19-Nov-2021

ବଲାଙ୍ଗିର(ପ୍ରେରଣା ଖବର): ଆଜି ସକାଳ ପ୍ରାୟ ୮ଟା ସମୟରେ ସାମ୍ବାଦିକ ସାପ୍ତାହିକ 'ଅତଏବ' ର ପ୍ରତିଷ୍ଠାତା ସଂପାଦକ ସୁଶୀଲ ପଣ୍ଡାଙ୍କ ପାର୍ଥିବ ଶରୀର ସୁଦୁର ଚେନ୍ନାଇ ରୁ ଆସି ତାଙ୍କ ରୁଗୁଡିପଡା ସ୍ଥିତ ବାସଭବନରେ ପହଂଚିଲା ପରେ ସୁଶୀଲ ପଣ୍ଡାଙ୍କ ବନ୍ଧୁ ପରିଜନ ଓ ସାମ୍ବାଦିକଙ୍କ ଭିଡ ଜମିଥିଲା । ତା ପରେ ଶ୍ରୀ ପଣ୍ଡାଙ୍କ ପାର୍ଥିବ ଶରୀରକୁ ଏକ ଶୋଭାଯାତ୍ରାରେ ସ୍ଥାନୀୟ ବିଭୂତି ପଡା ସ୍ଥିତ ସ୍ମଶାନ ଘାଟକୁ ନିଆ ଯାଇ ସେଠାରେ ଅନ୍ତେଷ୍ଟି କ୍ରିୟା ସମାପନ କରାଯାଇଥିଲା । ସୁଶୀଲଙ୍କ ବଡପୁଅ ମୁଖାଗ୍ନି ଦେଇଥିବା ବେଳେ ସହରର ବହୁ ବୁଦ୍ଧିଜୀବୀ, ସାମ୍ବାଦିକ ସାମିଲ ହୋଇଥିଲେ । 

ସୂଚନାଯୋଗ୍ୟ ଯେ ଗତ କିଛି ଦିନ ତଳେ ନିଜ ବାପା ମାଁ ଙ୍କ ଚିକିତ୍ସା କରାଇବା ପାଇଁ ସାମ୍ବାଦିକ ସୁଶୀଲ ପଣ୍ଡା ଚେନ୍ନାଇ ଯାଇଥଲଲେ । ସେଠାରେ ଔଷଧ କିଣି ରାସ୍ତା ପାର ହେଉଥିବା ସମୟରେ ଏକ ଅଜଣା ଗାଡି ତାଙ୍କୁ ଧକ୍କା ଦେଇଥିଲେ । ଦୁର୍ଘଟଣା ପରେ ଶ୍ରୀ ପଣ୍ଡା ଗୁରୁତର ଆହତ ହୋଇ କୋମାକୁ ଚାଲିଯାଇଥିଲେ । ତିନି ଦିନ ଧରି ଜୀବନ ସହିତ ସଂଗ୍ରାମ କରି ଗତ ୧୭ ତାରିଖ ଦିନ ସେ ଆର ପାରିକୁ ଚାଲିଗଲେ । ପ୍ରଶାସନ ଓ ସମାଜରେ ଘଟୁଥିବା ଦୁର୍ନୀତି ଓ ଆରାଜକତା ବିରୁଦ୍ଧରେ ଲେଖନୀ ଚାଲଣା କରୁଥିବା ସୁଶୀଲ ପଣ୍ଡାଙ୍କ ଏପରି ଅସମୟରେ ପରଲୋକ ସମସ୍ତଙ୍କ ମର୍ମାହତ କରିଛି । 
   ଶ୍ରୀ ପଣ୍ଡାଙ୍କ ଅକାଳ ବିୟୋଗରେ ଜିଲ୍ଲା ସାମ୍ବାଦିକ ସଂଘର ସଭାପତି ହରି ନାରାୟଣ ପୂଜାରୀ, ପ୍ରେସ କ୍ଲବ ସଭାପତି ଅରୁଣ ମିଶ୍ର, ସଂପାଦକ ବଳରାମ ମିଶ୍ର, ସାମ୍ବାଦିକ ମନୋରଂଜନ ଯୋଶୀ, ସତ୍ୟ ସୁନ୍ଦର ଭଞ୍ଜ, ବୀରେନ୍ଦ୍ର ଝାଙ୍କର, ଗୋପବନ୍ଧୁ ଶତପଥୀ,ପୁରୁଷୋତ୍ତମ ଦେବତା, ଦୀପକ ପୁରୋହିତ, ବିଶ୍ୱମୟ ପୂଜାରୀ ଓ ଗାଳ୍ପିକ ମଳୟ ମିଶ୍ର, ବିଜେଡି ନେତା ସିର୍ଦ୍ଧାର୍ଥ ମିଶ୍ର, ବିଭୂତି ଭୂଷଣ ମିଶ୍ର, ଅନୀଲ ନନ୍ଦ, ସୁଶୀଲ ନନ୍ଦ ପ୍ରମୁଖ ଗଭୀର ଶୋକ ପ୍ରକାଶ କରିଛନ୍ତି ।