15-Mar-2021

ସୁରଟ,(ପ୍ରେରଣା ଖବର ବ୍ୟୁରୋ) :ଦେଶରେ କରୋନା ମାମଲା ପୁଣି ଥରେ ବଢିବାରେ ଲାଗିଛି । ମହାରାଷ୍ଟ୍ର, ଦିଲ୍ଲୀ ଓ ମଧ୍ୟପ୍ରଦେଶ ଆଦି ରାଜ୍ୟରେ ସ୍ଥିତି ଅଣାୟତ ହେଲାଣି । ଏହା ମଧ୍ୟରେ ଗୁଜୁରାଟର ସୁରଟରେ ଗୋଟିଏ କଲେଜ ଓ  ଦୁଇଟି ବିଦ୍ୟାଳୟରେ ୨୦ଜଣ ଛାତ୍ରଛାତ୍ରୀ କରୋନା ପଜିଟିଭ୍ ଚିହ୍ନଟ ହୋଇଛନ୍ତି । ଏନେଇ ରବିବାର ସୂଚନା ମିଳିଛି ।

ସୂଚନାନୁସାରେ, ଗୁଜୁରାଟରେ ଗତ ଫେବ୍ରୁଆରୀ ମାସରୁ ସ୍କୁଲ ଖୋଲିଲାଣି । ତାପରଠୁ ଏବେସୁଦ୍ଧା ରାଜ୍ୟରେ ୧୧୮ ଛାତ୍ରଛାତ୍ରୀ ଓ ଶିକ୍ଷକ ପଜିଟିଭ୍ ଚିହ୍ନଟ ହେଲେଣି ।ଶନିବାର ସୁରଟ ମ୍ୟୁନିସିପାଲ କର୍ପୋରେସନରେ ଥିବା ଗୋଟିଏ କଲେଜ ଓ  ଦୁଇଟି ବିଦ୍ୟାଳୟକୁ ୧୪ ଦିନ ପାଇଁ ବନ୍ଦ କରି ଦିଆଯାଇଛି । କାରଣ କଲେଜରେ ୧୦ ଜଣ ଛାତ୍ରଛାଚ୍ରୀ ପଜିଟିଭ୍ ଚିହ୍ନଟ ହୋଇଥିଲେ । ସେହିପରି ଗୋଟିଏ ସ୍କୁଲର ୬ ଓ ଅନ୍ୟ ଏକ ପ୍ରାଇମେରୀ ସ୍କୁଲର ୪ ଛାତ୍ର ପଜିଟିଭ୍ ଚିହ୍ନଟ ହୋଇଥି୍ଲେ । ତେଣୁ ସ୍ଥାନୀୟ ପ୍ରଶାସନ ପକ୍ଷରୁ ଉଭୟ ସ୍କୁଲକୁ ୧୪ ଦିନ ପାଇଁ ବନ୍ଦ କରି ଦିଆଯାଇଛି । ଏନେଇ ସ୍ୱାସ୍ଥ୍ୟ ବିଭାଗର ଡେପୁଟି କମିଶନର ଆଶିଷ ନାଏକ ସୂଚନା ଦେଇଛନ୍ତି ।

ସେ କହିଛନ୍ତି ଯେ, କୌଣସି ଶିକ୍ଷାନୁଷ୍ଠାନରେ ୫ରୁ ଅଧିକ କୋଭିଡ୍ କେସ୍ ସାମ୍ନାକୁ ଆସିଲେ ତାକୁ ବନ୍ଦ କରି ଦିଆଯାଉଛି । କ୍ଲାସ ରୁମକୁ ମଧ୍ୟ ସିଲ୍ କରାଯାଇ ସାନିଟାଇଜ୍ କରାଯାଉଛି । ଏପରିକି ପିଲା କିପରି ସ୍କୁଲକୁ ନଆସି ଘରେ ପାଠ ପଢି ପାରିବେ ସେନେଇ ଅନଲାଇନରେ ବ୍ୟବସ୍ଥା କରାଯାଉ ବୋଲି ସ୍କୁଲ କର୍ତୃପକ୍ଷଙ୍କୁ ସୁରଟ ମ୍ୟୁନିସିପାଲ କର୍ପୋରେସନ ଅନୁରୋଧ କରିଛି ।

ସୂଚନାଯୋଗ୍ୟ, ଶନିବାର ସୁରଟରେ ୧୮୮ଟି ପଜିଟିଭ୍ ମାମଲା ସାମ୍ନାକୁ ଆସିଥିଲା । ଏହାସହ ସହରରେ ମୋଟ ମାମଲା ୪୨୨୫୯ରେ ପହଁଚିଛି । ଏହାମଧ୍ୟରୁ ୪୦୫୦୩ ଜଣ ଆରୋଗ୍ୟ ଲାଭ କରିଛନ୍ତି ।