24-Jun-2021

 ବିନିକା (ହିମାଂଶୁ ଶେଖର ପୁଟେଲ) : ବିନିକା ଅଞ୍ଚଳରେ ଧାନବିକ୍ରି ସମସ୍ୟା ନେଇ ଅଚଳାବସ୍ଥା ଲାଗିରହିଛି l ଚାଷୀଙ୍କ ଠାରୁ ଆରମ୍ଭ କରି ବିଭିନ୍ନ ରାଜନୈତିକ ଦଳ ତରଫରୁ ପ୍ରଶାସନ ଠାରେ ଅଭିଯୋଗ ହୋଇଛି l ହେଲେ ସମସ୍ୟା ସମାଧାନ ହୋଇନାହିଁ l ଫଳରେ ଚାଷୀ ଧାନବିକ୍ରି କରି ନ ପାରି ହତାଶ ହୋଇପଡିଛି l ଚାଷୀଙ୍କ ଦୁଃଖକୁ ହୃଦୟଙ୍ଗମ କରି ଗତକାଲି ଠାରୁ ବିନିକା ତହସିଲ ଅଫିସ ସମ୍ଭୂଖରେ ବିନିକା କଂଗ୍ରେସ ଦଳ ତରଫରୁ ବିକ୍ଷୋଭ ପ୍ରଦର୍ଶନ ସହ ଆନ୍ଦୋଳନ ଆରମ୍ଭ ହୋଇଛି l ଆନ୍ଦୋଳନ ଦୁଇଦିନ ପୁରିଥିଲେ ମଧ୍ୟ ପ୍ରଶାସନ କେବଳ ମୋଖିକ ପ୍ରତିଶ୍ରୁତି ଦେଉଥିବାରୁ ଚାଷୀ ଓ କଂଗ୍ରେସ କର୍ମୀ ତାହା ବିଶ୍ୱାସ ନ କରି ଆସନ୍ତାକାଲି ବିନିକା ବନ୍ଦ ଡାକରା ଦେଇଛନ୍ତି l ଏଥିପାଇଁ ଆଜି କଂଗ୍ରେସ କର୍ମୀଙ୍କ ତରଫରୁ ସ୍ଥାନୀୟ ତହସିଲଦାର,ଥାନା ଅଧିକାରୀଙ୍କୁ ଏକ ଦାବିପତ୍ର ପ୍ରଦାନ କରି ଡାକବାଜି ଯନ୍ତ୍ର ସହାୟତାରେ ଗାଡି ମାଧ୍ୟମରେ ସହର ବାସୀଙ୍କ ଅବଗତି ଓ ସମସ୍ତ ଚାଷୀ ସହଯୋଗ ପାଇଁ ପ୍ରଚାର କରାଯାଇଛି l ଯଦି ଏହା ସତ୍ତେବି ଚାଷୀଙ୍କ ସମସ୍ୟା ସମାଧାନ ନ ହୁଏ ତେବେ ଆଗାମୀ ଦିନରେ କଂଗ୍ରେସ ତରଫରୁ ବଡ଼ଭାରି ଆନ୍ଦୋଳନ କରାଯିବ ବୋଲି ଚେତାବନୀ ଦିଆ ଯାଇଛି l ଆଜି ଧାରଣାର ଦ୍ବିତୀୟ ଦିନରେ ସୁବର୍ଣ୍ଣପୁର ପୋଲିସ ଡିଏସପି ଉତ୍କଳ କେଶରୀ ଦାଶ,ତହସିଲଦାର ଅଲେଖ ଘୂଟା,ଯୋଗାଣ ବିଭାଗ ଅଧିକାରୀ ଆନ୍ଦୋଳନକାରୀଙ୍କ ପାଖକୁ ପହଞ୍ଚି ଆଲୋଚନା କରିଥିଲେ ହେଁ ତାହା ବିଫଳ ହୋଇଥିଲା l ଆଜି ଦ୍ବିତୀୟ ଦିନର ଧାରଣାରେ ବହୁ ଚାଷୀ ସାମିଲ ହୋଇଥିବା ବେଳେ କଂଗ୍ରେସ ତରଫରୁ ବ୍ଲକ ସଭାପତି ରବିନ୍ଦ୍ର କୁମାର ହୋତା,ବରିଷ୍ଠ କଂଗ୍ରେସ ନେତା ରାଘବ ଦାସ,ନରେନ୍ଦ୍ର ପଣ୍ଡା,ପ୍ରଦୀପ ସେଠୀ,ନରେନ୍ଦ୍ର ସାହୁ,ଗୋବିନ୍ଦା ଝାଙ୍କର,ସୁମନ୍ତ ସାହୁ,ସୁଧାଂଶୁ ପଣ୍ଡା,ବିଜୟ ଭୋଇ,ସପନେଶ୍ୱର ପୃଷ୍ଟିଙ୍କ ସହ ବହୁ କଂଗ୍ରେସ ନେତା ସାମିଲ ଥିଲେ l