23-Mar-2021

ସୁରଟ (ପ୍ରେରଣା ଖବର) : ସୁରଟ ସିଭିଲ  ହସ୍ପିଟାଲର କୋଭିଡ୍  ଓ୍ଵାର୍ଡରେ  ବଡ ଅବହେଳା ମାମଲା ସାମ୍ନାକୁ ଆସିଛି। ମହିଳା ପାଣି ବୁନ୍ଦେ ପାଇଁ ଡହଳ ବିକଳ ହେଉଥିଲେ ଏବଂ ଅଣ ନିଃଶ୍ଵାସୀ  ହୋଇ  ଛଟପଟ ହେଉଥିଲେ।  ହେଲେ ତାଙ୍କ ଅବସ୍ଥା ବୁଝିବାକୁ ହସ୍ପିଟାଲରେ କେହିନଥିଲେ। ଦିଅରଙ୍କୁ ଭିଡିଓ କଲ୍ କରି ସାହାଯ୍ୟ ପାଇଁ ଗୁହାରି ଲଗାଇଥିଲେ। ପରିବାର ଲୋକେ ହସ୍ପିଟାଲର ଡାକ୍ତରଙ୍କଠୁ ନେଇ ଓ୍ଵାର୍ଡ କର୍ମଚାରୀ ପର୍ଯ୍ୟନ୍ତ ସଭିଙ୍କୁ କଲ୍ କରିଥିଲେ। କେହି ହେଲେ ଫୋନ୍ ଉଠାଇନଥିଲ। ପରିଣାମସ୍ଵରୂପ ଛଟପଟ ହୋଇ ଶେଷରେ ମହିଳା ଶେଷ ନିଃଶ୍ଵାସ ତ୍ୟାଗ କରିଥିଲେ। ପରବର୍ତ୍ତୀ ଦିନ ମାର୍ଚ୍ଚ ୨୦ରେ ମହିଳାଙ୍କୁ ମୃତ ଘୋଷଣା କରାଯାଇଥିଲା।

ପୁନମବେନଙ୍କ ଦିଅର ଦୀପକ କହିଛନ୍ତି, ଭାଉଜ ମାର୍ଚ୍ଚ ୧୯ରେ ଯେବେ ଭିଡିଓ କଲ୍ କରିଥିଲେ, ସେହି ସମୟରେ ସେ ବିଛଣାରୁ ଉଠି ପାରୁନଥିଲେ। ପୁନମବେନ ମାର୍ଚ୍ଚ ୧୮ରେ ଏକ ଶିଶୁ କନ୍ୟା ଜନ୍ମ ଦେଇଥିଲେ। ଏହା ପୂର୍ବରୁ ତାଙ୍କର କୋଭିଡ୍ ଟେଷ୍ଟ କରାଯାଇଥିଲା। ପ୍ରଥମ ରିପୋର୍ଟ ନେଗେଟିଭ୍ ଆସିଥିଲା। ପ୍ରସବ ପରେ ପୁନର୍ବାର ଟେଷ୍ଟ କରାଯିବାରୁ ରିପୋର୍ଟ ପଜିଟିଭ୍ ଆସିଥିଲା। ଏହା ପରେ ପୁନମଙ୍କୁ କୋଭିଡ୍‌ ଓ୍ଵାର୍ଡକୁ ସ୍ଥାନାନ୍ତର କରାଯାଇଥିଲା।

ବିଜୟ ନଗର ସୋସାଇଟିରେ ରହୁଥିବା ପୁନମଙ୍କ ବିବାହ ୯ ବର୍ଷ ପୂର୍ବେ ତୁଷାର ଜେଠେଙ୍କ ସହ ହୋଇଥିଲା। ପୂର୍ବରୁ ତାଙ୍କର ଗୋଟିଏ ଝିଅ ମଧ୍ୟ ରହିଛି। ପୁନମଙ୍କ ଦିଅରଙ୍କ ଅନୁସାରେ ଶିଶୁ କନ୍ୟାର ଜନ୍ମ ପରେ ଡାକ୍ତର କହିଥିଲେ ଯେ, ଭାଉଜଙ୍କ ଗୋଟିଏ କିଡନୀ ଫେଲ୍ ହୋଇ ଯାଇଛି। ତାଙ୍କ ମତରେ ଯଦି ପୂର୍ବରୁ କେବେ କିଡନୀର କୌଣସି ସମସ୍ୟା ନଥିଲା ତେବେ ଶିଶୁ ଜନ୍ମ ପରେ କେମିତି ଜଣଙ୍କର କିଡନୀ ଫେଲ୍ ହୋଇଯିବ ? ଏଥିରୁ ସ୍ପଷ୍ଟ ଯେ, ଡାକ୍ତରଙ୍କ ପକ୍ଷରୁ କୌଣସି ଅବହେଳା କରାଯାଇଛି।