19-Mar-2021

ଖଲ୍ଲିକୋଟ(ପ୍ରେରଣା ଖବର ବ୍ୟୁରୋ) : ଓଡିଆ ଲେଖି ଜାଣିନାହାନ୍ତି । ଓଡିଆ ପଢି ଜାଣିନାହାନ୍ତି । ଜାଲ୍ ଓବିସି ସାର୍ଟିଫିକେଟ୍‌ ଦେଇ ଲଢିଥିଲେ ସରପଞ୍ଚ ନିର୍ବାଚନ । ଜିତିଥିଲେ ମଧ୍ୟ, କିନ୍ତୁ ଏବେ ହରାଇବାକୁ ପଡିଛି ପଦ ।  ଛତ୍ରପୁର ବ୍ଲକ ଆର୍ଯ୍ୟପଲ୍ଲୀ ସରପଞ୍ଚ ଏମ. ଲଷ୍ମୀଙ୍କୁ ସରପଞ୍ଚ ପଦ ପାଇଁ ଅସିଦ୍ଧ ଘୋଷଣା କରିଛନ୍ତି ଛତ୍ରପୁର ସିଭିଲ ଜଜ୍ ଜୁନିଅର ଡିଭିଜନ ବିଚାରପତି ସନ୍ତୋଷ କୁମାର ପାଣିଗ୍ରାହୀ ।

ସୂଚନା ଅନୁସାରେ, ସରପଞ୍ଚ ଏମ ଲକ୍ଷ୍ମୀ ଆଦୌ ପାଠ ପଢିନାହାନ୍ତି । ଓଡ଼ିଆ ଲେଖି ପଢି ଜାଣିନଥିବା ସହ ୨୦୧୭ ପଂଚାୟତ ନିର୍ବାଚନରେ ସମୟରେ ଏମ ଲକ୍ଷ୍ମୀ ଯେଉଁ ଓବିସି ସାଟିଫିକେଟ ଦାଖଲ କରିଥିଲେ ତାହା ମଧ୍ୟ ଜାଲ ଥିବା ଜଣାପଡିଛି । ଛତ୍ରପୁର ସିଭିଲ ଜଜ୍ ଜୁନିଅର ଡିଭିଜନ ବିଚାରପତି ସନ୍ତୋଷ କୁମାର ପାଣିଗ୍ରାହୀ ଶୁଣାଣି କରି ଏହି ରାୟ ପ୍ରକାଶ କରିଛନ୍ତି ।

୨୦୧୭ ପଂଚାୟତ ଇଲେକ୍ସନ ରେ ଛତ୍ରପୁର ବ୍ଲକ ଅନ୍ତର୍ଗତ ଆର୍ଯ୍ୟପଲ୍ଲୀ ସରପଞ୍ଚ ଏମ. ଲଷ୍ମୀ ବିଜୟୀ ହୋଇଥିଲେ । କିନ୍ତୁ ତାଙ୍କ ବିରୋଧରେ ନିକଟତମ ପ୍ରତିଦ୍ବନ୍ଦୀ ପି. ଦମୟନ୍ତି ଛତ୍ରପୁର ସିଭିଲ କୋର୍ଟ ରେ ଏକ ପିଟିସନ ଦାଖଲ କରିଥିଲେ । ସେ ଓଡ଼ିଆ ଲେଖା ପଢା ଜାଣି ନାହାନ୍ତି ଏବଂ ଦାଖଲ କରିଥିବା ଓବିସି ସାର୍ଟିଫିକେଟ ଜାଲ୍ ବୋଲି ଓକିଲଙ୍କ ଜରିଆରେ ପିଟିସନ ଦାଖଲ କରିଥିଲେ । ତେବେ ଆଜି  ବିଚାରପତି ଏମ. ଲକ୍ଷ୍ମୀଙ୍କ ସରପଞ୍ଚ ପଦ ଅସିଦ୍ଧ ଘୋଷଣା କରିଛନ୍ତି ।