21-Jun-2021

କଳାହାଣ୍ଡି (ପ୍ରେରଣା ଖବର) : ପ୍ରସିଦ୍ଧ ପୋଲାଣ୍ଡ କବି ଜିଜନିଉ ମାଇରୋସ୍ଲୋୱସ୍କି ପୋଲାଣ୍ଡର ପୋଲିଶ ଭାଷାରେ କବି ଭବାନୀ ଶଙ୍କର ନିଆଲଙ୍କର କବିତା ଅନୁଦିତ କରିଛନ୍ତି l ସେ ପୋଲାଣ୍ଡର ବିଖ୍ୟାତ କବି ହେବା ସଙ୍ଗେ ସଙ୍ଗେ ୧୫ଟି ପୁସ୍ତକର ରଚୟିତା ଏବଂ ବିଶ୍ୱର ମହତ୍ୱପୂର୍ଣ୍ଣ ସ୍ଥାନରୁ ପୁରସ୍କୃତ ହୋଇଥିବା ଜଣେ ଅମାୟିକ ବ୍ୟକ୍ତି l ସେ ଏକାଧାରରେ ଜଣେ କବି, ଲେଖକ,ଏବଂ ଇତିହାସକାର ଭାବେ ସୁପରିଚିତ l ବିଶ୍ୱର ବିଭିନ୍ନ ଭାଷାରେ ତାଙ୍କ କୃତି ଅନୁବାଦିତ ହୋଇସାରିଛି l ସେ କବି ଶ୍ରୀ ନିଆଲଙ୍କ " ପୃଥିବୀର ଜଣେ ସୁନ୍ଦର ପୁରୁଷ ବୁଡ଼ିଯାଏ ଏକ କାକର ବିନ୍ଦୁରେ " ଶୀର୍ଷକ କବିତାଟିକୁ ପୋଲିସ ଭାଷାରେ ଅନୁଦିତ କରିଛନ୍ତି  l ଦୀର୍ଘ ତିନି ଦଶନ୍ଧିରୁ ଉଭୟ ହିନ୍ଦୀ ଓ ଓଡ଼ିଆ କବିତାରେ ସକ୍ରିୟ ରହିବା ସହ ଏକାଧିକ ପୁସ୍ତକର ଲେଖକ ତଥା ମହୁରି ପତ୍ରିକାର ମୁଖ୍ୟ ସମ୍ପାଦକ କବି ଭବାନୀଶଙ୍କର ନିଆଲଙ୍କ କବିତା କ୍ରମାଗତ ଭାବେ ଇଂରାଜୀ, ଇଟାଲୀ, ସର୍ବିଆ, ରୁଷ, ଚୀନ ପରେ ଫ୍ରାନ୍ସ ଭାଷାରେ ଅନୂଦିତ ହେବା ଏକ ଗୌରବର ବିଷୟ । ବିଶ୍ୱର ବିଭିନ୍ନ ଭାଷାରେ କବି ଶ୍ରୀ ନିଆଲଙ୍କ କବିତା ଅନୁବାଦ ନିଶ୍ଚୟ ଓଡ଼ିଆ କବିତା ଏବଂ ସାହିତ୍ୟର ଅନ୍ତଃରାଷ୍ଟ୍ରୀୟ ସାହିତ୍ୟ ପ୍ଲାଟଫର୍ମ ରେ ସମ୍ମାନ ବୃଦ୍ଧି ଘଟାଇଛି l ଉକ୍ତ କବିତା ଗୁଡିକୁ ଇଂରାଜୀରେ ଅଧ୍ୟାପକ ବଙ୍କିମ ମୁଣ୍ଡ ଏବଂ ଗୋବିନ୍ଦ ସାହୁ,ଇଟାଲୀରେ କବି ଇମାନୁଏଲା ରିଜୋ,ସର୍ବିଆରେ ପ୍ରଖ୍ୟାତ କବି ତଥା ଅଧ୍ୟାପିକା ସୋଭା ସୋଭକା ସୋଭିକ, ଚୀନ ଭାଷାରେ କବି ଲାଉ ଫୁ ଏବଂ ରୁଷ ଭାଷାରେ ପ୍ରଖ୍ୟାତ ରୁଷ ଲେଖିକା ଏଲିନା ଡାନିସିନା କରିଥିବା ବେଳେ ଫ୍ରାନ୍ସ ଭାଷାରେ ଫ୍ରାନ୍ସସିୟ ପ୍ରସିଦ୍ଧ କବି ତଥା ଚୀନ ଭାଷା ଓ ସଂସ୍କୃତିର ବିଦ୍ୱାନ ଏଲିଜାବେଥ ଗିଓଂ ପ୍ଲେନାଟୋ ଅନୁବାଦ କରିଛନ୍ତି । କବିଙ୍କ ଏହି ସଫଳତାରେ ରାଜ୍ୟ ଓ ରାଜ୍ୟ ବାହାରେ ଖୁସିର ଲହରୀ ଖେଳିଯାଇଛି ।