05-Apr-2021

ଭୁବନେଶ୍ୱର: (ଶୁଭାଶିଷ ନାୟକ) ପୁଣି ତତଲା କଡ଼ାରେ ସିଝିବ ଓଡ଼ିଶା । ପୁଣି ଫେରିବ ରାଜସ୍ଥାନୀ ପଶ୍ଚିମା ଗରମ ପବନ । ଘୁର୍ଣ୍ଣିବଳୟ ସ୍ଥିତି ଏବେ ଦୁର୍ବଳ ହୋଇ ସାରିଥିବାବେଳେ ବାୟୁ ମଣ୍ଡଳରେ ଥିବା ଗରମର ଆଦ୍ରତା ଏବେ ପୁଣି ବଢ଼ିବ । ଏଥିସହ ରାଜସ୍ଥାନ ପଟୁ ସିଧାସଳଖ ବହୁଥିବା ଝାଞ୍ଜି ପବନ ମଧ୍ୟ ପୁଣି ବହିବା ଆରମ୍ଭ ହେବ । ଆସନ୍ତା ଦୁଇ ଦିନ ଆକାଶ ସାମାନ୍ୟ ମେଘୁଆ ରହିବାକୁ ଥିବାବେଳେ ପାଗ ଶୁଖିଲା ରହିବ । ସୋମବାରଠାରୁ କାଳବୈଶାଖୀ ହ୍ରାସ ପାଇବାର ଥିବା ବେଳେ ଅଳ୍ପ କିଛି ଅଞ୍ଚଳରେ ହାଲ୍କାରୁ ମଧ୍ୟମ ଧରଣର ବର୍ଷା ହେବାର ସମ୍ଭାବନା ରହିଛି । ଏହାପରଠାରୁ ପାଗରେ ପୁଣି ପରିବର୍ତ୍ତନ ଆସିବା ସହିତ ତାପମାତ୍ରା ବଢ଼ିବ ବୋଲି ପାଣିପାଗ କେନ୍ଦ୍ର ପକ୍ଷରୁ କୁହାଯାଇଛି । କେନ୍ଦ୍ରର ବୈଜ୍ଞାନିକ ଉମାଶଙ୍କର ଦାଶ କହିଛନ୍ତି ଯେ ଆସନ୍ତା ୨-୩ ଦିନ ମଧ୍ୟରେ ତାପମାତ୍ରାରେ ବିଶେଷ ପରିବର୍ତ୍ତନ ହେବାର ନ ଥିବା ବେଳେ ଏହାପରେ ପୁଣି ୨-୩ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ପାଇବ ବୋଲି ସୂଚନା ମିଳିଛି ।