11-Jul-2021

ସମ୍ବଲପୁର,(ପ୍ରେରଣା ଖବର ): ଆଜି ହୀରାକୁଦ ଜଳଭଣ୍ଡାର ରୁ ଚଳିତ ବର୍ଷର ପ୍ରଥମ ବନ୍ୟାଜଳ ନିଷ୍କାସନ କରାଯାଇଛି I ଦିନ ୧୧ ଟା ସମୟରେ ପୂଜାର୍ଚ୍ଚନା ପରେ ଡ୍ୟାମର ୭ ନଂ ଗେଟକୁ ଖୋଲାଯାଇ ଜଳ ନିଷ୍କାସନ କରାଯାଇଛି । ପ୍ରଥମ ପର୍ଯ୍ୟାୟ ରେ ଆଜି ୨ ଟି ଗେଟ ଦେଇ ବନ୍ୟା ଜଳ ନିଷ୍କାସନ ଜାରୀ ରହିଛି I  ଆସନ୍ତା ୧୧ ତାରିଖରେ ହୀରାକୁଦ ଜଳଭଣ୍ଡାର ରୁ ପ୍ରଥମ ବନ୍ୟା ଜଳ ନିଷ୍କାସନ କରାଯିବ ବୋଲି ହୀରାକୁଦ ବନ୍ଧ କର୍ତ୍ତୃପକ୍ଷ ପୂର୍ବରୁ ଘୋଷଣା କରିଥିଲେ I ତେବେ ବିଗତ ବର୍ଷ ପରି ଚଳିତ ବର୍ଷ ମଧ୍ୟ କରୋନା କଟକଣା ଯୋଗୁଁ ଗେଟ୍ ଖୋଲିବା ସମୟରେ ବିଭାଗୀୟ ଅଧିକାରୀ ଏବଂ ପ୍ରଶାସନିକ ଅଧିକାରୀ ଙ୍କ ବ୍ୟତୀତ ଡ୍ୟାମ ନିକଟକୁ ଏପରିକି ଗଣ ମାଧ୍ୟମ ପ୍ରତିନିଧି ମାନଙ୍କୁ ମଧ୍ୟ କାହାରିକୁ ଛଡାଯାଇ ନାହିଁ I ଚଳିତ ଥର ଗତ ବର୍ଷ ଅପେକ୍ଷା ୧୬ ଦିନ ବିଳମ୍ବ ରେ ଗେଟ୍ ଖୋଲାଯାଇଛି । ୨୦୨୦ ମସିହାରେ ରେ  ଜୁନ ୨୫ ତାରିଖ ଜଳ ଭଣ୍ଡାରରୁ ପ୍ରଥମ ବନ୍ୟା ଜଳ ନିଷ୍କାସନ କରାଯାଇଥିବା ବେଳେ ୨୦୧୯ ମସିହାରେ ରେ ଅଗଷ୍ଟ ୧୪ ତାରିଖ ଏବଂ ୨୦୧୮ ମସିହାରେ ଜୁଲାଇ ୨୪ ତାରିଖ ରେ ପ୍ରଥମ ବନ୍ୟା ଜଳ ନିଷ୍କାସନ ହୋଇଥିଲା I ଆଜିକାର ଏହି ବନ୍ୟା ଜଳ ନିଷ୍କାସନ ସମୟରେ ଉତ୍ତରାଞ୍ଚଳ ପୋଲିସ ଡିଆଇଜି ଦୀପକ କୁମାର, ଜିଲ୍ଲା ଆରକ୍ଷୀ ଅଧିକ୍ଷକ, ବି. ଗଙ୍ଗାଧର, ଭାରାପ୍ରାପ୍ତ ଜ଼ିଲ୍ଲାପାଳ ସୁକାନ୍ତ ତ୍ରିପାଠୀ, ଉତ୍ତରାଞ୍ଚଳ ରାଜସ୍ବ କମିଶନର ଙ୍କ ସଚିବ ଭୀମସେନ ପୁନମ କାନ୍ତ ଏକ୍କା, ଜଳ ସମ୍ପଦ ବିଭାଗ ସର୍ବୋଚ୍ଚ ଯନ୍ତ୍ରୀ ସୁନୀଲ ନାୟକ, ଅତିରିକ୍ତ ସର୍ବୋଚ୍ଚ ଯନ୍ତ୍ରୀ ନିରାକାର ବିଶି, ହୀରାକୁଦ ଏସଡିପିଓ଼ ସତ୍ୟବ୍ରତ ଦାଶ, ହୀରାକୁଦ ଆଇଆଇସି ଚିତ୍ତ ରଞ୍ଜନ ନାୟକ, ଅତିରିକ୍ତ ସହକାରୀ ଯନ୍ତ୍ରୀ ନରେଶ ବାରିକ, ଇଂ. ଇଶ୍ୱର ବେହେରା, ସହକାରୀ ଯନ୍ତ୍ରୀ (ମେକାନିକାଲ) ପ୍ରିୟ ରଞ୍ଜନ ପଣ୍ଡା, ଉପ ସହକାରୀ ଯନ୍ତ୍ରୀ ସୋମ୍ୟ ରଞ୍ଜନ ପତ୍ରି ଏବଂ ତପନ କୁମାର ହଳଦିଗୁଣ୍ଡ ତଥା ବିଭାଗୀୟ କର୍ମଚାରୀ ଗଣ ଉପସ୍ଥିତ ଥିଲେ । ଆଜି ସନ୍ଧ୍ୟା ୬ ଘଟିକା ରେ ବନ୍ଧ କର୍ତ୍ତୃପକ୍ଷଙ୍କ ସୂଚନା ଅନୁସାରେ ହୀରାକୁଦ ଜଳଭଣ୍ଡାର ର ଜଳସ୍ତର ୬୦୯. ୫୨ ଫୁଟ ରହିଛି  l  ବାମ ଭାଗ ର ସମୁଦାୟ ୨ ଟି ଗେଟ ଦେଇ ଏହି ବନ୍ୟା ଜଳ ନିଷ୍କାସନ କରାଯାଉଛି l  ଜଳଭଣ୍ଡାର କୁ ପ୍ରତି ସେକେଣ୍ଡରେ ୬୦ ହଜାର ୮୬୦ କ୍ୟୁସେକ ଜଳ ପ୍ରବେଶ କରୁଛି । ସେହିପରି ୫୪ ହଜାର ୦୫୬ କ୍ୟୁସେକ ଜଳ ପ୍ରତି ସେକେଣ୍ଡ ରେ ନିଷ୍କାସନ କରାଯାଉଛି । ଏହା ସହିତ ପାୱାର ଚେନାଲ କୁ ୧୯ ହଜାର ୮୪୨, ବିଭିନ୍ନ କେନାଲ ରେ ୪ ହଜାର ୩୦୦, ଶିଳ୍ପ ସଂସ୍ଥା ପାଇଁ ୨୭୨, ସ୍କ୍ରିପୱେ ଦେଇ ୨୯ ହଜାର ୬୪୨ କ୍ୟୁସେକ ଜଳ ଛଡାଯାଉଛି । ଖଇରମାଲରେ ୪୮ ହଜାର ୮୦୦,  ବରମୂଳ ଠାରେ ୪୨ ହଜାର ୮୦୦,  ଓ ମୁଣ୍ଡଳୀ ନିକଟରେ ୩୭ ହଜାର, ପଥରଲା ରେ ୨୧ ହଜାର ୨୧୯ ଘନଫୁଟ ବନ୍ୟାଜଳ ପ୍ରତି ସେକେଣ୍ଡ ରେ ପ୍ରବାହିତ ହେଉଛି I