28-Apr-2021

ବଲାଙ୍ଗୀର(ସନ୍ତୋଷ କୁମାର ଠାକୁର)- ବର୍ତ୍ତମାନ ବଲାଙ୍ଗୀର ସହରରେ ମହାମାରୀ କରୋନା ତାର କାୟା ବିସ୍ତାର କରି ଚାଲିଛି । ଏହା ଦ୍ୱାରା ପ୍ରତିଦିନ ଶହ ଶହ ଲୋକ ଆକ୍ରାନ୍ତ ହେଉଥିବା ବେଳେ ପ୍ରତିଦିନ ଏହି ମହାମାରୀ ଅନେକ ନୀରିହ ଲୋକଙ୍କ ଜୀବନ ନେଉଛି । ଏପରି ପରିପ୍ରେକ୍ଷୀରେ ସଚେତନତା ଓ କୋଭିଡ଼ ଗାଇଡ଼ ଲାଇନ୍‌କୁ ପାଳନ କରିବା ହିଁ କରୋନା ବିରୁଦ୍ଧରେ ଏକ ମାତ୍ର ଅସ୍ତ୍ର ହୋଇଛି । ଏହି ଅବସରରେ ନିଜର ସାମାଜିକ ଦାୟିତ୍ୱକୁ ଭୁଲି ନଯାଇ ଲୋକଙ୍କୁ ସଚେତନତାର ବାର୍ତ୍ତା ଦେଇଛି ବଲାଙ୍ଗୀରର ସ୍ୱେଚ୍ଛାସେବୀ ସଂଘ ନାରୀ ଶକ୍ତି ସଙ୍ଗଠନ ।  ବଲାଙ୍ଗୀର ସହର କଂସାରୀ ପଡା ସ୍ଥିତ ଆଶ୍ରା ଆଶ୍ରୟ ସ୍ଥଳୀ ଠାରେ ସଂଗଠନର ସଭ୍ୟ, ସଭ୍ୟା ମାନେ ପହଞ୍ଚି ସେଠାକର ଅନ୍ତେବାସୀ ମାନଙ୍କୁ କୋଭିଡ ଗାଇଡଲାଇନ୍‌କୁ କଡାକଡି ଭାବରେ ପାଳନ କରିବା ପାଇଁ ପରାମର୍ଶ ଦେଇଥିଲେ । ଏଥିସହ ପରିମଳ ବ୍ୟବସ୍ଥାର ସୁଧାର ପାଇଁ ଆଶ୍ରା ଆଶ୍ରୟ ସ୍ଥଳୀର ଅନ୍ତେବାସୀ ମାନଙ୍କୁ ସର୍ଫ, ସାବୁନ, ସେମ୍ପୁ ଓ ମାସ୍କ ଆଦି ପ୍ରତିଷେଧକ ଉପକରଣ ବଂଟନ କରାଯାଇଥିଲା । ଏହି ସଚେତନତା କାର୍ଯ୍ୟକ୍ରମରେ ନାରୀ ଶକ୍ତି ସଂଗଠନର ସଂପାଦିକା ନୂତନ ଦାସ, ଯୁଗ୍ମ ସଂପାଦିକା  ଶ୍ରାବଣୀ ମେହେର, ଜଗଦମ୍ବା ନାୟକ, ସୁନୀତା ନାୟକ, ରେବତୀ ସାଣ୍ଢ, ପାରିଜାତ ଡାଙ୍ଗ, ଆରତି ବେଜ୍ ପ୍ରମୁଖ ପରିଚାଳନା କରିଥିଲେ । ନାରୀ ଶକ୍ତି ସଂଘର ସଭାନେତ୍ରୀ ସରିତା ଦାସ ଓ ଉପସଭାନେତ୍ରୀ ତଥା ବଲାଙ୍ଗୀର ପୌର ପରିଷଦ ଅଧ୍ୟକ୍ଷା ସନ୍ତୋଷିନୀ ବେହେରାଙ୍କ ଦିଗ୍‌ଦର୍ଶନରେ ସମସ୍ତ କାର୍ଯ୍ୟକ୍ରମ ପରିଚାଳନା ହୋଇଥିଲା । 
ସୂଚନାଯୋଗ୍ୟ ଯେ, କରୋନା କାଳରେ ବଲାଙ୍ଗୀରର ଏହି ଅଗ୍ରଣୀ ମହିଳା ଅନୁଷ୍ଠାନ ନାରୀ ଶକ୍ତି ସଂଗଠନ ଜନସାଧାରଣଙ୍କ ମଧ୍ୟରେ କରୋନା ସଂପର୍କିତ ବିଭିନ୍ନ ସଚେତନତା କାର୍ଯ୍ୟକ୍ରମ କରି ସମସ୍ତଙ୍କ ପ୍ରଶଂସାଭାଜନ ହୋଇପାରିଛି ।