23-Jun-2021

କଣ୍ଟାବାଞ୍ଜି (ଆନନ୍ଦ କୁମାର ମୋଟେ): ବଲାଙ୍ଗିର ଜିଲ୍ଲା କଂଟାବାଞ୍ଜି ୱାର୍ଡ ନମ୍ବର ୩ରେ ଥିବା ସରକାରି ବାଳିକା ସ୍କୁଲ ପଛ ପଟରେ ଥିବା ସର୍ବ ସାଧାରଣଙ୍କ ଯିବା ଆସିବା ରାସ୍ତା ବେଆଇନ ଭାବେ ଜବର ଦଖଲ ହୋଇଥିବା ଅଭିଯୋଗ ହେଉଛି । ଏନେଇ ଆଜି ସ୍ଥାନିୟ ହେମାଲ ଭବନ ଠାରେ ସମାଜସେବୀ ଶେଷଦେବ ପୁଟେଲଙ୍କ ପକ୍ଷରୁ ଏକ ସାମ୍ବାଦିକ ସମ୍ମିଳନି ଅନୁଷ୍ଠିତ ହୋଇଥିଲା । ଅଭିଯୋଗ ଅନୁସାରେ କଂଟାବାଞ୍ଜିର ସୋହିଲ ଖାଁ ନାମକ ବ୍ୟକ୍ତି ସର୍ବ ସାଧାରଣଙ୍କ ଯିବା ଆସିବା ରାସ୍ତା ଦୀର୍ଘ ଦିନରୁ ଜବରଦଖଲ କରିଛନ୍ତି । ଯାହା ଦ୍ୱାରା ସେହି ରାସ୍ତାରେ ଲୋକଙ୍କୁ ଯିବା ଆସିବାରେ ଅସୁବିଧାର ସମ୍ମୁଖୀନ ହେବାକୁ ପଡୁଛି । ୨୦୧୬ ରୁ ପ୍ରଶାସନ ପାଖରେ ଏନେଇ ଅଭିଯୋଗ କରାଯାଇଥିବା ବେଳେ ଏଯାଏ ପ୍ରଶାସନ କୌଣସି କାର୍ଯ୍ୟନୁଷ୍ଠାନ ନେଇ ନାହାନ୍ତି । ସ୍ଥାନୀୟ ତହସିଲଦାର ଅଶୋକ କୁମାର ମାଝି, ଏନଏସି କାର୍ଯ୍ୟନିର୍ବାହୀ ଅଧିକାରି ସମ୍ମି ଜୟଶ୍ରୀ ରେଡ୍ଡି କାର୍ଯ୍ୟନୁଷ୍ଠାନ ନିଆଯିବ ବୋଲି ପ୍ରତିଶୃତି ଦେଇ ଆସୁଛନ୍ତି । ହେଲେ କାର୍ଯ୍ୟନୁଷ୍ଠାନ ଶୁନ୍ୟ । ଏକ ସପ୍ତାହ ମଧ୍ୟରେ ପ୍ରଶାସନ କୌଣସି କାର୍ଯ୍ୟନୁଷ୍ଠାନ ନନେଲେ  କଂଟାବାଞ୍ଜି ଏନଏସି କାର୍ଯ୍ୟନିର୍ବାହୀ ଅଧିକାରୀ ଙ୍କ କାର୍ଯ୍ୟାଳୟ ସମ୍ମୁଖରେ  ଜନସାଧାରଣଙ୍କୁ ନେଇ ଧାରଣାରେ ବସିବାକୁ ବାଧ୍ୟ ହେବେ ବୋଲି ସମାଜସେବୀ ଶେଷଦେବ ପୁଟେଲ ସାମ୍ବାଦିକ ସମ୍ମିଳନିରେ ସୁଚନା ଦେଇଛନ୍ତି ।