12-Oct-2026

ବିନିକା(ହିମାଂଶୁ ଶେଖର ପୁଟେଲ)ବିଜୁ ଜନତା ଦଳ ପକ୍ଷରୁ ଚଳିତ ଅକ୍ଟୋବର ମାସ ୨ତାରିଖ ଗାନ୍ଧୀ ଜୟନ୍ତୀରୁ ମାସେ ବ୍ୟାପୀ ଜନସମ୍ପର୍କ ପଦଯାତ୍ରା ରାଜ୍ୟର କୋଣ ଅନୁକୋଣରେ ଆରମ୍ଭ ହୋଇଛି। ଏହି ପଦଯାତ୍ରା ନଭେମ୍ବର ୨ ତାରିଖ ଯାଏଁ ଚାଲିବ। ଦଳର ସୁପ୍ରିମୋ ନବୀନ ପଟ୍ଟନାୟକ ଭୁବନେଶ୍ୱର ୫୨ ନମ୍ବର ୱାର୍ଡରୁ ଏହାର ଶୁଭାରମ୍ଭ କରିଛନ୍ତି ।ଏହି ପରିପେକ୍ଷୀରେ ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ନିର୍ବାଚନ ମଣ୍ଡଳୀ ଅନ୍ତର୍ଗତ ବୀରମହାରାଜପୁର,ଉଲୁଣ୍ଡା ଓ ବିନିକା ବ୍ଲକରେ ପଦଯାତ୍ରାକୁ କିପରି ସଫଲ କରାଯିବ ସେନେଇ ଏକ ପ୍ରସ୍ତୁତି ବୈଠକ ଉଲୁଣ୍ଡା ପୌଢ଼ତିକିରା ଠାରେ ସୋମବାର ଅପରାହ୍ନରେ ଅନୁଷ୍ଟିତ ହୋଇଯାଇଛି ।ଏଥିରେ  ବୀରମହାରାଜପୁର ବିଧାନସଭାର ପୂର୍ବତନ ବିଧାୟକ ତଥା ପୂର୍ବତନ ମନ୍ତ୍ରୀ ପଦ୍ମନାଭ ବେହେରା ମୁଖ୍ୟ ଅତିଥି ଭାବରେ ଯୋଗଦେଇଥିଲେ ।ଏହି ପ୍ରସ୍ତୁତି ବୈଠକରେ ଅନ୍ୟ ମାନଙ୍କ ମଧ୍ୟରେ ଶମ୍ଭୁନାଥ ଖଣ୍ଡଗିରି,ବିନୋଦ ବିହାରୀ ନାଏକ,ସତ୍ୟରଞ୍ଜିତ ମିଶ୍ର,ଦ୍ବାରିକାନାଥ ସାହୁ,ସୋମନାଥ ମିଶ୍ର,ସୁବାସ ଭୋଇଙ୍କ ସମେତ ବହୁ ବିଜେଡି ନେତା ଉପସ୍ଥିତ ରହି ବକ୍ତବ୍ୟ ରଖିଥିଲେ।ସେମାନେ କହିଥିଲେ ଯେ କେନ୍ଦ୍ରର ନୂଆ MMDR (ଖଣି ଓ ଖଣିଜ ସଂଶୋଧନ) ଆଇନ ୨୦୨୬କୁ ବିରୋଧ କରିବା ସହିତ ଏହି ଆଇନ ଦ୍ୱାରା ଓଡ଼ିଶାର ୧ ଲକ୍ଷ କୋଟି ଟଙ୍କାର ବକେୟା ମିଳିବ ନାହିଁ ଓ ରାଜ୍ୟର ଅର୍ଥନୈତିକ ଅଧିକାର ଛଡାଇ ନିଆଯାଇଛି ବୋଲି କହିଥିଲେ ।ସେହିପରି ବିଜେପି ସରକାରର ୨୭ ମାସର ପ୍ରତିଶ୍ରୁତି ପୂରଣ ହୋଇନାହିଁ। ଚାଷୀ,ଯୁବକ,ଛାତ୍ର,ମହିଳା, ଆଦିବାସୀ,ଦଳିତ ସମସ୍ତେ ପ୍ରତାରିତ ହୋଇଛନ୍ତି। ରାଜ୍ୟରେ ଆଇନ ଶୃଙ୍ଖଳା ବିପର୍ଯ୍ୟସ୍ତ ଓ ମହିଳା ନିର୍ଯାତନା ବଢୁଛି।
 ମେଟ୍ରୋ ପ୍ରକଳ୍ପ ବନ୍ଦ,ରାସ୍ତା ଖରାପ, ପାଠ୍ୟ ପୁସ୍ତକରେ ଭୁଲ, ଭତ୍ତା ଓ ଆବାସ ଯୋଜନାରେ ଅଚଳାବସ୍ଥା। ତେଣୁ ହେବାକୁ ଯାଉଥିବା ଏହି ପଦଯାତ୍ରାରେ ଦଳର କର୍ମୀମାନେ ଘରକୁ ଘର ବୁଲି ଲୋକଙ୍କୁ ସଚେତନ କରିବେ ବୈଠକରେ ନିଷ୍ପତି ନିଆଯାଇଥିଲା ।ପଦଯାତ୍ରା ବେଳେ ଲୋକଙ୍କ ସହିତ ଯୋଡ଼ି ହେବାକୁ ଦଳର ସଂଗଠନକୁ ମଜଭୁତ କରିବାକୁ ଶ୍ରୀ ବେହେରା ଉପସ୍ଥିତ କର୍ମୀ ମାନଙ୍କୁ ପରାମର୍ଶ ଦେଇଥିଲେ । ଏହି ପ୍ରସ୍ତୁତି ବୈଠକରେ ବୀରମହାରାଜପୁର ବିଧାନ ସଭା କ୍ଷେତ୍ରର ସମସ୍ତ ଗ୍ରାମରୁ ଶତାଧିକ କର୍ମୀ ଯୋଗଦେଇଥିଲେ ।