18-Nov-2021

ସୋନପୁର(ମନୋରଞ୍ଜନ ତ୍ରିପାଠୀ) : ଆଜି  ସୁବର୍ଣ୍ଣପୁର ଜିଲ୍ଲାପାଳଙ୍କ କାର୍ଯ୍ୟାଳୟ  ପରିସରରେ  ମହାନଦୀ ପୋଲ ଠାରୁ ଜିଲ୍ଲାପାଳଙ୍କ କାର୍ଯ୍ଯାଳୟ ପର୍ୟ୍ୟନ୍ତ ରାସ୍ତା ପ୍ରଶସ୍ତିକରଣ ନିମନ୍ତେ ଜମି ଅଧିଗ୍ରହଣ ପାଇଁ ଏକ ଜନ ଶୁଣାଣୀ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି I  ଏନ୍ ସି ଡି ଏସ୍ ଆଣ୍ଡ  ଷ୍ଟାର୍ ଭୁବନେଶ୍ବର   ଆନୁକୁଲ୍ୟରେ  ପ୍ରଭାବିତ ପ୍ରଜାମାନଙ୍କ ହରାଉ ଥିବା ଜମି ମୂଲ୍ୟର କ୍ଷୟକ୍ଷତି ତଥା  ସାମାଜିକ  ଆକଳନ କରିବା ପାଇଁ ଏହି ସଭା ଅତିରିକ୍ତ ଜିଲ୍ଲାପାଳ ଶ୍ରୀମତୀ  ନିଶି ପୁନମ୍ ମିଞ୍ଜ୍ ଙ୍କ ଅଧ୍ୟକ୍ଷତାରେ ହୋଇଥିଲା I  ଏନ୍ ସି ଡି ଏସ୍ ଆଣ୍ଡ  ଷ୍ଟାର୍ ର ଅଧିକାରୀ ମାନେ ସୋନପୁର ସହରର ୟୁନିଟ୍ ୧,୨,୩ ରେ ଏଥିପାଇଁ ସର୍ଭେ କରିଥିଲେ ଓ ଏହାର ବିଷଦ ବିବରଣୀ ପାଠ କରିଥିଲେ I  ଏଥିରେ ସର୍ବସମ୍ମତି କ୍ରମେ ପ୍ରକାଶ ପାଇଥିଲା ଯେ ଚୌଡା ରାସ୍ତା ହେବା ଦ୍ଵାରା  ଭାରିଯାନ ର ଚଳାଚଳ ବଢିବ, ପ୍ରଦୂଷଣ ବଢିବ ,ଦୁର୍ଘଟଣା ବୃଦ୍ଧି ପାଇବ ଏବଂ ରାସ୍ତା  ଶୀଘ୍ର ଖରାପ ହେବ I କିନ୍ତୁ  ଏହାର  ସକାରାତ୍ମକ ଦିଗଟି ହେଲା ଏହାଦ୍ୱାରା ସହରରେ ଯାତାୟତର ସୁବିଧା ବଢିବ , ବ୍ୟବସାୟରେ ଉନ୍ନତି ହେବ ଏବଂ ରୋଜଗାର ବଢିବ l କ୍ଷତିଗ୍ରସ୍ତ ପରିବାରକୁ  ସ୍ଵରୋଜଗାର ପାଇଁ ବ୍ଯାଙ୍କ ରୁଣ ଯୋଗାଇ ଦେବା  ସହିତ ପରିବାରର ଇଚ୍ଛୁକ  ସଦସ୍ୟ ମାନଙ୍କୁ ଧନ୍ଦାମୂଳକ ଶିକ୍ଷା ଓ ଉଦ୍ୟୋଗ ତାଲିମ ମାଧ୍ୟମରେ ସ୍ୱାବଲମ୍ବୀ  