24-Oct-2020

କଣ୍ଟାମାଳ,(ବିଶାଖା ମଲିକ) ବୌଦ୍ଧ ଜିଲ୍ଲା କଣ୍ଟାମାଳ ତହସିଲ ଅଧିନ ବରଗାଁ ପଞ୍ଚାୟତର ମଲିକୁଦ ଗ୍ରାମରେ ସରକାରୀ ଜମି ଓ ମନ୍ଦିର ଜମିକୁ ଜବରଦଖଲ  ଅଭିଯୋଗ କରି ଚାଷଜମିରୁ ଧାନ  କାଟିଲେ ଗ୍ରାମବାସୀ । ସୂଚନା ଅନୁସାରେ ମଲିକୁଦ ମୌଜାର ଶ୍ରୀଭଗବତ ଗୋସ୍ବାମୀ ଠାକୁରଙ୍କ ନାମରେ  ଖତିୟାନ ନଂ.୨୬ ରେ ଥିବା ୨୫.୮୯ ଏକର ଜମିର କିଛି ଅଂଶ ଏବଂ ଗୋଚର ଜମିକୁ ଜବରଦଖଲ କରି ଧାନଚାଷ କରିଥିବା ନେଇ ଗ୍ରାମର ଲକ୍ଷେଶ୍ବର ଦୀପଙ୍କ ନାମରେ ବରଗାଁ ଆରଆଇ, କଣ୍ଟାମାଳ ତହସିଲ ଏବଂ କଣ୍ଟାମାଳ ଥାନାରେ ମଲିକୁଦ ଗ୍ରାମବାସୀ ଅଭିଯୋଗ କରିଥିଲା । ଜମି ଚିହ୍ନଟ କରାଯିବା ପୂର୍ବରୁ ଧାନ ଅମଳ ନକରିବାକୁ ଲକ୍ଷେଶ୍ବରଙ୍କୁ କୁହାଯାଇଥିଲା । ନିର୍ଦ୍ଦେଶକୁ ଅବମାନନା କରି ଗୁରୁବାର ଲକ୍ଷେଶ୍ବର ଜମିରୁ ଧାନ କାଟିବା ଆରମ୍ଭ କରିଥିଲେ । ଏବିଷୟରେ ମଲିକୁଦ ଗ୍ରାମବାସୀ କଣ୍ଟାମାଳ ଥାନା ଓ ବରଗାଁ ଆରଆଇକୁ ଖବର ଦେଇଥିଲେ । ଥାନାଧିକାରୀ ଅଶ୍ବିନୀ ଭିତ୍ରିଆ ଏବଂ ଆରଆଇ ବିଜୟ କୁମାର ପତିଙ୍କ ଉପସ୍ଥିତିରେ ଶୁକ୍ରବାର ଜମି ଚିହ୍ନଟ କରାଯାଇଥିଲା ।  ଧାନଚାଷ ହୋଇଥିବା ଜମି ଖେଳ ପଡିଆ ନାମରେ ପ୍ଲଟ ନଂ.୧୭୧ ଏବଂ ଗୋଚର ଜମି ନାମରେ ପ୍ଲଟ ନଂ. ୧୭୨ ଓ ୧୭୩ ରହିଛି ଏବଂ ବାକିଜମି ଠାକୁରଙ୍କ ନାମରେ ଥିବା ବେଳେ ମୋଟ ୧.୫୫ ଏକର ଜମି ଜବରଦଖଲ କରିଥିବା ଜଣାପଡିଥିଲା । ଫଳରେ ଗ୍ରାମବାସୀ ସବୁତକ ଧାନ କାଟି ଗାଁକୁ ବୋହି ନେଇଥିବା ଜଣାଯାଇଛି । ଲକ୍ଷେଶ୍ବରଙ୍କ ନାମରେ ୩.୧୯ ଏକର ଚାଷଜମି ଏବଂ ଏ.୦.୧୦ଡିସିମିଲ୍ ଘରବାରି ରହିଛି । କିନ୍ତୁ କ'ଣପାଇଁ ଜମି ଜବରଦଖଲ କରୁଛନ୍ତି ତାକୁ ନେଇ ଗ୍ରାମବାସୀ ଅଭିଯୋଗ ଆଣିଛନ୍ତି ଏବଂ ପ୍ରଶାସନ ପକ୍ଷରୁ ଉକ୍ତ ଜମିର ଉପଯୁକ୍ତ ବିଚାର କରା ନଗଲେ ଆଗାମୀ ଦିନରେ ଆନ୍ଦୋଳନ କରିବାକୁ ଜଣାଇଛନ୍ତି ।  ଏହି ବିଷୟରେ ତହସିଲଦାରଙ୍କ ପ୍ରତିକ୍ରିୟା ମିଳି ପାରିନାହିଁ ।