08-Mar-2021

ବାଲୁଗାଁ: ପ୍ରେମରେ ବାଧକ ସାଜିପାରିଲାନି ଅକ୍ଷମତା । କଥା ନୁହେଁ ଇଶାରା ଇଶାରାରେ ପ୍ରେମ ହେଲା। ସତରେ ପ୍ରେମ ପାଇଁ ଦରକାର ପଡ଼େନି ଭାଷା। ଉଭୟେ ଉଭୟଙ୍କ ଭାଷା ବୁଝିପାରନ୍ତିନି,ହେଲେ ହୃଦୟ ସହ ହୃଦୟ ମିଶିଗଲା ।  ଆଉ ତା’ପରେ ସାତ ଜନମର ସାଥୀ ହେବା ପାଇଁ କଥା ଦିଆନିଆ ହେଲେ ଦୁଇ ଭିନ୍ନକ୍ଷମ ମଣିଷ। ବାଜା ବଜାଇ ବର ଆସିଲା। ଖୁସିରେ ମସଗୁଲ ହେଲେ ବରଯାତ୍ରୀ । ଦୁଇ ମନ ଦୁଇ ପ୍ରାଣ ସାତ ଜନ୍ମ ପାଇଁ ଏକ ହୋଇଗଲା । ପିଲାଦିନୁ କଥା କହିପାରୁ ନଥିବା ସହ ଶୁଣି ପାରୁନଥିବା ଦୁଇ ଦିବ୍ୟାଙ୍ଗ ପରସ୍ପରର ହାତ ଧରିଛନ୍ତି ଦୁଇ ଦିବ୍ୟାଙ୍ଗ କିଶାନ ଓ ବିଷ୍ଣୁପ୍ରିୟା।

ପ୍ରେମ ପାଇଁ ଭାଷା ଦରକାର ନାହିଁ ସଙ୍କେତ ହିଁ ଯଥେଷ୍ଟ । ଏମିତି ହୃଦୟର ଭାଷାକୁ ବୁଝିପାରି ବିବାହ ବନ୍ଧନରେ ବାନ୍ଧି ହୋଇଛନ୍ତି ଦୁଇ ଦିବ୍ୟାଙ୍ଗ । ହୁଳହୁଳି, ବେଦ ପାଠରେ ପ୍ରକମ୍ପିତ ହୋଇଛି ଖୋର୍ଦ୍ଧା ବାଣପୁରସ୍ଥିତ ଟିକିରାଇ ମନ୍ଦିର ପରିସର । ବର ସାଜିଛନ୍ତି ବାଣପୁର ତଳସାହିର କିଶାନ ଏବଂ କନ୍ୟା ହେଉଛନ୍ତି ଟାଙ୍ଗୀ ଅନ୍ତର୍ଗତ ପଣସପୁର ପାଟଣାର ବିଷ୍ଣୁପ୍ରିୟା। ବିବାହ ବେଦୀରେ ବସିଥିବା ଏ ଦୁଇ ଜଣ ହେଉଛନ୍ତି ଦିବ୍ୟାଙ୍ଗ ଏମାନେ ପିଲାଦିନୁ କଥା କହିପାରନ୍ତି ନାହିଁ, କି ଶୁଣି ବି ପାରନ୍ତି ନାହିଁ ।  ହେଲେ ବାଣପୁର ନେହେରୁ ସେବା ସଂଘରେ ଉଭୟେ ପାଠପଢୁ ଥିବା ବେଳେ ପ୍ରଥମେ ପ୍ରେମ ଏବଂ ଏବେ ବିବାହ ବନ୍ଧନରେ ବାନ୍ଧି ହୋଇଛନ୍ତି ।  ଦୁହିଁଙ୍କ ବିବାହକୁ ନେଇ ଖେଳିଯାଇଛି ଖୁସିର ମାହୋଲ ।