10-Apr-2021

ବଲାଙ୍ଗିର(ପ୍ରେରଣା ଖବର): କୋସଲାଂଚଳ, ହାଇକୋର୍ଟର ସ୍ଥାୟୀ ବେଂଚ ଠୁଁ ଅରମ୍ଭ କରି ରାଜନୈତିକ ତଥା ପ୍ରଶାସନୀକ ବିକେନ୍ଦ୍ରୀକରଣ ଦାବୀ କରି ଆସୁଥିବା ସମୟରେ ରାଜ୍ୟ ସରକାର ସବୁକିଛି କଟକ ଓ ଭୂବନେଶ୍ୱରରେ କେନ୍ଦ୍ରୀଭୁତ କରିବାରେ ଲାଗିଛନ୍ତି । କେନ୍ଦ୍ରୀଭୁତ କରିବାର ଏହି ଅପସଂସ୍କୃତିରେ ଅନ୍ୟ ଏକ ପ୍ରୟାସ ସଦ୍ୟ ଆରମ୍ଭ ହୋଇଥିବା କୋସଲାଂଚଳର ସମସ୍ତ ଆଇନ ମହାବିଦ୍ୟାଳୟ ଗୁଡିକର ସମସ୍ତ ଶୈକ୍ଷିକ କାର୍ଯ୍ୟକଳାପକୁ କଟକ ସ୍ଥିତ ମଧୁସୁଦନ ଆଇନ ବିଶ୍ୱବିଦ୍ୟାଳୟ ଅଧିନକୁ ନେଇଯିବା ।ଏହାପରେ କୋସଲାଂଚଳ ସମସ୍ତ ଆଇନ ମହାବିଦ୍ୟାଳୟ ଗୁଡିକର ପରିକ୍ଷା ପରିଚାଳନା, ସାର୍ଟିଫିକେଟ ପ୍ରଦାନ ଆଦି ସମସ୍ତ କାର୍ଯ୍ୟ ଯାହାକି ସମ୍ବଲପୁର ବିଶ୍ୱବିଦ୍ୟାଳୟ ଅଧିନରେ ପରିଚାଳିତ ହେଉଥିଲା କଟକରୁ ପରିଚାଳିତ ହେବ ଏବଂ ଆଇନ ଶିକ୍ଷାଗ୍ରହଣ କରୁଥିବା ବିଦ୍ୟାର୍ଥୀମାନେ ପ୍ରତ୍ୟେକ କାର୍ଯ୍ୟ ପାଇଁ କଟକ ଦଉଡିବାକୁ ବାଧ୍ୟ ହେବେ । ପ୍ରଶାସନୀକ ବିକେନ୍ଦ୍ରୀକରଣ ଦ୍ୱାରା ସବୁବେଳେ ସାଧାରଣ ନାଗରୀକଙ୍କ ହିତ ସାଧିତ ହେବାରେ ସହାୟକ ହେଉଥିବା ବେଳେ ଓଡିଶା ସରକାର ଏହିପରି କାର୍ଯ୍ୟକଳାପ କୋସଲାଂଚଳ ଗରୀବ ଜନସାଧାରଣଙ୍କ ପାଇଁ ଦୁର୍ବିସହ ହୋଇଯାଉଛି ।ଶିକ୍ଷାକୁ ସୁଲଭ କରିବା ପାଇଁ କୋସଲାଂଚଳବସୀ ବିଭିନ୍ନ ସମୟରେ ବିଶ୍ୱବିଦ୍ୟାଳୟ ଦାବୀ କଲାପରେ କଳାହାଣ୍ଡି ଓ ବଲାଙ୍ଗିର ଠାରେ ବିଶ୍ୱବିଦ୍ୟାଳୟ ଗଠିତ ହୋଇଛି । ଏହି ସମୟରେ ଆଇନ ଶିକ୍ଷାର ପରିଚାଳନାକୁ କଟକ ସ୍ଥାନାନ୍ତରିତ କରି ଆଇନ ଶିକ୍ଷା ଗ୍ରହଣ କରିବାରେ ଇଛୁକ ଥିବା ଶିକ୍ଷାର୍ଥୀ ମାନଙ୍କ ବୋଝ ବଢାଯିବା ଦୁଃର୍ଭାଗ୍ୟଜନକ ।
ସରକାରଙ୍କର ଏହିପରି ସବୁକିଛି କେନ୍ଦ୍ରୀଭୁତ କରିବାର ପ୍ରୟାସକୁ କୋସଲ ରାଜ୍ୟ ସମନ୍ୱୟ ସମିତି ଘୋର ନିନ୍ଦା କରିବା ସହ ଏହି   ପ୍ରେସ ବିଜ୍ଞପ୍ତି ଜରିଆରେ ଦାବୀ ଉପସ୍ଥାପିତ କରେ ଯେ, ଆଇନ ଶିକ୍ଷାର ପରିଚାଳନାକୁ ଆହୁରି ବିକେନ୍ଦ୍ରୀକରଣ କରାଯାଇ କୋସଲାଂଚଳରେ ରହିଥିବା ବିଭିନ୍ନ ବିଶ୍ୱବିଦ୍ୟାଳୟର ଅନ୍ତର୍ଭୂକ୍ତ କରାଯାଉ କିମ୍ବା କୋସଲାଂଚଳରେ ଅନ୍ୟ ଏକ ଆଇନ ବିଶ୍ୱବିଦ୍ୟାଳୟ ଗଠନ କରି ସମସ୍ତ ଆଇନ ମହାବିଦ୍ୟାଳୟକୁ ତା ସହ ଅନୁବନ୍ଧିତ କରାଯାଉ ବୋଲି କୋସଲ ରାଜ୍ୟ ସମନ୍ୱୟ ସମିତିର କେନ୍ଦ୍ରୀୟ ଅଧ୍ୟକ୍ଷ  ପ୍ରମୋଦ କୁମାର ମିଶ୍ର ଜଣେଇଛନ୍ତି ।