13-Jun-2021

(ଭଗବାନ ପାଢୀଙ୍କ ରିପୋର୍ଟ): ଗଣ୍ଡା ଗଣ୍ଡା ଅଭିଯୋଗ । କାହାକୁ ଗାଳିମନ୍ଦ ତ’ ପୁଣି କାହାକୁ ମାଡ଼ । ଥାନାରେ ଯୋଗ ଦେବା ପରଠୁ ହିଁ ଚଳାଇଛନ୍ତି ଏକଚାଟିଆ ଶାସନ । ଏଭଳି ସଂଗିନ୍ ଅଭିଯୋଗ ଉଠିଛି ରାଜଧାନୀର ହାଇସିକ୍ୟୁରିଟି ଜୋନରେ ଥିବା ଚନ୍ଦକା ଥାନା ଅଧିକାରୀ ଦେବେନ୍ଦ୍ର ବିଶ୍ୱାଳଙ୍କ ବିରୋଧରେ । ଜମିଜମା ମାମଲାରେ ଅଧିକ ମୁଣ୍ଡ ପୁରାଇ ଅନେକ ସାଧାରଣ ଲୋକଙ୍କୁ ନିର୍ଯାତନା ଦେଉଥିବା ଖୋଦ୍ ସ୍ଥାନୀୟ ବିଧାୟକ ପ୍ରକାଶ କରିଛନ୍ତି । ହେଲେ ର୍ଦୁଭାଗ୍ୟ ଏଯାବତ୍ କିନ୍ତୁ କୌଣସି କାର୍ଯ୍ୟାନୁଷ୍ଠାନ ନନିଆଯିବା ଏବେ ଅନେକ ପ୍ରଶ୍ନ ଠିଆ କରିଛି । ୧୮୬୮ ମସିହାରେ ସ୍ଥାପିତ ହୋଇଥିଲା ଚନ୍ଦକା ଥାନା । ୨୦୦୮ରେ ଏହାକୁ କମିଶନରେଟ ପୁଲିସରେ ଅର୍ନ୍ତଭୁକ୍ତ କରାଯାଇଥିଲା । ତେବେ ଲକ୍ଷ ଥିଲା ଲୋକଙ୍କୁ ସେବା ଓ ସୁରକ୍ଷା ଦେବା । ହେଲେ ବିଗତ ୪ମାସର ରେକର୍ଡକୁ ଦେଖିଲେ ଥାନା ଅଧିକାରୀଙ୍କ ନାମରେ ଗଣ୍ଡାଗଣ୍ଡା ଅଭିଯୋଗର ଫର୍ଦ୍ଦ ଲମ୍ବିବାରେ ଲାଗିଛି । ସେ ଡିସିପି ହୁଅନ୍ତୁ ଅବା ସିପି ବା ଜିଲ୍ଲାପାଳ କି’ ମୁଖ୍ୟମନ୍ତ୍ରୀ । ସମସ୍ତଙ୍କ ପାଖକୁ ଲୋକେ ଅଭିଯୋଗ ଫର୍ଦ୍ଦ ପଠାଇ ନୟାନ୍ତ ହେଲେଣି । କିନ୍ତୁ ତଦନ୍ତ ଘର ଶୂନ । ସବୁଠୁ ବଡ଼ କଥା ହେଉଛି ଥାନା ଅଧିକାରୀଙ୍କ ବିରୋଧରେ ଲମ୍ବା ଅଭିଯୋଗ ଉଠିବା ପରେ ଏବେ କିଛି ଗଣମାଧ୍ୟମକୁ ଢ଼ାଲ କରି ଏବେ ଖୋଦ୍ ଆଇଆଇସି ଏବେ ନିଜେ ଗେମପ୍ଲାନ୍ ରଚିଛନ୍ତି । ନିଜର ଭଲ ଗୁଣ ପ୍ରଚାର ଓ ପ୍ରସାର କରିବାକୁ ଅଂଟା ଭିଡିଛନ୍ତି । ଖାସ ଏଥିପାଇଁ ଏବେ କେତେକ ଗଣମାଧ୍ୟମ ଥାନା ଅଧିକାରୀଙ୍କ ଭୁରି ଭୁରି ପ୍ରଶଂସା କରୁଛନ୍ତି । ଯାହା ଅନେକ ସନ୍ଦେହ ସୃଷ୍ଟି କରୁଛି । ଆଗରୁ ଚୁପ ଥିବା ଏ ଗଣମାଧ୍ୟମମାନେ ଅଚାନକ୍ ଥାନା ଅଧିକାରୀଙ୍କ ଭଲ ଗୁଣ ଛାପି ପ୍ରଚାର କରିବା ପଛର ଉଦ୍ଦେଶ୍ୟ କ’ଣ ହୋଇପାରେ? ଏହି ପ୍ରଶ୍ନ ଏବେ ସବୁଠି ଉଙ୍କି ମାରୁଛି । କେବଳ ଏତିକି ନୁହେଁ ଲୋକଙ୍କ ସମସ୍ୟାକୁ ନେଇ ଓ ବିଧାୟକଙ୍କ ପ୍ରତିକ୍ରୀୟାକୁ ନେଇ ନ୍ୟୁଜ୍ ୮ ଓଡିଆ ଖବର ପ୍ରକାଶ କରିବା ପରେ ଅଚାନକ୍ ଏ ଗଣମାଧ୍ୟମ ମାନଙ୍କ ଦିନ ହଜିଲା କେମିତି? କୁହାଯାଉଛି ନିଜ ପ୍ରଚାର ଓ ପ୍ରସାର କରି ବଡ଼ବଡ଼ିଆଙ୍କ ପାଖରେ ଭଲେଇ ହେବା ଲାଗି ପୂରା ଖେଳ କରିଛନ୍ତି ଥାନା ବାବୁ । କେତେକ ଦଲାଲଙ୍କୁ ଧରି ଗାଦି ସୁରକ୍ଷିତ ରଖିବା ଲାଗି ମିଡିଆକୁ ମୋହରା ବନାଇ ବାହାବା ସାଉଁଟିବାକୁ ଚେଷ୍ଟା କରାଯାଇଛି । ଏ ପ୍ରତି ବିଭାଗୀୟ ଅଧିକାରୀ ଧ୍ୟାନ ଦେବା ସହ ପୂରା ଘଟଣାର ଖୋଳତାଡ କଲେ ସେ କଥା ପଦାକୁ ଆସିବ ଯାହା ଉପରେ ରଂଗ ଲଗାଇବାକୁ ଚେଷ୍ଟା କରିଛନ୍ତି ଦେବେନ୍ଦ୍ର ବାବୁ । ନିୟମ କହୁଛି କମିଶନରେଟ ପୁଲିସରେ ଡିସିପି ଓ ସିପି ବାଇଟ୍ ଦେବାକୁ ଅନୁମତି ଥିବା ବେଳେ ନିଜ ଥାନା ଓ ନିଜ ପ୍ରଚାର ଲାଗି ଖୋଦ ଦେବେନ୍ଦ୍୍ର ବାବୁ ମିଡିଆରେ ମୁହଁ ଫୁଟାଣି ମାରିବା ପ୍ରମାଣ କରୁଛି ଡାଲ ମେ କୁଛୁ କାଲା ହେ । ଏ କାଲା କ’ଣ ତାହା ସିପି ଖୋଜିବେ ବୋଲି ଏବେ ସାଧାରଣ ଲୋକ ଭରସା ରଖିଛନ୍ତି ।