14-Jun-2026

ତୁଷୁରା (ପଞ୍ଚାନନ ନାଏକ) ବଲାଙ୍ଗୀର ଜିଲ୍ଲା ର ତୁଷୁରା ସ୍ଥିତ ଶ୍ୱେତାମ୍ବର ଜୈନ ତେରାପନ୍ଥ ଯୁବକ ପରିଷଦର ନୂତନ ଅଧ୍ୟକ୍ଷ ଭାବେ ସାମ୍ବାଦିକ ମନୋଜ କୁମାର ଜୈନ ନିର୍ବାଚିତ ହୋଇଛନ୍ତି। ସେହିପରି ଅରହମ ଜୈନ ସର୍ବସମ୍ମତିକ୍ରମେ ସମ୍ପାଦକ ଭାବେ ମନୋନୀତ ହୋଇଛନ୍ତି। ରବିବାର ତୁଷୁରା ଜୈନ ତେରାପନ୍ଥ ଭବନରେ ଆୟୋଜିତ ନିର୍ବାଚନ ପ୍ରକ୍ରିୟାକୁ ତୁଷୁରା ଜୈନ ତେରାପନ୍ଥ ସଭାର ସଂପାଦକ ବିରେନ୍ଦ୍ର ଜୈନ ପରିଚାଳନା କରିଥିଲେ। ନିର୍ବାଚନ ପରେ ନବନିର୍ବାଚିତ ଅଧ୍ୟକ୍ଷ ମନୋଜ କୁମାର ଜୈନ କହିଥିଲେ ଯେ, ଯୁବଶକ୍ତିର ସର୍ବାଙ୍ଗୀଣ ବିକାଶ ସହ ସମାଜରେ ରହିଥିବା ବିଭିନ୍ନ କୁପ୍ରଥା ଦୂରୀକରଣ ପାଇଁ ସେ କାର୍ଯ୍ୟ କରିବେ। ଏହାସହ ଜୈନ ସମାଜ ପକ୍ଷରୁ ଚାଲିଥିବା ବିଭିନ୍ନ ସାମାଜିକ, ସାଂସ୍କୃତିକ ଓ ସେବାମୂଳକ କାର୍ଯ୍ୟକ୍ରମକୁ ଆହୁରି ବ୍ୟାପକ ରୂପ ଦିଆଯିବ ବୋଲି ସେ ପ୍ରକାଶ କରିଥିଲେ।ପରବର୍ତ୍ତୀ ସମୟରେ ତୁଷାର ଜୈନ ଏବଂ ଜୈନ ସମାଜର ସଦସ୍ୟମାନଙ୍କ ପକ୍ଷରୁ ନବନିର୍ବାଚିତ ଅଧ୍ୟକ୍ଷଙ୍କୁ ସମ୍ବର୍ଦ୍ଧନା ଜଣାଯାଇଥିଲା। କାର୍ଯ୍ୟକ୍ରମ ସଫଳ ପରିଚାଳନାରେ ଡବଲୁ ଜୈନ ଓ ବିକାଶ ଜୈନ ସହଯୋଗ କରିଥିଲେ। ଜୈନ ସମାଜର ଯୁବମାନଙ୍କ ମଧ୍ୟରେ ନୂତନ ନେତୃତ୍ୱକୁ ନେଇ ଉତ୍ସାହ ଦେଖାଯାଉଥିବା ବେଳେ, ସଂଗଠନର ଆଗାମୀ କାର୍ଯ୍ୟକଳାପ ଅଧିକ ସକ୍ରିୟ ହେବ ବୋଲି ଆଶା ପ୍ରକାଶ ପାଇଛି।