20-May-2021

ଲୋଇସିଂହା,(ପ୍ରେରଣା ଖବର) ମେଧାବୀ ଛାତ୍ରୀଛାତ୍ରଙ୍କୁ ପ୍ରୋତ୍ସାହିତ କରିବା ପାଇଁ ରାଜ୍ୟସ୍ତରରେ ବିଭିନ୍ନ ବୃତ୍ତି ପ୍ରଦାନ କରାଯାଉଛି । ହେଲେ ୨୦୧୪-୧୫ ଶିକ୍ଷା ବର୍ଷରୁ ପଞ୍ଚମ ବୃତ୍ତି ପରୀକ୍ଷାରେ ଉତୀନ୍ନ ହୋଇଥିବା  ଜଣେ ଛାତ୍ର ବୃତ୍ତିଟଙ୍କା ପାଇବାରୁ ବଞ୍ଚିତ ରହିଛନ୍ତି । ସେ ହେଲେ ଲୋଇସିଂହା ନିର୍ବାଚନ ମଣ୍ଡଳୀ ଅନ୍ତର୍ଗତ ପୁଇଁତଳା ବ୍ଲକ କୁଟେନପାଲି ଗ୍ରାମର ଛାତ୍ର ପୁରୁଷୋତ୍ତମ ପଧାନ । ବୃତ୍ତି ଟଙ୍କା ପାଇଁ  ଛାତ୍ର ଓ ତାଙ୍କ ଅଭିଭାବକ ବ୍ଲକ ଗୋଷ୍ଠୀ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟକୁ ଦୌଡି ଦୌଡି ନୟାନ୍ତ ହୋଇ ପଡିଥିବା ଅଭିଯୋଗ ହୋଇଛି ।  ଅଭିଯୋଗରୁ ପ୍ରକାଶ ଯେ ବଲାଙ୍ଗୀର ଜିଲା ଲୋଇସିଂହା ନିର୍ବାଚନ ମଣ୍ଡଳୀ ଅନ୍ତର୍ଗତ ପୁଇଁତଳା ବ୍ଲକ ଗୋଷ୍ଠୀ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ଜରୀଆରେ  ଦଶପୁର ସରସ୍ୱତୀ ଶିଶୁ ବିଦ୍ୟା ମନ୍ଦିର ତରଫରୁ ୨୦୧୪-୧୫ ଶିକ୍ଷା ବର୍ଷରେ ଛାତ୍ର ପୁରୁଷୋତ୍ତମ ପଧାନ ପଞ୍ଚମ ବୃତ୍ତି ପରୀକ୍ଷା ଦେଇଥିଲେ । ପରୀକ୍ଷାରେ ସଫଳତା ସହ କୃତକାର୍ଯ୍ୟ ହେବାରୁ ଛାତ୍ର ବୃତ୍ତି ପାଇଁ ମନୋନୀତ ହୋଇଥିଲେ । ସ୍କଲ ତରଫରୁ ଛାତ୍ରଙ୍କ ଯୋଗ୍ୟତା ଅନୁସାରେ କାଗଜପତ୍ର ସତେବେଳେ ବ୍ଲକ ଗୋଷ୍ଠୀ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟରେ ଦାଖଲ କରାଯାଇଥିଲା । ଇତିମଧ୍ୟରେ ୬ ବର୍ଷ ବିତି ଯାଇଥିଲେ ସୁଦ୍ଧା ବୃତ୍ତି ଟଙ୍କା ପାଇବାରୁ ସେ ବଞ୍ଚିତ ରହିଛନ୍ତି । ଏନେଇ ସରସ୍ୱତୀ ଶିଶୁବିଦ୍ୟା ମନ୍ଦିର ପ୍ରଧାନ ଆଚାର୍ଯ୍ୟ ଗତ ଫେବୃୟାରୀ ୧୬ ରେ  ଶିଶୁ ମନ୍ଦିର ପତ୍ର ସଂଖ୍ୟା ୧୪୫.୨୧ରେ ପୁର୍ନବାର ଜଣାଇବା ସହ କାଗଜାତ ଦାଖଲ କରିଛନ୍ତି । ଏହାପରେ ମଧ୍ୟ ଛାତ୍ରଙ୍କୁ ବୃତ୍ତିଟଙ୍କା ମିଳିବାରେ ବିଳମ୍ବକୁ ନେଇ ଅଭିବାବକ ଅମାରବିନ୍ଦ ପଧାନ ଅସନ୍ତୋଷ  ବ୍ୟକ୍ତ କରିଛନ୍ତି । ଏ ସମ୍ପର୍କରେ ବିଇଓ ନେପାଳ ବାଗ କହନ୍ତି,  କଣ ହୋଇଛି ଦେଖି ଦେବି ବୋଲି କହିଥିଲେ । ଏଥିପ୍ରତି ଜିଲା ଶିକ୍ଷା ଅଧିକାରୀ ଓ ଜିଲାପାଳ ଦୃଷ୍ଟି ଦେବାକୁ ଅଭିଭାବକ ଦାବି କରିଛନ୍ତି ।