24-Jun-2021

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ) : ସୁବର୍ଣ୍ଣପୁର ଜିଲ୍ଲା ଅନ୍ତର୍ଗତ କୋଟସମଲାଇ ସ୍ଥିତ ପାତାଳି ଶ୍ରୀକ୍ଷେତ୍ର ରେ ଶ୍ରୀଜୀଉ ଙ୍କ ସ୍ନାନ ଯାତ୍ରା ଅନୁଷ୍ଠିତ ହୋଇଯାଇଛି। କୋଭିଡ଼ କଟକଣା ଯୋଗୁଁ କେବଳ ନୀତିକାନ୍ତି ରେ ସମାପନ ହୋଇଥିବା ଏଇ ସ୍ନାନ ଯାତ୍ରା  ଓ ମହାପ୍ରଭୁଙ୍କ ଗଜାନନ ବେଶ କୁ କୌଣସି ଭକ୍ତ ଦେଖିବା ର ସୁଯୋଗ ନଥିବା ବେଳେ  ସୀମିତ ସେବାୟତ ମାନଙ୍କ ଦ୍ୱାରା ଏ ସମସ୍ତ ଦେବନୀତି ସଂପନ୍ନ ହୋଇଥିଲା। ପ୍ରଥମେ ମଙ୍ଗଳ ଆଳତୀ ପରେ ଖେଚୁଡ଼ି ଭୋଗ ପରେ ଶ୍ରୀଜୀଉଙ୍କୁ ଗୋଟି ପହଣ୍ଡି ରେ ସ୍ନାନ ବେଦି କୁ ବିଜେ କରାଯାଇଥିଲା। ସକାଳୁ ଭାରୁଆ ମାନଙ୍କ ଦ୍ୱାରା ହରିହରଯୋରରୁ ୧୦୮ କଳସି ଜଳ ଅଣାଯାଇ ସ୍ନାନବେଦି ରେ ରଖାଯାଇଥିଲା।ସେଇ ପବିତ୍ର ଜଳରେ ଚୂଆ,ଚନ୍ଦନ, ଅଗୁର,ଗଂଗା ଜଳ,କେଶର,ପଞ୍ଚକଷାୟ ଓ କର୍ପୂରାଦି ମିଶ୍ରିତ ସୁବାସିତ ଜଳ କୁ ଶ୍ରୀଜୀଉଙ୍କୁ ସ୍ନାନ କରାଯାଇଥିଲା।ଶ୍ରୀ ବଳଭଦ୍ର ଙ୍କୁ ୩୩ଗରା ପୂର୍ଣ୍ଣ କଳସି, ଶ୍ରୀ ଜଗନ୍ନାଥଙ୍କୁ ୩୫ପୂର୍ଣ୍ଣ କଳସି, ଦେବୀ ସୁଭଦ୍ରା ଙ୍କୁ ୨୨ଗରା ପୂର୍ଣ୍ଣ କଳସି ଓ ଶ୍ରୀ ସୁଦର୍ଶନଙ୍କୁ ୧୮ଗରା ପୂର୍ଣ କଳସି  ସୁବାସିତ ଜଳରେ ସ୍ନାନ କରାଇଥିଲେ। ଏ ସମସ୍ତ ପୂଜା କାର୍ଯ୍ୟ ରେ ପଣ୍ଡିତ ବିଶେଶ୍ୱର ପାଢ଼ୀ ,ଗୁଣାକର ପଣ୍ଡା ତୁଳାଇଥିବାବେଳେ ଯଜ୍ଞ କାର୍ଯ୍ୟ ଦେବାର୍ଚ୍ଚନ ଦାଶ ତୁଳାଇଥିଲେ।  ଛେରା ପହଁରା ଗଡ଼ତ୍ୟା ଚମରା ଅମାତ ତୁଳାଇଥିଲେ।ବିଭିନ୍ନ ଗ୍ରାମର ବ୍ରାହ୍ମଣ ସେବାୟତ ଓ ଟ୍ରଷ୍ଟର ସଦସ୍ୟ ଙ୍କ ସହଯୋଗ କ୍ରମେ ସମସ୍ତ ଦେବକାର୍ଯ୍ୟ ସମାପନ ହୋଇଥିଲା ତେବେ କୋଭିଡ଼ କଟକଣା ଯୋଗୁଁ ମହାପ୍ରଭୁଙ୍କ ଏ ଦୁର୍ଲଭ ସ୍ନାନଯାତ୍ରା ଓ ଗଜାନନ ବେଶ ଦର୍ଶନ କରିବାରୁ ଭକ୍ତ ବଞ୍ଚିତ ହୋଇଥିଲେ।