22-Aug-2021

ସୁବର୍ଣ୍ଣପୁର,(ମନୋରଞ୍ଜନ ତ୍ରିପାଠୀ) :  ଜିଲ୍ଲାର ଅଗ୍ରଣୀ ସାହିତ୍ୟ ଓ ସାଂସ୍କୃତିକ ଅନୁଷ୍ଠାନ ମହାନଦୀ ସାହିତ୍ୟ ସଂସଦ ଓ ଜିଲ୍ଲା ସଂସ୍କୃତି ପରିଷଦର ମିଳିତ  ଆନୁକୂଲ୍ୟରେ  ସ୍ବଭାବ  କବି ଗଙ୍ଗାଧର ମେହେରଙ୍କ ୧୫୯ ତମ ଜନ୍ମ ଜୟନ୍ତୀ ପାଳିତ ହୋଇଯାଇଛି । ଏହି ସାରସ୍ବତ ସମାରୋହରେ ଜିଲ୍ଲା ଆରକ୍ଷୀ  ଅଧିକ୍ଷକ  ସୀତାରାମ  ଶତପଥି ମୁଖ୍ୟ ଅତିଥି ଭାବେ ଯୋଗ ଦେଇ ଗଙ୍ଗାଧରଙ୍କ ସ୍ମୃତି ଚାରଣ କରିଥିଲେ । ଅନ୍ୟମାନଙ୍କ ମଧ୍ୟରେ ସାହିତ୍ୟିକ ମୁଖ୍ୟବକ୍ତା ଭାବରେ ଡକ୍ଟର ମନୋଜ ପଣ୍ଡା ଓ ସମ୍ମାନିତ ବକ୍ତା ଭାବରେ ଅଧ୍ୟାପକ ଅଖିଳ ବିଶ୍ବାଳ ପ୍ରମୁଖ ଯୋଗ ଦେଇଥିଲେ । ସମ୍ମାନୀତ ଅତିଥି ଭାବେ ଡ. ଦେବାଶିଷ ପାଣ୍ଡିଆ ଓ କବି ଆର୍ତ୍ତତ୍ରାଣ ବାବୁ ମଞ୍ଚାସୀନ ଥିଲେ । ଗଙ୍ଗାଧରଙ୍କ ଲେଖନୀରୁ ନିସୃତ କବିତା ଆଜି ସାରା ଓଡିଆ ଜାତିର ଟେକ ରଖିଛି ବୋଲି ଅତିଥିମାନେ ମତ ରଖିଥିଲେ । ଗଙ୍ଗାଧର ମେହେର ଜଣେ ଅଦ୍ବିତୀୟ ସାହିତ୍ୟ ସାଧକ ଥିଲେ ବୋଲି ଆଲୋଚନା ହୋଇଥିଲା । ଏହି ଅବସରରେ କବି ଆର୍ତ୍ତତ୍ରାଣ ବାବୁଙ୍କ ଦ୍ବାରା ଲିଖିତ ଋଷୀକବି ଗଙ୍ଗାଧର ନାମକ ପୁସ୍ତକର ଉନ୍ମୋଚନ କରାଯାଇଥିଲା । ଅନୁଷ୍ଠାନର ସଭାପତି ନାଟ୍ୟଶ୍ରୀ ଗଦାଧର ବାରିକଙ୍କ ଦ୍ବାରା ସଭା ପରିଚାଳନା ହୋଇଥିବା ସଭାରେ କବି ତଥା ଅଧ୍ୟାପକ ଡ. ସୌରଭ ରଞ୍ଜନ ଖମାରୀ ସ୍ବାଗତ ସମ୍ଭାଷଣ ପ୍ରଦାନ କରିଥିବାବେଳେ ଡ. ପରୁଷୋତ୍ତମ ମିଶ୍ର ଅତିଥିମାନଙ୍କ ପରିଚୟ ପ୍ରଦାନ କରିଥିଲେ l

ଶେଷରେ କବି ଲକ୍ଷ୍ମିନାରାୟଣ ସାହୁ ଧନ୍ୟବାଦ ଅର୍ପଣ କରିଥିଲେ । ସମାରୋହରେ କବି ପ୍ରଦ୍ୟୁମ୍ନ ସାହୁ, ଅମ୍ବୁଜ ବିହାରୀ ଶତପଥି, ଅଦୈତ୍ବ ପଣ୍ଡା, କ୍ଷୀରୋଦ ବିହାରୀ ବିଶ୍ବାଳ, ବେଣୁଧର ପ୍ରଧାନ ପ୍ରମୁଖ ଯୋଗ ଦେଇ ଆଲୋଚନାରେ ଭାଗ ନେଇଥିଲେ । ସକାଳ ୮ ଘଣ୍ଟା ବେଳେ ସ୍ଥାନୀୟ ଗଙ୍ଗାଧର ଛକ ଠାରେ ସାହିତ୍ୟ ସଂସଦ ଓ ସ୍ୱଚ୍ଛ ଭାରତ ସଂଗଠନ  ପକ୍ଷରୁ ଗଙ୍ଗାଧର ମେହେରଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରା ଯାଇଥିଲା l