23-Jun-2021

ଯାଜପୁର (ସୁଶାନ୍ତ କୁମାର ଖଟୁଆ): ଡାକବିଭାଗ ସାଧାରଣରେ ଏକ ବିଶ୍ୱସ୍ଥ ସଂସ୍ଥାଭାବେ ପରିଚିତ ହୋଇଥିଲେ ମଧ୍ୟ ବିଭିନ୍ନ ସମୟରେ ଡାକଘରଗୁଡିକରେ ନାନାଦି ସମସ୍ୟା ଉପୁଜୁଥିବାର ଅଭିଯୋଗ ହେଉଛି ।ଫଳସ୍ୱରୂପ ଡାକଘର ଉପରୁ ଗ୍ରାହକ ମାନଙ୍କର ଆସ୍ଥା କ୍ରମଶଃ ତୁଟିଯିବାରେ ଲାଗିଛି ।ଡାକବିଭାଗୀୟ ବିବିଧ ସେଵା ସହଜ ଓ ସୁବିଧାରେ ଉପଲବ୍ଧ କରାଯିବା ନିମିତ୍ତ କଟକ ଉତ୍ତର ଡାକମଣ୍ଡଳ ଅଧୀନ ଜେନାପୁର ଉପଡାକଘରେ କିଛି ମାସ ତଳେ  କୋର ବ୍ୟାଙ୍କିଙ୍ଗ ସିଷ୍ଟମର ବ୍ୟବସ୍ଥା କରାଯାଇଥିଲା ।ଆଶା ଥିଲା ଉନ୍ନତମାନର  ସମସ୍ତ ସେବା ପାଇବେ ଗ୍ରାହକମାନେ ।କିନ୍ତୁ ଆଶା,ଆଶାରେ ହିଁ ରହିଗଲା ।ସୂଚନା ଅଧିକାର ଆଇନ ବଳରେ ତଥ୍ୟ ପାଇବାକୁ ହେଲେ ଆଇପିଓର ନିହାତି ଆବଶ୍ୟକ ରହିଛି ।କିନ୍ତୁ ସେଗୁଡିକ ଉକ୍ତ ଡାକଘରେ ମାସ ମାସ ଧରି ମିଳୁ ନ ଥିବାରୁ ଗ୍ରାହକ ମାନେ ନାହିଁ ନ ଥିବା ସମସ୍ୟାର ସମ୍ମୁଖୀନ ହୋଇଆସୁଛନ୍ତି ।ଏହା ଅଧୀନରେ  ସାଧାରଣତଃ ୧୨ଟି  ଶାଖା ଡାକଘର ନିର୍ଭର କରିଥାଏ ।ତେଣୁ ୧୦ରୁ ଊର୍ଦ୍ଧ୍ୱ ପଂଚାୟତର ଲୋକେ ଉନ୍ନତମାନର ସେବା ପାଇଁ ଉକ୍ତ ଡାକଘର ଉପରେ ଭରସା ରଖୁଥିବାବେଳେ ଏଠାକାର ଅବ୍ୟବସ୍ଥା ଗ୍ରାହକମାନଙ୍କୁ ସର୍ବଦା ନିରାଶ କରୁଥିବା ପରିଲକ୍ଷିତ ହୋଇଛି ।ଏଥିପ୍ରତି ବିଭାଗୀୟ ଉଚ୍ଚ କର୍ତ୍ତୃପକ୍ଷ ସ୍ୱତନ୍ତ୍ର ଦୃଷ୍ଟି ଦେଇ ଅବିଳମ୍ବେ ଆଇପିଓ ଏବଂ ଅନ୍ୟାନ୍ୟ ସେବାର ସୁବ୍ୟବସ୍ଥା କରିବାକୁ ଗ୍ରାହକମାନେ ଦୃଢ ଦାବି କରିଛନ୍ତି ।