28-Sep-2020

ଭୁବନେଶ୍ୱର,  କରୋନା ମହାବିପତ୍ତି ଯେତେ ଭୟାବହ ହେଲେ ବି ମାନବ ସମାଜ କେବେ ବି ଏଡ୍‌ସର ଭୟରୁ ମୁକ୍ତ ନୁହେଁ । ଏପରିକି କରୋନା ସଂକ୍ରମିତଙ୍କର ବି ଏଡ୍‌ସ ପରୀକ୍ଷଣ ନିହାତି ଆବଶ୍ୟକ । ଲକ ଡାଉନ ସମୟରେ ମଧ୍ୟ ଏଡ୍‌ସ ନେଇ ସଚେତନତା ଏବଂ ଉପାନ୍ତ ଅଞ୍ଚଳରେ ବି ଏଡସ ଔଷଧ ପହଂଚାଇବା ଅତ୍ୟାବଶୀକ । କରୋନା ମୁକାବିଲାରେ ରାଜ୍ୟର ଜନପ୍ରୀୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସ୍ୱାସ୍ଥ୍ୟ ବିଭାଗର ସମସ୍ୟା ପ୍ରତି ଯଥେଷ୍ଟ ଗୁରୁତ୍ୱ ଦେବା ସହ ସେମାନଙ୍କୁ ବିଭିନ୍ନ କ୍ଷେତ୍ରରେ ଅଧିକ ପ୍ରୋତ୍ସାହନ ରାଶି ଏବଂ ସହାୟତା ପ୍ରଦାନ କରିଛନ୍ତି । ହେଲେ ଏଡସ ନିୟନ୍ତ୍ରଣରେ ଦାୟୀତ୍ୱରେ ଥାଇ କରୋନା ସହ ଯୁଝିଥିବା ରାଜ୍ୟ ଏଡସ ନିୟନ୍ତ୍ରଣ ସମିତି (ଓସାକ)ର କାର୍ଯ୍ୟରତ କର୍ମଚାରୀଙ୍କ ପ୍ରତି ସତେ ଯେମିତି ଆଖି ବୁଜି ଦେଇଛନ୍ତି ସରକାର । 
ଏହି କର୍ମଚାରୀମାନେ ରାଜ୍ୟରେ କୋଭିଡ ମୁକାବିଲା କ୍ଷେତ୍ରରେ ସମସ୍ତ କାର୍ଯ୍ୟଭାରକୁ ସୂଚାରୂ ରୂପେ ସମ୍ପାଦିତ କରିଛନ୍ତି । ଏଥିପାଇଁ ଏମାନଙ୍କ ମଧ୍ୟରୁ ଏବେ ଅନେକ କରୋନା ସଂକ୍ରମିତ ହୋଇଛନ୍ତି । କୋଭିଡ ସମୟରେ ଏଚ.ଆଇ.ଭି ସଂକ୍ରମିତ ବ୍ୟକ୍ତି ବିଶେଷ ମାନଙ୍କ ଘରକୁ ନିଜ ମୋଟର ସାଇକେଲରେ ଯାଇ ଏ.ଆର.ଟି ଔଷଧ ପ୍ରଦାନ କରିଛନ୍ତି । ଜୀବନକୁ ବାଜି ଲଗାଇ ବିଭିନ୍ନ ସଙ୍ଗରୋଧ କେନ୍ଦ୍ରକୁ ଯାଇ କୋଭିଡ ସଂକ୍ରମିତ ପ୍ରବାସୀ ଏବଂ ବ୍ୟକ୍ତିଙ୍କୁ ଆବଶ୍ୟକ ପରାମର୍ଶ ପ୍ରଦାନ କରୁଥିଲେ । ଜିଲ୍ଲା ମୁଖ୍ୟ ସ୍ୱାସ୍ଥ୍ୟକେନ୍ଦ୍ର ଗୁଡିକରେ କାର୍ଯ୍ୟରତ ଏହି କର୍ମଚାରୀମାନେ କୋଭିଡକୁ ଖାତର ନକରି କୋଭିଡ ଆକ୍ରାନ୍ତ ସମେତ ଅନ୍ୟ ରୋଗୀଙ୍କର ମଧ୍ୟ ଏଡସ ପରୀକ୍ଷା ସହ ପରାମର୍ଶ ଦେବାକ ପଡିଥାଏ । ହେଲେ ରାଷ୍ଟ୍ରିୟ ସ୍ୱାସ୍ଥ୍ୟ ମିଶନ (ଏନ.ଏଚ.ଏମ) ତରଫରୁ ପ୍ରଦାନ କରାଯାଉ ଥିବା ଗୋଟିଏ ମାସର ଅଧିକ ପ୍ରୋତ୍ସାହନ ରାଶି କାହିଁକି ପ୍ରଦାନ କରାଗଲା ନାହିଁ, ଏହାର ଉତ୍ତର ମିଳି ପାରୁନାହିଁ । ସବୁଠାରୁ ଦୁର୍ଭାଗ୍ୟର ବିଷୟ ହେଉଛି ଏନ.ଏଚ.