06-Apr-2021

ବୌଦ୍ଧ(ଶ୍ରୀବନ୍ତ ମେହେର)୬/୪, ବୌଦ୍ଧବ୍ଲକ୍‌ ବାଉଁଶୁଣୀ ଠାରେ ଥିବା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ପରିସରରେ ଥଣ୍ଡାପାନୀୟ ଜଳ ପ୍ରକଳ୍ପ ଗୋଟିଏ ନିର୍ମାଣ ପାଇଁ ଆଜକୁ ତିନି ବର୍ଷ ତଳେ ବୌଦ୍ଧ ବ୍ଲକ୍‌ ତରଫରୁ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା । ପ୍ରକଳ୍ପ ଗୃହ ନିର୍ମାଣ କାର୍ଯ୍ୟ ସରିଯାଇଥିବା ବେଳେ ପାଣି ଟାଙ୍କି କିମ୍ବା ଫ୍ରୀଜର୍‌ ଗତ ତିନିବର୍ଷ ମଧ୍ୟରେ ଲାଗିପାରିଲା ନାହିଁ । ନିର୍ମାଣ ହୋଇଥିବା ଘର ନିକଟରେ କୌଣସି ସୁଚନା ଫଳକ ନଥିବା ହେତୁ ଏ ପ୍ରକଳ୍ପ କେତେ ଟଙ୍କାର ଓ ତା ସମ୍ପର୍କରେ ଅନ୍ୟାନ୍ୟ ତଥ୍ୟ ଜଣାପଡିନାହିଁ । ମାତ୍ର ସ୍ଥାନୀୟ ଲୋକଙ୍କ ଠାରୁ ମିଳିଥିବା ସୂଚନା ଅନୁଯାୟୀ ଆଜକୁ ୩ ବର୍ଷ ହେଲା ଆରମ୍ଭ କରାଯାଇଥିବା ଜଣାପଡିଛି । ରୋଗୀ ଓ ତାଙ୍କ ତତ୍ତ୍ୱାବଧାନ ପାଇଁ ଆସିଥିବା ସମ୍ପର୍କୀୟମାନେ ଥଣ୍ଡା ପାଣି ଟିକେ ପିଇବାକୁ ଡହକ ବିକଳ ହେଉଥିବା ବେଳେ ହାତୀର ଖାଇବା ଦାନ୍ତ ଓ ଦେଖିବା ଦାନ୍ତ ଯେପରି ଭିନ୍ନ ସେହିଭଳି ଲକ୍ଷାଧିକ ଟଙ୍କାର ସରକାରୀ ଅନୁଦାନରେ ଅଧାପଂତରିଆ ଭାବେ ନିର୍ମାଣଧିନ ଅବସ୍ଥାରେ ଥିବା ଏହି ଥଣ୍ଡା ପାନୀୟ ଜଳ ପ୍ରକଳ୍ପଟି ରୋଗୀ କିମ୍ବା ସହାୟକ ଙ୍କ କାମରେ ନଲାଗି ଠିକାଦାରଙ୍କ ପାଇଁ ଉଦିଷ୍ଟ ବୋଲି ସାଧାରଣରେ ଚର୍ଚ୍ଚା ହେଉଛି। ଏହାକୁ ନେଇ ବାରମ୍ବାର ଅଭିଯୋଗ କରିବା ସତ୍ତ୍ୱେ କୌଣସି ପ୍ରତିକାର ହେଉନଥିବାରୁ ଏହାକୁ ସମ୍ପୂର୍ଣ୍ଣ କରାଯାଉ ନଚେତ ମୂଳରୁ ହଟାଯାଉ ବୋଲି ଲୋକେ କୁହାକୁହି ହେଉଥିବା ଶୁଣିବାକୁ ମିଳୁଛି।