20-Aug-2021

ପୁଇଁତଳା, (ବିନୋଦ କୁମାର ଦୀପ) : ଯୋଗଜନ୍ମାଙ୍କ ଜନ୍ମ ମାଟି ଛତାମଖନାରେ ସ୍ୱାଧୀନତା ସଂଗ୍ରାମୀ ସ୍ବର୍ଗତ ଯୁଧିଷ୍ଠିର ମିଶ୍ରଙ୍କ ୧୦୭ତମ ଜନ୍ମ ଜୟନ୍ତୀ କାର୍ଯ୍ୟକ୍ରମ ମହାସମାରୋହ ରେ ପାଳିତ ହୋଇଯାଇଛି । ନରସିଂହ ସେନା ସଭାପତି ଶୁଭ୍ରାଂଶୁ ପଣ୍ଡାଙ୍କ ସଭାପତିତ୍ୱରେ ଅନୁଷ୍ଠିତ ଉତ୍ସବରେ ମୁଖ୍ୟ ଅତିଥି ରୂପେ ରବି ଶଙ୍କର ପାଣ୍ଡିଆ, ପ୍ରାକ୍ତନ ପ୍ରାଧ୍ୟାପକ ରାଜେନ୍ଦ୍ର ବିଶ୍ୱ ବିଦ୍ୟାଳୟ,ମୁଖ୍ୟ ବକ୍ତା କ୍ଷମାନିଧି ଝାଙ୍କର,ଅଧ୍ୟକ୍ଷ ଓଡ଼ିଶା ଆଦର୍ଶ ବିଦ୍ୟାଳୟ 

ପଥରଚେପା,ଅନ୍ୟତମ ସମ୍ମାନୀତ ଅତିଥି ଭାବେ ଲୋଇସିଂହା ପୂର୍ବତନ ବ୍ଲକ ଅଧ୍ୟକ୍ଷ ତଥା ବରିଷ୍ଠ ଓକିଲ ଟଙ୍କଧର ଗଡ଼ତ୍ୟା,ସାମାଜିକ କର୍ମୀ ଲୋକନାଥ କୁମୁରା ପ୍ରମୁଖ ଯୋଗଦେଇ ଶ୍ରୀ ମିଶ୍ର ଙ୍କ ସ୍ମୃତି ଚାରଣ କରିଥିଲେ । ବକ୍ତାମାନେ ସ୍ବର୍ଗତ ଶ୍ରୀ ମିଶ୍ର ଙ୍କ ଜୀବନୀ ଉପରେ ଆଲୋକପାତ କରି ତାଙ୍କର ବାଲ୍ୟଜୀବନ,ଶିକ୍ଷା ଦୀକ୍ଷା,ପ୍ରଜାମେଳି ଆନ୍ଦୋଳନ ର ନେତୃତ୍ୱ,ସାମନ୍ତବାଦୀ ହଟେଇ ସାମ୍ୟବାଦୀ ପ୍ରତିଷ୍ଠା ରେ ତାଙ୍କର ନିର୍ଣ୍ଣାୟକ ଲଢ଼େଇ,ସମ୍ବଲପୁର ବିଶ୍ୱବିଦ୍ୟାଳୟ ର କୁଳପତି ତଥା ଜିଲ୍ଲା ର ସମସ୍ତ ପ୍ରମୁଖ ଅନୁଷ୍ଠାନ ପ୍ରତିଷ୍ଠା ପାଇଁ ତାଙ୍କର ଭୂମିକା ବିଷୟରେ ସବିଶେଷ ଆଲୋଚନା ହୋଇଥିଲା । ସେ ଥିଲେ ସେ ସମୟର ଅପ୍ରତିଦ୍ବନ୍ଦୀ ଓକିଲ, ଓକିଲାତି ର ବିଚାର ଉପରେ ତାଙ୍କରି ବିଚାର । ଗୋଟେ ଅଖ୍ୟାତପଲ୍ଲୀରୁ ଯାଇ ଓଡ଼ିଶା ର ନାଁ କରା ଓକିଲ ହୋଇ ଆଗକୁ ଯାଇ ଭାରତୀୟ ସମ୍ବିଧାନ ସଭା ର ସଭ୍ୟ ହୋଇ ବିଶ୍ୱ କୁ ଗୋଟେ ସୁନ୍ଦର ସମ୍ବିଧାନ ପ୍ରଣୟନ ରେ ଥିବା ତାଙ୍କର ଅବଦାନ ପାଇଁ ସେ ଚିର ନମସ୍ୟ ହୋଇ ରହିବେ ବୋଲି ମତ ପ୍ରକାଶ ପାଇଥିଲା। ତାଙ୍କର ବଳିଷ୍ଠ ନେତୃତ୍ୱ ଓ ବ୍ୟକ୍ତିତ୍ୱ ପାଇଁ ସାରା ଓଡ଼ିଶା ରେ ବଲାଙ୍ଗିର ର ନାଁ ରହିଥିଲା । ତାଙ୍କରି ଜୀବନୀଙ୍କୁ ଲିପିବଦ୍ଧ କରିବାକୁ ଓ ଇତିହାସ ପାଠ୍ୟକ୍ରମ ରେ ଯୋଡ଼ିବାକୁ ସମସ୍ତେ ମତ ଦେଇଥିଲେ । ଅନ୍ୟମାନଙ୍କ ମଧ୍ୟରେ ରାଜ କିଶୋର ମିଶ୍ର,ସଚ୍ଚିଦାନନ୍ଦ ମିଶ୍ର,କେଶବ କରଣ ,ପୂର୍ବତନ ସରପଞ୍ଚ ସରୋଜ ମେସ୍ୱା,ସରପଞ୍ଚ ଜନ୍ମ ବାରିକ ପ୍ରମୁଖ ସହଯୋଗ କରିଥିଲେ। ମଞ୍ଚ ପରିଚାଳନା କରିଥିଲେ ସରୋଜ ବିଶ୍ୱାଳ। ଶେଷରେ ମୁରଲୀ ମହାକୁର ଧନ୍ୟବାଦ ଅର୍ପଣ କରିଥିଲେ । ଅନୁଷ୍ଠାନ ଦ୍ୱାରା ପୂର୍ବସୁରି ଙ୍କୁ ସମ୍ମାନ ଦେବା ଲାଗି ଆୟୋଜିତ ଏହି କାର୍ଯ୍ୟକ୍ରମ କୁ 

ଅତିଥିଗଣ ଭୁୟସୀ ପ୍ରଶଂସା କରିଥିଲେ । ଏପରି କାର୍ଯ୍ୟକ୍ରମ ବର୍ତ୍ତମାନର ଯୁବପିଢ଼ି କୁ ଉଦବୁଦ୍ଧ କରିବ, ପ୍ରେରଣା ଦେବ ବୋଲି ବକ୍ତା ମାନେ ଆଶା ପ୍ରକଟ କରିଛନ୍ତି । ପଞ୍ଚାୟତର ବହୁ ବୁଦ୍ଧିଜୀବୀ ଏହି ଉତ୍ସବରେ ଯୋଗ ଦେଇଥିଲେ।