17-Apr-2021

ଟିଟିଲାଗଡ଼ (ପ୍ରେରଣା ଖବର): ସଚେତନତା ଦ୍ୱାରା କରୋନା ର ମୁକାବିଲା କରିବା ସମ୍ଭବ କୁହାଯାଉଥିବା ସହ ସରକାରୀ ଓ ବିଶେଷ କରି ସ୍ୱାସ୍ଥ୍ୟ ବିଭାଗ ଏ ନେଇ ଉପଯୁକ୍ତ ସୁରକ୍ଷା ବ୍ୟବସ୍ଥା ଗ୍ରହଣ କରିବା ଉଚିତ । ଏଥିପାଇଁ ସମସ୍ତ ସ୍ୱାସ୍ଥ୍ୟ କର୍ମୀ ଙ୍କୁ ଟୀକା ସ୍ୱତନ୍ତ୍ର ଭାବେ ପ୍ରଦାନ କରାଯାଉଛି । ହେଲେ ବଲାଙ୍ଗୀର ଜିଲ୍ଲାର ଟିଟିଲାଗଡ଼ ଉପଖଣ୍ଡ ମୁଖ୍ୟ ଚିକିତ୍ସାଳୟରେ ଜଣେ ନର୍ସ ଗୁରୁତର ଭାବେ କରୋନାର ଶିକାର ହୋଇ ବଲାଙ୍ଗୀର ସ୍ଥାନାନ୍ତରିତ ହୋଇ ସେଠୁ ପୁନଃ ଟିଟିଲାଗଡ଼ ଆସି ଏକ କେବିନରେ ରହିବା ନେଇ ସାଧାରଣ ରେ ବେଶ ହଟଚମଟ ସୃଷ୍ଟି ହୋଇଥିଲା । ସେହିପରି ଏହି ଡ଼ାକ୍ତରଖାନା ର ଡ଼ ଶ୍ରୀ ମହାନ୍ତି ନାମକ ଜଣେ ଡ଼ାକ୍ତର ନିଜେ କରୋନା ଆକ୍ରାନ୍ତ ହୋଇ ସାଧାରଣ ଭଳି ଡାକ୍ତରଖାନା ଆଖ ପାଖ ଅଞ୍ଚଳରେ ବୁଲିବା ସହ ନିକଟରେ ଥିବା ଏକ ପାନ ଦୋକାନ କଡରେ ରହି କିଛି ବ୍ୟକ୍ତିଙ୍କ ସହ ଲୁଡ଼ୁ ଖେଳୁଥିବା ଦେଖାଯାଇଛି । ଏପରି ଖାମଖିଅଲ ମନୋଭାବ ପୋଷଣ କରୁଥିବା ଜଣେ ଡ଼ାକ୍ତରଙ୍କ ଏପରି କାର୍ଯ୍ୟକଳାପ ବିରୋଧରେ କର୍ମଚାରୀ ତଥା ସାଧାରଣରେ ଦୃଢ଼ କାର୍ଯ୍ୟାନୁଷ୍ଠାନ ଦାବୀ ହୋଇଛି । ଟିଟିଲାଗଡ଼ ଯୁବ ସ୍ବେଚ୍ଛାସେବୀ ସଙ୍ଗଠନ ତରଫରୁ ଏ ନେଇ ତୁରନ୍ତ ଆବଶ୍ୟକ ପଦକ୍ଷେପ ଗ୍ରହଣ କରିବା ନିମନ୍ତେ ଦାବୀ କରାଯାଇଛି ।