16-Mar-2021

ବଲାଙ୍ଗୀର(ପ୍ରେରଣା ଖବର ବ୍ୟୁରୋ): ବଲାଙ୍ଗୀର ସହର ଆଖପାଖ ଅଞ୍ଚଳରେ ଛତୁ ଫୁଟିଲା ଭଳି ଇଟାଭାଟି ଗଢି ଉଠିଛି । ରାଜସ୍ବ ବିଭାଗ କିଛି ଫାଇନ୍ ଅସୁଲି କରି ଇଟାଭାଟି ମାଲିକ ମାନଙ୍କୁ ଇଟା ଗଢ଼ିବା ପାଇଁ ପ୍ରୋତ୍ସାହନ ଯୋଗାଉଛନ୍ତି ।ପ୍ରତିବର୍ଷ ନଗଣ୍ୟ ରାଜସ୍ବ ଅସୁଲି କରି ତଦାରଖ କରୁଥିବା ଅଧିକାରୀ ମାନେ ଭାଟି ମାଲିକ ମାନଙ୍କ ଠାରୁ ବେଶ୍ ମାଲେମାଳ ହେଉଥିବା ପରିଲକ୍ଷିତ ହୁଏ । ସରକାର ଲାଲ ଇଟାଭାଟି ନିର୍ମାଣ ପାଇଁ ସଂପୂର୍ଣ୍ଣ ମନା କରିଛନ୍ତି । ଏହାଦ୍ବାରା ଜଙ୍ଗଲ ପରିବେଶ ନଷ୍ଟ ହେବା ସହ ଜଙ୍ଗଲ ପଦା ହେବାକୁ ଲାଗିଛି । ଜଂଗଲୀ ଜନ୍ତୁ ଇଟାଭାଟି ଗରମ ଯୋଗୁଁ ଜଙ୍ଗଲ ଛାଡ଼ି ସହର ମୁହା ହେଉଥିବା ଅନେକ ସମୟରେ ଦେଖିବାକୁ ମିଳୁଛି । ସହରର ଆଖପାଖ ଅଞ୍ଚଳରେ ହଜାର ହଜାର ଇଟାଭାଟି ମାଲିକ ଜଙ୍ଗଲ ଗଛ କାଟି ଇଟାଭାଟିରେ ବ୍ୟବହାର କରୁଥିବା ଯୋଗୁ ଦିନକୁ ଦିନ ଜଙ୍ଗଲ ପଦା ହେବାକୁ ବସିଲାଣି । ଜଙ୍ଗଲ ବିଭାଗରେ କାର୍ଯ୍ୟରତ କର୍ମଚାରୀଙ୍କ ଭାଟି ମାଲିକଙ୍କ ସହ ମଧୁ ଚନ୍ଦ୍ରିକା ଯୋଗୁ ଅସଲି ଫାଇନ ଏବଂ କେସ ରୁଜୁ ହେଉନାହିଁ । ଯଦ୍ୱାରା ଭାଟି ମାଲିକ ରାଜସ୍ବ ଏବଂ ଜଙ୍ଗଲ ବିଭାଗର ଦୋଷ ଦୁର୍ବଳତାର ବ୍ୟାପକ ଫାଇଦା ଉଠାଉଛି । ଜଙ୍ଗଲ ବିଭାଗର କିଛି ଅସାଧୁ କର୍ମଚାରୀ ନିଜ ପାକେଟ ଗରମ କରି ଲୋକ ଦେଖାଣିଆ ଭାବେ ଫାଇନ୍ ଆଦାୟ କରି ହଜାର ହଜାର ଟଙ୍କା ର ଦାମୀ ଗଛ ଭାଟି ରେ ପୋଡ଼ିବା ପାଇଁ ଛାଡ଼ି ଚାଲିଆସୁଛନ୍ତି । ଡି ଏଫ୍ ଓ ସମୀର ଶତପଥୀଙ୍କୁ ଏ ବିଷୟ ରେ ଭିଡିଓ ଦେଇଥିଲେ ମଧ୍ୟ ବଡ଼ ଧରଣ ର ବଟି  ପାଇଁ ଜଙ୍ଗଲ ଧ୍ବଂସ ହେଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନଥିବା ପରିଲକ୍ଷିତ ହୁଏ । ନିକଟରେ ରାନିପାଲି ଗ୍ରାମ ଠାରେ ଜଙ୍ଗଲ ବିଭାଗର ଜଣେ କର୍ମଚାରୀ ବିପୁଳ ପରିମାଣର କାଠ କାଟି ସରକାରୀ ଜମିରେ ଇଟାଭାଟି କରିଥିବା ବିଷୟରେ ଡି ଏଫ୍ ଓ ଙ୍କୁ ଭିଡିଓ କ୍ଲିପଙ୍ଗ ସହ ସୂଚନା ଦେଇଥିଲେ ମଧ୍ୟ ନିଜ ବିଭାଗର କର୍ମଚାରୀଙ୍କ ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନଥିଲେ । ବରଂ କଟାଯାଇଥିବା କାଠ ଗୁଡ଼ିକୁ ଫରେଷ୍ଟ କର୍ପୋରେସନକୁ ହସ୍ତାନ୍ତର କରିବା ପରିବର୍ତ୍ତେ ମାତ୍ର ୧୫୦୦୦ ଟଙ୍କା ଫାଇନ କାଟି ଚୁପ୍ ହୋଇ ରହିଗଲେ । ବିଭିନ୍ନ ସମୟରେ ଡ଼ି ଏଫ୍ ଓ ଙ୍କୁ ଇଟାଭାଟି ମାନଙ୍କରେ ବ୍ୟବହୃତ ହେଉଥିବା କାଠ ର ଭିଡିଓ ଦେଇଥିଲେ ମଧ୍ୟ କାଠ ଚୋର ମାନଙ୍କ ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନାହାନ୍ତି । ଇଟାଭାଟି ମାଲିକ ମାନଙ୍କୁ ସୁହାଇଲା ଭଳି ଫାଇନ କାଟି ତାଙ୍କ ଠାରୁ ପିସି ନେଇ ବେଶ୍ ମାଲେମାଲ୍ ହେଉଥିବା ଚର୍ଚ୍ଚା ହେଉଛି । ବାରମ୍ବାର ଜଙ୍ଗଲ ବୃକ୍ଷ କାଟୁଥିବା ଚୋର ନାମରେ ଫୌଜଦାରୀ ମାମଲା କରିବା ପରିବର୍ତ୍ତେ ଫାଇନ କାଟି କାଠ କୁ ଜବତ ନ କରି ଭାଟିରେ ପୋଡିବା ପାଇଁ ଛାଡ଼ି ଚାଲି ଆସୁଛନ୍ତି । ଜଙ୍ଗଲ ବିଭାଗ କର୍ମଚାରୀ ମାନଙ୍କ ପାଇଁ ଜଙ୍ଗଲ ମା ସଦୃଶ । କିଛି ଟଙ୍କା ପାଇଁ ନିଜ ମା କୁ ଗଛ ଦଲାଲ ହାତରେ ଟେକି ଦେଉଥିବା ଲଜ୍ୟା ର ବିଷୟ । ବଲାଙ୍ଗୀର ରେଞ୍ଜର କିଛି ମାସ ପରେ ଅବସର ଗ୍ରହଣ କରିବେ । ଏଣୁ ତାଙ୍କ ରେଞ୍ଜ ଅଧୀନରେ ଥିବା ଭାଟିରେ ଗଛ କାଟି ଇଟାଭାଟି ପୋଡ଼ି ଜଙ୍ଗଲ ନଷ୍ଟ ହେଲେ ମଧ୍ୟ ତାଙ୍କର କୌଣସି ପ୍ରତିକ୍ରିୟା ନାହିଁ । ଇଟାଭାଟି ଯୋଗୁ ଜଙ୍ଗଲ ରେ ନିଆ ଲାଗି ଜଙ୍ଗଲ ନଷ୍ଟ ହେଲେ ମଧ୍ୟ ଜଙ୍ଗଲ ବିଭାଗ ନୀରବ ଦ୍ରଷ୍ଟା । ଏଭଳି ଧ୍ବଂସ କାରୀ ଅଧିକାରୀ ମାନଙ୍କୁ ସରକାର ଜାରି କରିଥିବା 5T ଅନୁଯାୟୀ ବଧ୍ୟାତାମୂଳକ ଅବସର ଲାଗୁ କରି ଚାକିରି ରୁ ବହିସ୍କାର କରାଗଲେ ଆଗାମୀ ଦିନରେ କିଛିଟା ସୁଧାର ହେବ ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ହୁଏ