28-Mar-2021

ବଲାଙ୍ଗିର ସନ୍ତୋଷ କୁମାର ଠାକୁର)- ଆଜି ବଲାଙ୍ଗିର ଗାନ୍ଧୀ ଷ୍ଟାଡିୟମଠାରେ ଆୟୋଜିତ ଓସିଏ ଭିଜନ ୨୦୨୪ର ସିନିଅର ଇନଟ୍ରାକ୍ଳବ କ୍ରିକେଟ ପ୍ରତିଯୋଗିତାରେ ଟିଟିଲାଗଡ଼ କ୍ରିକେଟ କ୍ଳବ ବିଜୟ ଲାଭ କରିଛି । ଆଜିର ପ୍ରତିଯୋଗିତାରେ ନାଏକ କ୍ରିକେଟ ଏକାଡେମୀ ଓ ଟିଟିଲାଗଡ କ୍ରିକେଟ କ୍ଳବ ମଧ୍ୟରେ ଅନୁଷ୍ଠିତ ହୋଇଥିଲା । ନାଏକ କ୍ରିକେଟ ଏକାଡେମୀ ଟସ୍ ଜିଣି ଟିଟିଲାଗଡ଼ କ୍ରିକେଟ କ୍ଳବକୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲେ । ଟିଟିଲାଗଡ କ୍ରିକେଟ କ୍ଳବ ପ୍ରଥମେ ବ୍ୟାଟିଂ କରି ୩୮ ଓଭରରେ ସମସ୍ତ ଉଇକେଟ ହରାଇ ୨୪୫ ରନ୍ ସ୍କୋର କରିଥିଲେ । ଦଳ ତରଫରୁ ମହମ୍ମଦ ୟୁସୁଫ ସର୍ବାଧିକ ୫୭ ରନ୍ ଓ ସୁନୀଲ ଭୋଇ ୫୨ ରନ୍ କରିଥିଲେ । ନାଏକ ଏକାଡେମୀ ତରଫରୁ ରୋଶନ ସାଏ ୪ ଟି ଓ ଆୟୁଷ ପାଣିଗ୍ରାହୀ ୩ ଟି ୱିକେଟ ଅକ୍ତିଆର କରିଥିଲେ । ୨୪୬ ରନ୍‌ର ଲକ୍ଷକୁ ପିଛା କରିବାକୁ ଯାଇ ନାଏକ ଏକାଡେମୀ ୩୯.୩ ଓଭର ସମସ୍ତ ଉଇକେଟ ହରାଇ ମାତ୍ର ୧୬୬ ରନ ସଂଗ୍ରହ କରିବାକୁ ସକ୍ଷମ ହୋଇଥିବା ବେଳେ, ଏହି ମ୍ୟାଚକୁ ୭୯ ରନ ବ୍ୟବଧାନରେ ହାରି ଯାଇଥିଲେ । ନାଏକ ଏକାଡେମୀ ତରଫରୁ ଆୟୁଷ ସାହୁ ସର୍ବାଧିକ ୭୦ ରନ୍ ଓ ଅମିୟ ଧରୁଆ ଅପରାଜିତ ୧୮ ରନ୍ ସଂଗ୍ରହ କରିଥିଲେ । ଟିଟିଲାଗଡ କ୍ଳବ ତରଫରୁ ସୁନୀଲ ଭୋଇ ଓ ଅଜୟ ପଟ୍ଟନାୟକ ୩ ଗୋଟି ଉଇକେଟ ଅକ୍ତିଆର କରିଥିଲେ । ଟିଟିଲାଗଡ କ୍ଳବ ଦଳର ସୁନୀଲ ଭୋଇଙ୍କୁ ତାଙ୍କର ଅଲରାଉଣ୍ଡ ପ୍ରଦର୍ଶନ ପାଇଁ ଶ୍ରେଷ୍ଠ ଖେଳାଳୀ ଘୋଷିତ କରାଯାଇଥିଲା । 
 ଏହି ମ୍ୟାଚକୁ ରାଜେନ୍ଦ୍ର ସେଠ୍ ଓ ମୁକେଶ ସ୍ୱାଇଁ ପରିଚାଲନା କରିଥିବାବେଳେ ସ୍ୱାଗତ ଶୁଭଙ୍କର ଓ ସୁଭମ ନାଏକ ସ୍କୋରର୍ ଦାୟିତ୍ୱ ତୁଲାଇଥିଲେ ।