26-Apr-2021

ସୁରଟ,(ପ୍ରେରଣା ଖବର) :ଗୁଜୁରାଟ ସୁରଟର ଏକ ଘରୋଇ ହସ୍ପିଟାଲରେ ଅଗ୍ନିକାଣ୍ଡ । ଉଦ୍ଧାର ହେଲେ ୧୬ କୋଭିଡ୍ ଆକ୍ରାନ୍ତ । ରବିବାର ରାତିରେ ହସ୍ପିଟାଲର ଆଇସିୟୁରେ ନିଆଁ ଲାଗିବା ପରେ ୧୬ ଜଣ ଗୁରୁତରଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି ।ଏହାସହ ସେମାନଙ୍କୁ ଅନ୍ୟ ଏକ ହସ୍ପିଟାଲରେ ସ୍ଥାନାନ୍ତର କରାଯାଇଛି । ତେବେ କେଉଁ କାରଣରୁ ଅଗ୍ନିକାଣ୍ଡ ଘଟିଲା ସେନେଇ କୌଣସି ସୂଚନା ମିଳିପାରି ନାହିଁ ।

ଅଧିକାରୀଙ୍କ କହିବାନୁସାରେ, ସୁରଟ ଷ୍ଟେସନ ରୋତରେ ଏକ ବହୁତଳ ବିଲ୍ଡିଂର ପଞ୍ଚମ ମହଲାରେ ନିଆଁ ଲାଗିଯାଇଥିଲା । ଏହି ବିଲ୍ଡିଂରେ ଆୟୁଷ ହସ୍ପିଟାଲ ଥିଲା । ରାତି ୧୧ଟା ୪୦ ରେ ଏହି ଅଗ୍ନିକାଣ୍ଡ ଘଟିଥିବା ସୂଚନା ମିଳିଛି । ଏହାପରେ ଆଇସିୟୁରେ ଥିବା ୧୬ ରୋଗୀଙ୍କୁ ସୁରକ୍ଷିତ ଭାବେ ବାହାରକୁ ଅଣାଯାଇଥିଲା । ହସ୍ପିଟାଲ କର୍ମଚାରୀ ୫ଜଣଙ୍କୁ ଉଦ୍ଧାର କରିଥିବା ବେଳେ ଅଗ୍ନିଶମ କର୍ମଚାରୀ ୧୧ଜଣଙ୍କୁ ଉଦ୍ଧାର କରିବାରେ ସଫଳ ହୋଇଥିଲେ ।

ସୁରଟ୍ ଅଗ୍ନିଶମ ଅଧିକାରୀ ବସନ୍ତ ପାରେଖ୍ କହିଛନ୍ତି ଯେ, ସର୍ଟ ସର୍କିଟ୍ ପାଇଁ ଏହି ଅଗ୍ନିକାଣ୍ଡ ଘଟିଥିବା ଅନୁମାନ କରାଯାଉଛି । ଉଦ୍ଧାର ହୋଇଥିବା ୧୬ ଆକ୍ରାନ୍ତଙ୍କ ମଧ୍ୟରୁ ୫ଜଣଙ୍କୁ  ନଗର ନିଗମ ଏସଏମଆଇଏମଇଆର ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ୪ଜଣଙ୍କୁ ସଞ୍ଜୀବନି ହସ୍ପିଟାଲ ଓ ୨ ଜଣଙ୍କୁ ଆୟୁଷ ହସ୍ପିଟାଲର ଦ୍ୱିତୀୟ ମହଲାକୁ ସ୍ଥାନାନ୍ତରିତ କରାଯାଇଛି ।