ଏମ ଅଧୀନରେ ଥିବା ଅନ୍ୟ କର୍ମଚାରୀ ମାନଙ୍କୁ ଏହି ପ୍ରୋତ୍ସାହନ ରାଶି ମିଳିଥିବା ବେଳେ ଏହି ଏଡସ ସେଲର ଏହି କର୍ମଚାରୀ ମାନଙ୍କୁ ପ୍ରଦାନ କରାଯାଇ ନାହିଁ । ଏଥିନେଇ ଏହି କର୍ମଚାରୀମାନେ ବାରମ୍ବାର ବିଭାଗୀୟ ଉଚ୍ଚ ଅଧିକାରୀ ଏବଂ ସରକାରଙ୍କ ନିକଟରେ ନିଜର ଦଃୁଖ ଜଣାଇ ଥିଲେ ମଧ୍ୟ  କୌଣସି ସୁଫଳ ମିଳିନାହିଁ । ଅନ୍ତତ ପକ୍ଷେ କୋଭିଡ ପରି ମହାବିପତ୍ତି ସମୟରେ କୋଭିଡ ମୁକାବିଲାରେ ଥିବା ସ୍ୱାସ୍ଥ୍ୟ ବିଭାଗର କୌଣସି କର୍ମଚାରୀଙ୍କ ପ୍ରତି ବୈମାତୃକ ମନୋଭାବକୁ ସାଧାରଣରେ ନାପସନ୍ଦ କରାଯାଉଛି । 
ଦୀର୍ଘ ୧୮ ବର୍ଷ ଧରି ରାଜ୍ୟରେ ସଫଳତାର ସହ ଚାଲିଥିବା ଏଡସ ନିରାକରଣ କାର୍ଯ୍ୟ ପାଇଁ ଜାତୀୟ ସ୍ତରରେ ଅନେକବାର ଓଡିଶା ପୁରସ୍କୃତ ହୋଇଛି । ସରକାରଙ୍କ ବିଭିନ୍ନ କାର୍ଯ୍ୟକ୍ରମ ଯଥା ଅଣ ସଂକ୍ରାମକ ରୋଗ, ତମାଖୁ ବର୍ଜନ କାର୍ଯ୍ୟକ୍ରମ, ମାନସିକ ସ୍ୱାସ୍ଥ୍ୟ କାର୍ଯ୍ୟକ୍ରମ, ସହ କୋଭିଡ ମୁକାବିଲା ଆଦି ବିଭାଗୀୟ ଉଚ୍ଚ ଅଧିକାରୀଙ୍କ ଦ୍ୱାରା ପ୍ରଦତ୍ତ ସମସ୍ତ ସ୍ୱାସ୍ଥ୍ୟ ସପର୍କିତ କାର୍ଯ୍ୟକୁ ଏହି କର୍ମଚାରୀମାନେ ସଫଳତାର ସହ ସମ୍ପାଦନ କରିଛନ୍ତି । ହେଲେ ସେମାନଙ୍କୁ ଅଦ୍ୟାବଧି ଇ.ପି.ଏଫ, ଇ.ଏସ.ଆଇ, ଦକ୍ଷତା ପ୍ରୋତ୍ସାହନ ରାଶି, କଳାହାଣ୍ଡି ବଲାଙ୍ଗୀର କୋରାପୁଟ ଆଦି ଜିଲ୍ଲାରେ କାର୍ଯ୍ୟ କରୁଥିବା କର୍ମଚାରୀ ମାନଙ୍କୁ ମିଳୁଥିବା କେ.ବି.କେ ଭତ୍ତା ଭଳି ମୌଳିକ ସୁବିଧାରୁ ବଂଚିତ କରାଯାଇଛି । ଦୀର୍ଘ ୧୮ ବର୍ଷ ଧରି କାର୍ଯ୍ୟ କଲାପରେ ବି ଚାକିରୀର କୌଣସି ସ୍ଥାୟୀତ୍ୱ ନଥିବା, କୋଭିଡ କାର୍ଯ୍ୟରେ ଥାଇ କୋଭିଡ ଯୋଦ୍ଧାର ମାନ୍ୟତା ନମିଳିବା ଯେତିକି ଆଶ୍ଚର୍ଯ୍ୟ ଜନକ ତତୋଧିକ ଉଦବେଗ ଜନକ । ଏପରିକି ସାମ୍ବିଧାନିକ ବ୍ୟବସ୍ଥା ଅନୁସାରେ ସମାନ କାମକୁ ସମାନ ଦରମା ନପାଇବା ସହ ବିଭିନ୍ନ ସମସ୍ୟାରେ ଜର୍ଜରିତ ଏହି କର୍ମଚାରୀ ମାନଙ୍କ ପରିବାର ଏବେ ଭାଙ୍ଗି ପଡିବା ସହ ମାନସିକ ଭାରସାମ୍ୟ ହରାଉଛନ୍ତି । ଏ କ୍ଷେତ୍ରରେ ରାଜ୍ୟ ସରକାର ତୁରନ୍ତ ଆବଶ୍ୟକ ପଦକ୍ଷେପ ଗ୍ରହଣ କରି ଉପରୋକ୍ତ ନାର୍ଯ୍ୟ ଦାବି ଗୁଡିକ ପୁରଣ କରିବା ନେଇ ପଦକ୍ଷେପ ଗ୍ରହଣ କରିବାକୁ ଏହି କର୍ମଚାରୀ ମାନଙ୍କ ତରଫରୁ ମୁଖ୍ୟମନ୍ତ୍ରୀଙ୍କୁ ନିବେଦନ କରାଯାଇଛି ।