08-Jul-2021

କଟକ (ସୁଶାନ୍ତ କୁମାର ଖଟୁଆ ) : କଟକ ଉତ୍ତର ଡାକମଣ୍ଡଳ ଅଧୀନ ଯାଜପୁର ଜିଲ୍ଲାର ଧର୍ମଶାଳା ବ୍ଲକ ଅନ୍ତର୍ଗତ ଜେନାପୁର ଉପଡାକଘରେ ଦିନକୁ ଦିନ ସମସ୍ୟା ପିଛା ଛାଡ଼ୁନି । ଗୋଟିଏ ପରେ ଗୋଟିଏ ସମସ୍ୟା ଗ୍ରାହକମାନଙ୍କୁ ଅତିଷ୍ଠ କରାଇବାରେ ଲାଗିଛି । କିଛି ମାସ ପୂର୍ବରୁ ଜେନାପୁର ଉପଡାକଘରେ କୋର ବ୍ୟାଙ୍କିଙ୍ଗ ବ୍ୟବସ୍ଥା ସାଙ୍ଗକୁ ଆଧାର କାର୍ଡ  ପ୍ରସ୍ତୁତି ଓ ତଦଜନିତ  ତ୍ରୁଟି ସଂଶୋଧନ ପାଇଁ ଖୋଲାଯାଇଛି ଏକ ଆଧାର କାଉଣ୍ଟର । ଖୁବ ସହଜ ଓ ହାତପାହାନ୍ତାରେ ଡାକ ଓ ଆଧାର କାର୍ଡ ସମ୍ବନ୍ଧୀୟ ସମସ୍ତ ସୁବିଧା ଯୋଗାଇଦେବା ଲକ୍ଷ୍ୟରେ ଉକ୍ତ କାଉଣ୍ଟରଟି ଖୋଲାଯାଇଥିଲେ ମଧ୍ୟ ତାହା ଗ୍ରାହକ ଓ ନିର୍ଭର କରିଆସୁଥିବା ୧୨ଟି ଶାଖା ଡାକଘରର କର୍ମଚାରୀମାନଙ୍କ ହିତରେ ଆଦୌ ଆସୁ ନ ଥିବା ପରିଲକ୍ଷିତ ହୋଇଛି । କିଛି ମାସ ହେଲା ଆଧାର କାଉଣ୍ଟରରେ ତାଲା ଝୁଲୁଥିବା ଦେଖିବାକୁ ମିଳୁଛି।ଫଳସ୍ୱରୂପ ହିତାଧିକାରୀମାନଙ୍କର ଏହି ସୁବିଧାକୁ ନେଇ ଦେଖୁଥିବା ସୁନେଲି ସ୍ୱପ୍ନ ବର୍ତ୍ତମାନ ଫିକା ପଡିଯାଇଛି ।ଆଧାର କାର୍ଡ ସମ୍ବନ୍ଧୀୟ  କୌଣସି କାର୍ଯ୍ୟ ଏଠାରେ କରା ନ ଯିବାରୁ ଗ୍ରାହକମାନେ ନାହିଁ ନ ଥିବା ସମସ୍ୟାର ସମ୍ମୁଖୀନ ହୋଇଆସୁଛନ୍ତି ।ବହୁ ଖର୍ଚ୍ଚାନ୍ତ ଓ ନୟାନ୍ତ ହୋଇ ସେମାନଙ୍କୁ ଅନ୍ୟତ୍ର ଯିବାକୁ ପଡୁଛି ।ତେବେ କାର୍ଯ୍ୟକାରୀ କରା ନ ଯାଇ ଏଠାରେ ଆଧାର କାର୍ଡ କାଉଣ୍ଟର ଖୋଲାଯିବା କାହା ସ୍ୱାର୍ଥରେ ବୋଲି ସାଧାରଣରେ ଏକ ବିରାଟ ପ୍ରଶ୍ନବାଚୀ ସୃଷ୍ଟି ହୋଇଛି ।ମାସ ମାସ ଧରି ନିଷ୍କ୍ରିୟ ଅବସ୍ଥାରେ ପଡିରହିଥିଲେ ସୁଦ୍ଧା ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ଏଥିପ୍ରତି ଆଦୌ ନିଘା ନ ଥିବା ସ୍ପଷ୍ଟ ଅନୁମେୟ ହେଉଛି ।ତେଣୁ ଉପରୋକ୍ତ ସମସ୍ୟା ପ୍ରତି ସ୍ୱତନ୍ତ୍ର ଦୃଷ୍ଟି ଦେଇ ଉଚ୍ଚ କର୍ତ୍ତୃପକ୍ଷ ଅବିଳମ୍ବେ ପଦକ୍ଷେପ ନେବା ପୂର୍ବକ ଆଧାର କାଉଣ୍ଟରକୁ କାର୍ଯ୍ୟକାରୀ କରାଇବାର  ସୁବ୍ୟବସ୍ଥା କରାଇବାକୁ    ହିତାଧିକାରୀମାନଙ୍କ ମହଲରେ ଦୃଢ ଦାବି ହେଉଛି ।