29-May-2021

କଣ୍ଟାମାଳ ଅକୃର ସାହୁ): ଗତକାଲି ସକାଳେ ପ୍ରେସ୍ ଓ ଦୂରଦର୍ଶନ ଲେଖା ଥିବା ସହ ସୁନ୍ଦରଗଡ ଜିଲ୍ଲା ପ୍ରଶାସନର ଗାଡି ପାସ୍ ଲାଗିଥିବା ଗଂଜେଇ ଭର୍ତ୍ତି ଗାଡିକୁ କଣ୍ଟାମାଲ ପୋଲିସ୍ ଜବତ୍ କରିଥିଲା l ଗାଡିର ଡ୍ରାଇଭର ତଥା ଚାଲାଣକାରୀକୁ ମଧ୍ୟ ଥାନାକୁ ଆଣି ଅଟକ ରଖିଥିଲା l ଅପରାନ୍ହ ପ୍ରାୟ 2 ଘଣ୍ଟା ସମୟରେ ଗଂଜେଇ ଚାଲାଣକାରୀ ହାତକଡ଼ିରୁ ହାତ ଗଳାଇ ଥାନାରୁ ଚମ୍ପଟ୍ ମାରିଥିବା କଣ୍ଟାମାଲ ଥାନା ଅଧିକାରୀ ଅଶ୍ୱିନୀ ଭିତିରିଆ ଆଜି ଗଣମାଧ୍ୟମ ପ୍ରତିନିଧି ମାନଙ୍କୁ କହିଛନ୍ତି l ଗତକାଲି ଆସାମୀ ଫେରାର ମାରିବା ପରେ ପୋଲିସ୍ ତାକୁ ଧରିବା ପାଇଁ ସବୁ ଆଡେ ପଇଁତରା ମାରିଥିଲେ ବି ଫେରାର ଆସାମୀର କୌଣସି ଟେର ପାଇନଥିଲା l ବର୍ତ୍ତମାନ 24 ଘଣ୍ଟାରୁ ଅଧିକ ସମୟ ହୋଇ ଯାଇଥିଲେ ମଧ୍ୟ ପୋଲିସର ହାତ ଖାଲି l କେବଳ ଅନ୍ଧାରରେ ବାଡି ବୁଲାଇବା ସାର ହୋଇଛି | ଆଜି ବିଭିନ୍ନ ସମ୍ବାଦ ପତ୍ର ଓ ବୈଦ୍ୟୁତିକ ଗଣ ମାଧ୍ୟମରେ ଗଂଜେଇ ଜବତ୍ ଓ ଆସାମୀ ଫେରାର ସମ୍ପର୍କରେ ଭିନ୍ନ ଭିନ୍ନ ରିପୋର୍ଟ ପ୍ରକାଶ ପାଇଛି l କିଏ ଲେଖିଛି କଣ୍ଟାମାଲ ଷ୍ଟେଟ୍ ବ୍ୟାଙ୍କ ନିକଟରୁ ଗାଡି ଗଂଜେଇ ଜବତ୍ ହୋଇଛି ତ କିଏ ଘଣ୍ଟାପଡା ତ ଆଉ କିଏ ଡୁମାଲ୍ ପାଲି ନିକଟରୁ ଜବତ୍ ହୋଇଥିବା ଲେଖିଛନ୍ତି l ସେହିପରି ଗାଡିରୁ କେତେ କିଲୋଗ୍ରାମ ଗଂଜେଇ ଧରାଗଲା ତାକୁ ନେଇ ମଧ୍ୟ ଭିନ୍ନ ଭିନ୍ନ ତଥ୍ୟ ପ୍ରକାଶିତ ହୋଇଛି | କିଏ 25 ପାକେଟ୍, କିଏ 20 ପାକେଟ୍ ତ କିଏ 40 ରୁ 50 କିଲୋଗ୍ରାମ ଗଂଜେଇ ଥିବା ପ୍ରକାଶ କରିଛନ୍ତି l ଥାନା ଅଧିକାରୀ ଶ୍ରୀ ଭିତିରିଆ 20 କିଲୋଗ୍ରାମ ଗଂଜେଇ ଥିବା ଆଜି ସୂଚନା ଦେଇଛନ୍ତି l ଜନସାଧାରଣରେ ପ୍ରଶ୍ନ ଉଠୁଛି ଜବତ ଗଂଜେଇ ଓଜନ ଜଣେ ମାଜିଷ୍ଟ୍ରେଟଙ୍କ ଉପସ୍ଥିତରେ ହୋଇଥାଏ କିନ୍ତୁ ଏଠାରେ ପୋଲିସ ତାହା କରିଛି କି ? ପୁର୍ବାନ୍ହରେ ଗାଡି ଓ ଗଂଜେଇ ଜବତ୍ ହୋଇଥିବା ବେଳେ ଅନଲାଇନ ରେ ପୋଲିସ୍ କେଉଁ ସମୟରେ ମାମଲା ରୁଜୁ କରିଛି ? ଏତେ ବଡ ଗାଡ଼ିରେ 20 କିଲୋଗ୍ରାମ ଗଂଜେଇ ଥିଲା ନା ଅଧିକ ଥିଲା ? ଥାନା ଅଧିକାରୀ ଶ୍ରୀ ଭିତିରିଆ ବିଭିନ୍ନ ଗଣମାଧ୍ୟମ ପ୍ରତିନିଧି ମାନଙ୍କୁ ଗତକାଲି ସନ୍ଧ୍ୟାରେ ଘଟଣା ସମ୍ପର୍କରେ କାହିଁକି ଭିନ୍ନ ଭିନ୍ନ ବୟାନ ଦେଉଥିଲେ ? ଜଣେ ଆସାମୀକୁ ହାଜତ ମଧ୍ୟରେ ନ ରଖି ଅତିଥି ଭଳି ବାହାରେ କାହିଁକି ରଖା ଯାଇଥିଲା ?ହାତକଡ଼ିରୁ ଆସାମୀ କିଭଳି ହାତ ଗଳାଇ ପାରିବାରେ ସକ୍ଷମ ହୋଇ ପାରିଲା? ପୋଲିସର ଜାଣତରେ ଏ ସବୁ ଗଡ଼ବଡ଼ ହୋଇ ନାହିଁ ତ ବୋଲି ଜନସାଧାରଣରେ ସନ୍ଦେହ ସୃଷ୍ଟି କରୁଛି | ଆରକ୍ଷୀ ଅଧୀକ୍ଷକ ଏ ଦିଗରେ ତଦନ୍ତ କରାଗଲେ ଆସାମୀ ଫେରାର ମାରିବା ମାମଲାର ସବୁ ଗୁମର ଖୋଲିବ ବୋଲି ଜନସାଧାରଣରେ ଦାବି ହେଉଛି |