18-Apr-2021

ଟିଟିଲାଗଡ଼(ପ୍ରେରଣା ଖବର): ଟିଟିଲାଗଡ଼ ପୌରପରିଷଦ ଅଧୀନରେ ଥିବା ୧୫ ଗୋଟି ୱାର୍ଡ  ମଧ୍ୟରୁ  ୪ ନମ୍ବର ୱାର୍ଡ ରେ ପରିମଳ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡିଥିବା ନେଇ ସ୍ଥାନୀୟ ବାସିନ୍ଦା ରେ ତୀଵ୍ର ଅସନ୍ତୋଷ ଦେଖା ଦେଇଛି । ସୂଚନାଯୋଗ୍ୟ ଯେ, ଜାତୀୟରାଜପଥ ୫୯ କୁ ସଂଯୋଗ କରୁଥିବା ଏହି ୱାର୍ଡ ର ରାସ୍ତା କୁ ବାଇପାସ ସଡକ ଭାବେ ବ୍ୟବହାର କରାଯାଉଛି । ବିଭିନ୍ନ ପ୍ରକାର ଛୋଟ, ବଡ଼ ଗାଡି ଚଳାଚଳ ହେଉଥିବା ବେଳେ ବିଭାଗୀୟ ଅଧିକାରୀ ତଥା କର୍ମଚାରୀ ଙ୍କ ଦାୟିତ୍ୱ ହୀନତା ଯୋଗୁଁ ଏହି ରାସ୍ତା ବିପର୍ଯ୍ୟସ୍ତ ହୋଇପଡିଥିବା ଓ ସାଧାରଣ ଅକଥନୀୟ ଦୁର୍ଦ୍ଦଶା ର ଶିକାର ହେଉଥିବା ଅଭିଯୋଗ ହୋଇଛି । ଏହି ରାସ୍ତା ସଦା ସର୍ବଦା ବ୍ୟସ୍ତ, ବହୁଳ ହୋଇ ରହୁଥିବା ବେଳେ ଗମନା ଗମନ ବାଧାପ୍ରାପ୍ତ ହୋଇ ଆସୁଥିବା ତଥା ଏ ନେଇ ଅଞ୍ଚଳବାସୀ ଅନେକ ଥର ପୌରପରିଷଦ ଅଧିକାରୀ ଙ୍କୁ ଆବେଦନ, ନିବେଦନ କରିବା ସତ୍ୱେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ  କରା ନ ଯିବା ନେଇ ଅସନ୍ତୋଷ ପ୍ରକାଶ ପାଇବା ସହ ଆଗାମୀ ଦିନରେ ରାସ୍ତା  ଅବରୋଧ କରିବେ ବୋଲି ଚେତାବନୀ ଦେଇଛନ୍ତି । ବର୍ତ୍ତମାନ ସ୍ୱଚ୍ଛ ଭାରତ ଅଭିଯାନ ଅନୁଯାୟୀ ସାରା ଦେଶରେ ସ୍ୱତନ୍ତ୍ର ପଦକ୍ଷେପ ନେବା ଓ ବ୍ୟାପକ ଅର୍ଥ ବ୍ୟୟ,ବରାଦ କରାଯାଉଥିବା ବେଳେ ଉକ୍ତ ଅର୍ଥ ର ବ୍ୟବହାର ଏହି ଅଞ୍ଚଳରେ ନକରିବା କିମ୍ବା ପରିମଳ ବ୍ୟବସ୍ଥା ଅନୁସାରେ ପଦକ୍ଷେପ ନିଆ ନ ଯିବା ନେଇ ତୁରନ୍ତ ଆବଶ୍ୟକ ପଦକ୍ଷେପ ଗ୍ରହଣ କରିବା ପାଇଁ ଦାବି ହେଉଛି ।