12-Mar-2021

ଭୁବନେଶ୍ୱର(ପ୍ରେରଣା ଖବର) : ସାଧାରଣ ନିର୍ବାଚନ ପୂର୍ବରୁ ସୃଷ୍ଟ ବିଜୁ ଯୁବ ବାହିନୀକୁ ବନ୍ଦ କରିଦିଆଯାଇଛି ।  ଚଳିତ ବର୍ଷ ବିଜୁ ଯୁବ ବାହିନୀ ପାଇଁ ବଜେଟରେ ଅର୍ଥ ବ୍ୟବସ୍ଥା ନାହିଁ ।  ଏକଥା ଆମେ କହୁନାହୁଁ । ବିଧାୟକ ଭବାନୀ ଭୋଇଙ୍କ ପ୍ରଶ୍ନର ଉତ୍ତର ଦେଇ ମନ୍ତ୍ରୀ ତୁଷାରକାନ୍ତି  ବେହେରା ଏହା କହିଛନ୍ତି । 

ତାଙ୍କ ସୂଚନା ଅନୁଯାୟୀ ଚଳିତ ବଜେଟରେ ବିଜୁ ଯୁବ ବାହିନୀ ପାଇଁ ଅର୍ଥ ବ୍ୟବସ୍ଥା ନାହିଁ ।  ତେଣୁ ବିଜୁ ଯୁବ ବାହିନୀ ବର୍ତ୍ତମାନ କାର୍ଯ୍ୟକ୍ଷମ ନାହିଁ ।  ଏବେ  କୌଣସି ଜାଗାରେ ବିଜୁ ଯୁବ ବାହିନୀ ଦ୍ୱାରା କିଛି କାର୍ଯ୍ୟ କରାଯାଉନି ବୋଲି ମନ୍ତ୍ରୀ ଶ୍ରୀ ବେହେରା କହିଛନ୍ତି ।  । 

ପ୍ରକାଶ ଯେ, ବିଜୁ ଯୁବ ବାହିନୀକୁ ବିରୋଧୀମାନେ ଗୁଣ୍ଡା ବାହିନୀ ବୋଲି ଅଭିଯୋଗ କରିଆସୁଥିଲେ ।  ବିଜୁ ଯୁବ ବାହିନୀ ସଭ୍ୟଙ୍କ ନାମରେ ବହୁ ସଙ୍ଗୀନ ଅଭିଯୋଗ ଆସୁଥିଲା ।  କେଉଁଠି ମାଓବାଦୀଙ୍କ ନାମରେ ଚାନ୍ଦା ଆଦାୟର ଅଭିଯୋଗ ଆସୁଥିଲା  ତ ଆଉ କାହା ନାମରେ ସଂଗୀନ ଅପରାଧିକ ମାମଲା ଥିବା କୁହାଯାଉଥିଲା ।  ଯାହାକୁ ନେଇ ବିଜେପି ଓ କଂଗ୍ରେସର ଯୁବକ କାର୍ୟ୍ୟକର୍ତ୍ତାମାନେ ବିଜେଡିକୁ ଘେରିବାରେ ସମର୍ଥ ହେଉଥିଲେ ।