15-Apr-2021

ବଡ଼ବିଲ (ପ୍ରେରଣା ଖବର) : ନଦୀରେ ବୁଡି ଯୁବକଙ୍କ ମୃତ୍ୟୁ ହୋଇଛି । ମୃତ ଯୁବକ ଗୋଡା ଆମବାଗାନ୍‌ ଅଞ୍ଚଳର ରୋଷନ କଚ୍ଛପ ବୋଲି ଜଣାପଡିଛି । କେନ୍ଦୁଝର ଜିଲ୍ଲା ବାମେବାରୀ ଥାନା ଗୁରୁବେଡ଼ା ସ୍ଥିତ ବୈତରଣୀ ନଦୀରେ ଘଟିଛି ଘଟଣା ।

ଖବର ଅନୁଯାୟୀ, ବୁଧବାର ଅପରାହ୍ନ ସମୟର ଗୋପାଲ ଦେଓ ନାମକ ଜଣେ ସାଙ୍କ ରୋଷନଙ୍କୁ ଫୋନ୍‌ କରି ଡାକିଥିଲେ । ଉଭୟ ଗୁରୁବେଡ଼ା ଠାରେ ମଉଜ ମଜଲିସ କରିବାକୁ ଯୋଜନା କରିଥିଲେ । ସେଠାରେ ଉଭୟ ମଦ୍ୟପାନ କରି ପାଖରେ ଥିବା ନଦୀରେ ଗାଧୋଇବାକୁ ଯାଇଥିଲେ । କିଛି ସମୟ ଧରି ନଦୀରେ ଗାଧୋଇବା ପରେ ଗୋପାଳ ଉପରକୁ ଉଠିଆସିଥିଲେ । କିନ୍ତୁ ମାତ୍ରାଧିକ ନିଶା ସେବନ ଲାଗି ରୋଷନ ପାଣିରୁ ଉଠିବା ସମ୍ଭବ ହୋଇନଥିଲା । ରୋଷନ ଧିରେ ଧିରେ ପାଣିର ଗଭୀରତା ଭିତରକୁ ଯାଇ ନିଖୋଜ ହୋଇଯାଇଥିଲେ 

ତେବେ ରୋଷନଙ୍କୁ ନପାଇ ଗୋପାଲ ଅଗ୍ନିଶମ ବାହିନୀକୁ ଖବର ଦେଇଥିଲେ । ଖବର ପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ରୋଷନଙ୍କୁ ଖୋଜିଥିଲେ । ହେଲେ କୌଣସି ପତ୍ତା ମିଳିନଥିଲା । ଶେଷରେ କିଛି ସମୟରେ ପରେ ପାଣି ଭିତରେ ଖୋଜିବା ପରେ ରୋଷନଙ୍କ ମୃତଦେହ ମିଳିଥିଲା । ବାମେବାରୀ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଘଟଣାରେ ତଦନ୍ତ ଜାରି ରଖିଛି ପୋଲିସ ।