କରାଯିବ I ବେଞ୍ଚ ମାର୍କ ମୂଲ୍ୟ ହିସାବରେ ଜମିର ସଠିକ କ୍ଷତିପୂରଣ ଦିଆଯିବ I କେତେକ ପ୍ରଜା ରାସ୍ତା ର ଓସାର ୬୬ ଫୁଟ ବଦଳରେ ୫୦ ଫୁଟ ଏବଂ ନାଳ ର ଓସାର ୪ ଫୁଟ ଜାଗାରେ ୨ ଫୁଟ ରଖିବା ପାଇଁ  ପ୍ରସ୍ତାବ ଦେଇଥିଲେ l ଗୋଟିଏ ସୌହାର୍ଦ୍ଦ୍ୟ ପୁର୍ଣ୍ଣ ପରିବେଶରେ ୪୭ ଜଣ ପ୍ରଭାବିତ ପ୍ରଜା ସେମାନଙ୍କ ସମସ୍ୟା ସମ୍ବନ୍ଧରେ ଅଧିକାରୀ ମାନଙ୍କୁ ଜାଣଇ ଥିଲେ I  ସୋନପୁର ତହସିଲଦାର ନବୀନ କିଶୋର ପାଢୀ ସମସ୍ତଙ୍କୁ ଆଶ୍ୱାସନା ଦେଇ କହିଲେ ପ୍ରଶାସନ ସମ୍ବେଦନଶୀଳ ହୋଇ ପ୍ରତିଟି କେସ କୁ ବିଚାରକୁ ନେଇ ଆବଶ୍ୟକ ପଦକ୍ଷେପ ନେବ l ନିଜର ତଥା ସହରର ବିକାଶ ପାଇଁ ସମସ୍ତେ ଆଗଭର ହୋଇ ପ୍ରକଳ୍ପ କୁ  ସହଯୋଗ କରିବା ଉଚିତ I  ଅତିରିକ୍ତ ଜିଲ୍ଲାପାଳ ଶ୍ରୀମତୀ ମିଞ୍ଜ୍  କହିଲେ ବର୍ତ୍ତମାନ ର ରାସ୍ତା ଅତିଶୟ ସଂକୀର୍ଣ୍ଣ ଓ ଜନଗହଳି ହୋଇ ଖରାପ ହୋଇଯାଇଛି I ବୃହତ୍ତର ସ୍ଵାର୍ଥ ଦୃଷ୍ଟିରୁ ଏହାକୁ ସମସ୍ତେ ସମର୍ଥନ କଲେ ଅତିଶୀଘ୍ର ରାସ୍ତା କାମ ହୋଇ ପାରିବ ଓ ଏଥିପାଇଁ ସମସ୍ତଙ୍କ ସହଯୋଗ କାମନା କରିଥିଲେ l   ଆଜିକାର ଏଇ ଜନ ଶୁଣାଣି ରେ ଜମି ଅଧିଗ୍ରହଣ ଅଧିକାରୀ ଅଭିଳାଷ ପୁରୋହିତ,  ଖଦାଳ ପାତ୍ର ଏବଂ ଜିଲ୍ଲାପାଳଙ୍କ କାର୍ଯ୍ୟାଳୟରୁ ମୁଖ୍ୟ ସହାୟକ ରବିନ୍ଦ୍ର ଶତପଥୀ ଓ ମମତା ଦୀପ ପ୍ରମୁଖ  ସହଯୋଗ କରିଥିଲେ l ଅନ୍ୟ ପକ୍ଷରେ  ପ୍ରଜାଙ୍କୁ ବାରମ୍ବାର ବୁଝାମଣା କରି  ଫେଲ ମାରିଥିବା ଅସହାୟ ପ୍ରଶାସନ ପୁଣି ପ୍ରଜାଙ୍କ ସହାୟ ଲୋଡ଼ିଲା ବୋଲି ସହରର ବୁଦ୍ଧିଜୀବୀ ମତ ରଖିଛନ୍ତି l