20-Oct-2020

ବଲାଙ୍ଗିର, ତା.୨୦.୧୦.(ସନ୍ତୋଷ ଠାକୁର)  : ଲୋଇସିଂହା ଥାନା ଅଧିନସ୍ଥ ବିଅଁରପାଲି ଗାଁ ରେ ଦ୍ୱିତୀୟ ଥର ବିଂଝାଳ ଆଦିବାସୀ ପରିବାରକୁ ଗାଁର ଗୌନ୍ତିଆ ଏକଘରକିଆ କରି ବାସନ୍ଦ ଦଣ୍ଡ କରିଛନ୍ତି । ଦୀର୍ଘ ଆଠ ଦିନ ହେଲା ଯୁବକ କନ୍ଦା, ସ୍ୱତନ୍ତ୍ର କନ୍ଦା, ବିମ୍ବାଧର କନ୍ଦା, ଗଣତନ୍ତ୍ର କନ୍ଦା ପରିବାରକୁ ବାସନ୍ଦ କରାଯାଇଥିବା ଜିଲ୍ଲାପାଲ ଏବଂ ଆରକ୍ଷୀ ଅଧିକ୍ଷଙ୍କ ଠାରେ ଜିଲ୍ଲା ଆଦିବାସୀ କଲ୍ୟାଣ ସଂଘ ତରଫରୁ ଅଭିଯୋଗ କରାଯାଇଛି । ତୁରନ୍ତ ଅଭିଯୁକ୍ତମାନଙ୍କୁ ଗିରଫ କରିବାକୁ ସଂଘ ଦାବି କରିଛି । ଅଭିଯୋଗ ଅନୁସାରେ ଆଦିବାସୀ ପରିବାର ସହିତ ଗାଁର କୌଣସି ବ୍ୟକ୍ତି କଥାବାର୍ତ୍ତା ନ ହେବାକୁ ଗୌନ୍ତିଆ ନିର୍ଦ୍ଦେଶ ଦେଇଛି, ଯିଏ କଥା ହେବ ସମ୍ପର୍କ ରଖିବ, ୧୦ ହଜାର ଟଙ୍କା ଜୋରିମାନା ଦେବାକୁ  ଆଦେଶ ଦେଇଛନ୍ତି । କନ୍ଦା ପରିବାର ଚାଷ ବିଳ ବାଡି ଅନ୍ୟାନ୍ୟ କାର୍ଯ୍ୟ ପାଇଁ ଲେବର କାମ କରି ନ ଯିବାକୁ ନିଷ୍ପତ୍ତି କରିଛନ୍ତି ଗୌନ୍ତିଆ ପରିବାର, ଏହା ସହିତ ଯୁବକ କନ୍ଦାର ପୁଅମାନଙ୍କୁ ଫୁଟବଲ ପଡିଆରେ ଖେଳିବା ପାଇଁ ବନ୍ଦ କରିଛନ୍ତି ଗାଁ ଲୋକ । କୌଣସି ଲୋକ କିଣାବିକା କରି ନ ଯିବାକୁ ନିର୍ଦ୍ଦେଶ ଦେଇଛି ଅଭିଯୁକ୍ତ ଗୌନ୍ତିଆ । ରାସ୍ତାଘାଟ, ଦୋକାନ, କଥାବାର୍ତ୍ତା, ଖେଳାବୁଲା, ଶ୍ରମିକ ଆଦି ବନ୍ଦ କରି ଦେଇଥିବାରୁ ଆଦିବାସୀ ପରିାବର ଘୋର ନିର୍ଯ୍ୟାତନା, ମାନସିକ ଅବସାଦ, ଭୟ, ଅତଙ୍କ, ଅପମାନିତ, ଦୁର୍ବିସହ ଜୀବନ ଯାପନ କରୁଛନ୍ତି । ଆଦିବାସୀ ପରିବାରକୁ ମାନସିକ ନିର୍ଯ୍ୟାତନା ଓ ଅମାନବିକ ବ୍ୟବହାର କରିବା ପାଇଁ ଗ୍ରାମବାସୀକୁ ଗୌନ୍ତିଆ ରାଧାକାନ୍ତ ପ୍ରଧାନ ବାଧ୍ୟ କରୁଥିବାରୁ ତାକୁ ତୁରନ୍ତ ଗିରଫ କରିବାକୁ ଆଦିବାସୀ ସଂଘ ଜିଲ୍ଲାପାଳ ଏବଂ ଏସ୍‌ପିଙ୍କ ଠାରେ ଆଜି ଲିଖିତ ଅଭିଯୋଗ କରିଛି । ଏହି ଘଟଣାକୁ ୧୨.୧୦.୨୦୨୦ ରେ ସଦର ଥାନା ବଲାଙ୍ଗିର ରେ ଶ୍ରୀ କନ୍ଦ ଅଭିଯୋଗ କରିଥିଲେ । ରାଧାକାନ୍ତ ପ୍ରଧାନଙ୍କ ନାମରେ ସଦର ଥାନା କେଶ ନଂ. ୩୨୩୯୧ ତା.୧୨.୧୦.୨୦୨୦ ରେ ୩ (୧)୪, ୩ (୧) (୬) ରେ ମାମଳା ରୁଜୁ ହୋଇଛି ।  ଗୌନ୍ତିଆଙ୍କ ନିର୍ଦ୍ଦେଶରେ ପୂର୍ବ ଶତୃତା କୁ କେନ୍ଦ୍ର କରି ସ୍ୱତନ୍ତ୍ର କନ୍ଦାକୁ ୨୫ ଦିନ ତଳେ ମାରଣାନ୍ତ୍ରକ ଆକ୍ରମଣ ହୋଇଥିଲା । ଦଫା ୫୦୬, ୩୭୯, ୩୪୧, ୨୯୪, ୩୨୩, ୪୨୨, ୩୪ ଓ ଏଟ୍ରୋସିଟି ଏକ୍ସରେ ମାମଲା ରୁଜୁ ହୋଇଛି କିନ୍ତୁ ପୋଲିସ ଅପରାଧିମାନଙ୍କୁ ଗିରଫ କରୁ ନ ଥିବାରୁ ବିଅଁରପାଲି ଗୌନ୍ତିଆ ବାରମ୍ବାର ଅପରାଧ ଘଟାଉଛି ଏବଂ ଆଦିବାସୀମାନଙ୍କୁ ବାସନ୍ଦ, ଏକ ଘରକିଆ କରି ଅତ୍ୟାଚାର କରୁଛି ବୋଲି ସଂଘର ସଭାପତି ବ୍ରଜ କିଶୋର ସିଂଭୋଇ, ଉପ-ସଭାପତି ଶ୍ୟାମ ସୁନ୍ଦର ଭୋଇ, ଉପାଧ୍ୟକ୍ଷା ବନଲତା ମାଝି କ୍ଷୋଭ ପ୍ରକାଶ କରିଛନ୍ତି । ଆଜି ଜିଲ୍ଲାପାଳ ଏବଂ ଏସ୍‌.ପିଙ୍କ ହସ୍ତକ୍ଷେପ ଦାବି କରିଛନ୍ତି । ତୁରନ୍ତ ଅପରାଧିମାନଙ୍କୁ ଗିରଫ ନ କଲେ  ମହାମେଳି ଚେତାବନୀ ଦେଇଛନ୍ତି ।