01-Apr-2021

ବୌଦ୍ଧ(ଶ୍ରୀବନ୍ତ ମେହେର)ତା୧/୪,ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ ସଦର ମହକୁମା ଚାରିଛକ ସ୍ଥିତ ପୁରୁଣାକଟକ ଥାନା ପଛପଟେ ଆଠମଲ୍ଲିକ ରୁ ଆସି ଦୀର୍ଘଦିନ ହେଲା ଏକ ଝାଟି ମାଟିର ଘରକରି ରହୁଥିବା ଜଣେ ଆନନ୍ଦ ବେହେରା(୪୦)ଙ୍କ ବୁଧବାର ଦିନ ମଧ୍ୟାନ ୧୨ଟା ବେଳେ ମୃତ୍ୟୁ ଘଟିଥିଲା।ହେଲେ ସେ ଜାତିଭାଇ ଙ୍କ ସହ ଚଳୁନଥିବାରୁ ଶବକୁ କନ୍ଧଦେବା ପାଇଁ କେହି ନଆସିବାରୁ ଦୀର୍ଘ ୮ଘଣ୍ଟା ଧରି ମୃତଦେହ ଘରେ ପଡିରହିଥିଲା। ଅନ୍ୟପଟେ ମୃତକଙ୍କ ଅସହାୟ ପତ୍ନୀ ଏବଂ ୨ଜଣ ନାବାଳକ ପୁଅ ଝିଅ ହାତରେ ଟଙ୍କାଟିଏ ବି ନଥିବାରୁ କିଂ କର୍ତ୍ତବ୍ୟ ମୁଢ ହୋଇ କାନ୍ଦ ବୋବାଳ କରୁଥିଲେ।ଏ ଖବର ଜାଣିବା ପରେ ହରଭଙ୍ଗା ବିଡିଓ, ତହସିଲଦାର, ଓ ଅତିରିକ୍ତ ତହସିଲଦାର ସେଠାରେ ପହଞ୍ଚି ମୃତକ ପରିବାରଙ୍କୁ ରେଡ଼କ୍ରସରୁ ୧୦ହଜାର ଟଙ୍କା ଓ ହରିଶ୍ଚନ୍ଦ୍ର ଯୋଜନାରେ ୨ହଜାର ଟଙ୍କାର ଆର୍ଥିକ ସହାୟତା ଦେବା ସହିତ ନିଜେ ଶବକୁ କାନ୍ଧେଇ ଶବ ସତ୍କାର କରିବାକୁ ନିଷ୍ପତ୍ତି ନେଇଥିଲେ।ଏ ଖବର ଜାଣିବା ପରେ ୪ଜଣ ଜାତିଭାଇ ମଧ୍ୟ ଆମେ କାନ୍ଧଦେବୁ ବୋଲି ଆଗେଇ ଆସିଥିଲେ।ଫଳରେ ରାତି ୮ଟାରେ ମୃତ ଆନନ୍ଦ ବେହେରା ଙ୍କ ନାବାଳକ ପୁଅ ଏବଂ ୪ଜଣ ଜାତିଭାଇ ମିଶି ଶବକୁ ନେଇ ସତ୍କାର କରିଥିଲେ।ଶବ ଯାତ୍ରାରେ ହରଭଙ୍ଗା ବିଡିଓ ନୀଳକଣ୍ଠ ବେହେରା, ତହସିଲଦାର ଶମ୍ଭୁ ଭୂଷଣ ମିଶ୍ର ଏବଂ ଆଡିସନାଲ ତହସିଲଦାର ହରିଓମ ଭୋଇରେ ସାମିଲ ହୋଇ ଦାହ ସଂସ୍କାର ବେଳେ ଉପସ୍ଥିତ ରହି ସେମାନଙ୍କୁ ସହଯୋଗ କରିଥିଲେ। ମୃତ ଅସହାୟ ପରିବାର ଙ୍କୁ ସହଯୋଗ ର ହାତ ବଢ଼ାଇବା ପାଇଁ ପ୍ରଶାସନିକ ଅଧିକାରୀ ମାନଙ୍କର ଏହି ମହତ ଉଦ୍ୟମକୁ ବୁଦ୍ଧିଜୀବି ମହଲରେ ସାଧୁବାଦ ଜଣାଇବା ସହ ଉଚ୍ଚ ପ୍ରସଂଶା କରାଯାଇଛି।ପ୍ରକାଶ ଯୋଗ୍ୟ ଯେ ଆନନ୍ଦ ବେହେରା ଚାରିଛକ ବଜାରରେ ମୂଲ ମଜୁରୀ କରି ପରିବାର ପ୍ରତି ପୋଷଣ କରୁଥିଲେ।ଗତ ପ୍ରାୟ ବର୍ଷେ ପୂର୍ବରୁ ସେ କିଡନୀ ରୋଗରେ ଆକ୍ରାନ୍ତ ହୋଇ ଚିକିତ୍ସାଧିନ ଥିଲେ।ହେଲେ ଉପଯୁକ୍ତ ଚିକିତ୍ସା ପାଇଁ ଅର୍ଥ ଅଭାବରୁ ଗତ କିଛିଦିନ ହେଲା ଘରେ ପଡିରହିଥିଲେ।ବୁଧବାର ତାଙ୍କର ମୃତ୍ୟୁ ଘଟିଥିଲା।