08-Nov-2020

ଭଦ୍ରକ, (ଦୀପକ କୁମାର ଷଡଙ୍ଗୀ)-ଭଦ୍ରକ ଜିଲା ବନ୍ତ ବ୍ଲକ ବଡ଼ବର୍ଚ୍ଚିକୟାଁ ପଂଚାୟତ ଅନ୍ତର୍ଗତ ବିଶଲକଣା ଗ୍ରାମର ଜନୈକ ବ୍ୟକ୍ତିଙ୍କ ଦୁଇ ଗୋଟି ଆଜବେଷ୍ଟସ ଘର ପୋଡ଼ି ନଷ୍ଟ ହୋଇଯିବା ଅଭିଯୋଗରେ ଆଗରପଡ଼ା ଥାନାରେ ଉକ୍ତ ଗ୍ରାମର ୧୧ ଜଣଙ୍କ ନାମରେ ମାମଲା ରୁଜୁ ହୋଇଥିବା ଜଣାପଡ଼ିଛି । ସୂଚନା ଅନୁଯାୟୀ; ବଡ଼ବର୍ଚ୍ଚିକୟାଁ ପଂଚାୟତ ଅନ୍ତର୍ଗତ ବିଶଲକଣା ଗ୍ରାମର ସୁରେଶ ଚନ୍ଦ୍ର ଖିଲାର ଶୁକ୍ରବାର ଭୋର ପ୍ରାୟ ୩/୪ଟା ସମୟରେ ତାଙ୍କ ହତା ଭିତରେ ଥିବା ଦୁଇ ଗୋଟି ଆଜବେଷ୍ଟସ ଘରେ କେହି ଅସାମାଜିକ ବ୍ୟକ୍ତି ନିଆଁ ଲଗାଇ ଦେଇଥିବାର ସେ ବାହାରକୁ ପରିସ୍ରା କରିବା ପାଇଁ ଆସିଥିବା ବେଳେ ଦେଖିବାକୁ ପାଇଥିଲେ । ଘର ଦୁଇଟି ଜଳୁଥିବା ଦେଖି ସେ ତାଙ୍କ ପରିବାର ବର୍ଗଙ୍କୁ ଡ଼ାକିବା ପରେ ଗ୍ରାମର କିଛି ଲୋକ ଆସି ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ ଓ ଦମକଳ ମଧ୍ୟ ଘଟଣା ସ୍ଥଳରେ ପହଂଚି ନିଆଁକୁ ଆୟତ୍ତ କରିଥିଲା । ଆଜବେଷ୍ଟସ ଗୃହ ଭିତରେ ଟ୍ରକରେ ଲାଗିବା ପାଇଁ ୪ ଗୋଟି ନୂଆ ଟାୟାର, କିଛି ଶାଳ କାଠ ଏବଂ ପୁରୁଣା ରୋଷେଇ ସରଂଜାମ ଥିଲା । ଯାହାର ମୂଲ୍ୟ ୧ ଲକ୍ଷ ଟଙ୍କାରୁ ଉଦ୍ଦ୍ୱର୍ ହେବ । ପୂର୍ବରୁ ଗ୍ରାମରେ ଘଟିଥିବା ଗଣ୍ଡଗୋଳକୁ ନେଇ ପୁଲିସ କେସ ହୋଇ ଅଛି । ଏହି କେସରେ ୬ ଜଣ ମୁଦାଲା ଅଛନ୍ତି । ସେମାନେ ଆକ୍ରୋସ ମୂଳକ ଭାବେ ଉକ୍ତ ଗୃହକୁ ପୋଡ଼ିଥିବାର ନେଇ ସେ ଥାନାରେ ଅଭିଯୋଗ କରିଥିଲେ । ଶ୍ରୀ ଖିଲାରଙ୍କ ଅଭିଯୋଗକୁ ଭିତ୍ତି କରି ଆଗରପଡ଼ା ଥାନା କେସ ନଂ ୧୨୯/୨୦ରେ ପୁଲିସ ଉକ୍ତ ଗ୍ରାମର ବସନ୍ତ ଜେନା, ବିଷ୍ଣୁମୋହନ ବେହେରା, ସୁରେଶ ନାୟକ, ହରିହର ଖିଲାର, ମଧୂସୂଦନ ମହାନ୍ତି, ବିଷ୍ଣୁମୋହନ ମହାନ୍ତି, ଶଙ୍କର୍ଷଣ ମହାନ୍ତି, ସଂଧ୍ୟାରାଣୀ ମହାନ୍ତି, ଚମ୍ପାବତୀ ଜେନା, ରାକେଶ ମହାନ୍ତି ଏବଂ ବସନ୍ତ ଖିଳାର ଏହିପରି ୧୧ ଜଣଙ୍କ ନାମରେ ମାମଲା ରୁଜୁୁ କରି ତଦନ୍ତ ଜାରି ରଖିଥିବାର ଜଣାପଡ଼ିଛି ।