04-Jun-2021

ଭୁବନେଶ୍ୱର(ଶୁଭାଶିଷ  ନାୟକ): ଭୁବନେଶ୍ୱରରେ ୧୮-୪୪ ବର୍ଷ ବୟସର ଲୋକଙ୍କ ପାଇଁ ଦ୍ୱିତୀୟ ଡୋଜ୍ କୋଭାକ୍ସିନ ଟିକାର ଅଭାବ ରହିଛି  । ଏନେଇ ଗୁରୁବାର ଭୁବନେଶ୍ୱର ମ୍ୟୁନିସିପାଲିଟି କର୍ପୋରେସନ (ବିଏମସି) ସ୍ୱୀକାର କରିଛି । ଗଣମାଧ୍ୟମକୁ ସୂଚନା ଦେଇ ବିଏମସି କମିଶନର ସଞ୍ଜୟ କୁମାର ସିଂ କହିଛନ୍ତି ଯେ ସେମାନଙ୍କ ପାଖରେ ୪୫ ବର୍ଷ ଏବଂ ତଦୁର୍ଦ୍ଧ୍ୱ ବୟସ୍କଙ୍କ ପାଇଁ ପର୍ଯ୍ୟାପ୍ତ ପରିମାଣର ଟିକା ଅଛି । କିନ୍ତୁ ୧୮ ରୁ ୪୪ ବର୍ଷ ବୟସ୍କଙ୍କ ପାଇଁ ଟିକା ଅଭାବ ରହିଛି ।
ସୂଚନା ଥାଉ କି, ବିଏମସି ପକ୍ଷରୁ ଚଳିତ ବର୍ଷ ମେ ୩ ତାରିଖରୁ ୧୮-୪୪ ବୟସ୍କ ବର୍ଗଙ୍କ ପାଇଁ ଟୀକାକରଣ ଡ୍ରାଇଭ୍ ଆରମ୍ଭ ହୋଇଥିଲା । ମେ ୩ ତାରିଖରୁ ୨୮ ତାରିଖ ମଧ୍ୟରେ ୧୮-୪୪ ବର୍ଷ ବର୍ଗର ମୋଟ ୧ ଲକ୍ଷ ୫୧ ହଜାର ୪୨୬ ଜଣ ପ୍ରଥମ ଡୋଜ୍ ନେଇଛନ୍ତି  ।  ଏମାନେ ଜୁନ ମାସରେ ପୁଣି ଦ୍ୱିତୀୟ ଡୋଜ ନେବାକୁ ଥିବାବେଳେ ବର୍ତ୍ତମାନ ଯୁବବର୍ଗ ହିତାଧୀକାରୀଙ୍କୁ ଦ୍ୱିତୀୟ ଡୋଜ ନେବାରେ କୌଣସି ଅସୁବିଧା ହେବ ନାହିଁ ବୋଲି ବିଏମସି କର୍ତ୍ତୃପକ୍ଷ ପୂର୍ବରୁ କହିଥିଲେ ।
ଅନ୍ୟପଟେ ଭୁବନେଶ୍ୱରରେ ବିଶେଷ କରି ୧୮ ରୁ ୪୪ ବର୍ଗର ହିତାଧିକାରୀ ଯେଉଁମାନେ ପ୍ରଥମ ଡୋଜ ଟିକା ନେଇନାହାନ୍ତି ସେମାନଙ୍କ ପାଇଁ ଟିକା ସଙ୍କଟ ଅଭାବ ପରିଲଖିତ ହୋଇଥିଲା । ତେବେ କେବଳ ପ୍ରଥମ ଡେ଼ାଜ୍ ନୁହେଁ ବରଂ ଦ୍ୱିତୀୟ ଡେ଼ାଜ୍ ପ୍ରଦାନରେ ମଧ୍ୟ ସମସ୍ୟା ଦେଖାଦେଇଛି । ପ୍ରଥମ ଡେ଼ାଜ୍ ଗ୍ରହଣ ପରେ ଦ୍ୱିତୀୟ ଡେ଼ାଜ୍ ପାଇଁ ନିର୍ଦ୍ଧାରିତ ସମୟରେ ଟିକାକରଣ ହୋଇପାରିନାହିଁ ।