ସାଧାରଣ ଜନତାଙ୍କୁ ଏହି ଆନ୍ଦୋଳନରେ ସାମିଲ କରିବା ପାଇଁ ରାଜ୍ୟ ନେତୃବୃନ୍ଦ କର୍ମଶାଳା ମାଧ୍ୟମରେ ରାଜ୍ୟବାସୀଙ୍କୁ ନିବେଦନ କରିଥିଲେ ।