11-Jun-2021

ବିନିକା (ହିମାଂଶୁ ଶେଖର ପୁଟେଲ): ସୁବର୍ଣ୍ଣପୁର ଜିଲ୍ଲା ବିନିକା ଅଞ୍ଚଳରେ ଚଳିତ ରବି ରୁତୁରେ ଧାନକିଣା ପ୍ରକ୍ରିୟା ଓ ଟୋକନ ସମସ୍ୟାରେ ଅବ୍ୟବସ୍ଥା ଯୋଗୁଁ ଚାଷୀମାନେ ତାଙ୍କର ଧାନବିକ୍ରି କରି ନ ପାରି ହଇରାଣର ସମ୍ମୁଖୀନ ହୋଇଥିବା ଅଭିଯୋଗ ହୋଇଛି l  ଅନ୍ୟପଟେ ଅଦିନିଆ ବର୍ଷା ଚାଷୀର ଜୀବନ ଜୀବିକା ଉପରେ କରୋଡା ମାଡ଼ ସଦୃଶ ହୋଇଛି l ଏଭଳି ପରିସ୍ଥିତିରେ କ୍ଷତଗ୍ରସ୍ତ ଚାଷୀଙ୍କୁ ସହଯୋଗ କରିବା ପାଇଁ ଓ ତାଙ୍କର ଧାନବିକ୍ରୀ ସମସ୍ୟାର ସମାଧାନ ଲାଗି ବିନିକା ଅଞ୍ଚଳର କେତେକ ସ୍ବେଚ୍ଛାସେବୀ ଯୁବକ ଅଣ୍ଟା ଭିଡ଼ି ଆଗେଇ ଆସିଛନ୍ତି l ଯୁବ ଆଇନଜୀବୀ ପ୍ରଶାନ୍ତ ଚନ୍ଦ୍ର ଦଣ୍ଡସନା, ଯୁବନେତା ସମ୍ବିତ ନେପାକ, ଧର୍ମେନ୍ଦ୍ର ସାହୁ, ଶମ୍ଭୁ ପ୍ରସାଦ ହୋତାଙ୍କ ନେତୃତ୍ୱରେ ବହୁ ଚାଷୀ ସରକାର କରିଥିବା ଧାନବୀକ୍ରିର ପରିବର୍ତନ ପାଇଁ ୪ଦଫା ସମ୍ବଳିତ ଦାବିପତ୍ର ବିନିକା ତହସିଲଦାରଙ୍କ ଜରିଆରେ ମାନ୍ୟବର ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପ୍ରଦାନ କରିଛନ୍ତି l ସେମାନେ ଦାବିପତ୍ରରେ ଉଲ୍ଲେଖ କରିଛନ୍ତି ଯେ ବର୍ତ୍ତମାନ ପରିସ୍ଥିତିରେ ଚାଷୀଙ୍କ ଉଦ୍ଦିଷ୍ଟ ଧାନଵିକ୍ରି ନିୟମ ଚାଷୀ ପ୍ରତି ଅନ୍ୟାୟ ସଦୃଶ l

 ତେଣୁ ଚାଷୀ ପାଇଥିବା ଟୋକନ ଧାନମଣ୍ଡି ଖୋଲା ଯିବା ପର୍ଯ୍ୟନ୍ତ କାର୍ଯ୍ୟକାରୀ କରାଯାଉ, ରଦ୍ଦ ହୋଇଥିବା ଟୋକନ ଗୁଡ଼ିକୁ ରିଟୋକନ ଦେଇ ପୁନଃ ମଣ୍ଡି ଖୋଲିବା ପର୍ଯ୍ୟନ୍ତ କାର୍ଯ୍ୟକାରୀ ହେଉ, ଧାନ ବିକ୍ରୟ ହେବାର ୪୮ଘଣ୍ଟା ମଧ୍ୟରେ ଚାଷୀର ଜମା ଖାତାରେ ତାର ନିର୍ଦ୍ଧାରିତ ପ୍ରାପ୍ୟ ଜମା କରାଯାଉ, ଧାନକିଣାକୁ ତ୍ଵରାନିତ କରାଯାଉ ଆଦି ପ୍ରମୁଖ ଦାବି ଗୁଡ଼ିକ ୩ଦିନ ମଧ୍ୟରେ ଯଦି ସରକାର  ପୂରଣ ନ କରନ୍ତି ତେବେ ବାଧ୍ୟ ହୋଇ ବିନିକାର ସମସ୍ତ ସରକାରୀ କାର୍ଯ୍ୟାଳୟକୁ ତାଲା ମାରି ଅଚଳ କରାଯିବ ବୋଲି ଚାଷୀମାନେ ଚେତାବନୀ ଦେଇଛନ୍ତି l