15-May-2026

କଟକ(ତପନ ମହାନ୍ତି) ସଂଗୀନ-ସାଂଘାତିକ-ଅସମ୍ଭାଳ। କେଉଁଠି ଛାନିଆ, କେଉଁଠି ଆତଙ୍କ। ଅଧରାତି ହେଉ କି ଉଦୁଉଦିଆ ଖରାବେଳ। କିଲୋମିଟର କିଲୋମିଟର ଯାଏଁ ଲମ୍ବିଛି ଲୋକଙ୍କ ଲମ୍ବା ଧାଡ଼ି। ରାଜଧାନୀରୁ ରାଉରକେଲା ଯାଏଁ ତୈଳ ସଂକଟର ସଂଗୀନ ଚିତ୍ର ଭିତରେ ସବୁକୁ ବଳିଯାଇଛି ଶ୍ରୀକ୍ଷେତ୍ର ପୁରୀ । ଯିଏ ଯାହା ପାଇଲା, ହାତରେ ଯାହା ପଡ଼ିଲା ଟେକିନେଇ ଆସିଛନ୍ତି ପେଟ୍ରୋଲ୍ ପାଇଁ। ପ୍ଲାଷ୍ଟିକ୍ ବୋତଲ ତ ବୋତଲ, ମାଳମାଳ ଟିଣ ଓ ବାଲଟି ଧରି ବି ପାଇଁ ଲାଇନରେ ଲୋକେ। ଜାର୍-ଜାରକିନ ଏପରିକି ପାଣି ବୁହା କେନ୍ ଭର୍ତ୍ତି କରି ପେଟ୍ରୋଲ୍ ଟେକିନେଇଛନ୍ତି। ଆଗକୁ ତେଲ ନ ମିଳିବା ଆଶଙ୍କାରେ ଲୋକେ ଏମିତି ପେଟ୍ରୋଲ-ଡିଜେଲ୍ ବୋହିଲେ ଯେ, ଶେଷରେ ପୋଲିସ ଆସି ତାଗିଦ୍ କରିବାକୁ ପଡ଼ିଥିଲା।

ରାଜଧାନୀ ଭୁବନେଶ୍ବର,କଟକ କାଲିଠୁ ଲାଗିରହିଛି ଅଣାୟତ ସ୍ଥିତି। ଚନ୍ଦ୍ରଶେଖରପୁର ପେଟ୍ରୋଲ ପ୍ରମ୍ପରେ ରାତି ସାଢେ ୧୨ଟାରେ ବି ତେଲ ପକେଇବାକୁ ଅପେକ୍ଷା କରିଥିଲେ ଶହଶହ ଗାଡ଼ି । କେବଳ ଏଇ ଗୋଟିଏ ନୁହେଁ, ସ୍ମାର୍ଟସିଟିର ସବୁ ପେଟ୍ରୋଲ ପମ୍ପର ଅବସ୍ଥା ଏମିତି । ଛିଡ଼ା ହେବା ତ ଛାଡ଼ନ୍ତୁ, ସୋରିଷ ବୁଣିବାକୁ ଜାଗା ନାହିଁ । କେଉଁଠି ଟାଙ୍କି ବନ୍ଦ ଆଉ କେଉଠି ରାତିଦିନ ମେଳା ଭଳି ଗହଳି ଲଗାଇଛନ୍ତି ଗ୍ରାହକ। ରାସ୍ତା ଉପରେ ବି ଧାଡ଼ି କରି ନିଜ ପାଳିକୁ ଅପେକ୍ଷା କରୁଛନ୍ତି । ଭିଡ଼ ଏଭଳି ହେଉଛି ଯେ, ପୋଲିସ ମୁତୟନ ହେବାକୁ ବାଧ୍ୟ ହେଲେଣି। ତଥାପି ଘଣ୍ଟା ଘଣ୍ଟା ଅପେକ୍ଷା କଲେ ବି ତେଲ ଠୋପେ ମିଳୁନି। ବାଲେଶ୍ୱର, କେନ୍ଦ୍ରାପଡ଼ା, ଜୟପୁର, ରାଉରକେଲାରେ ଟାଙ୍କିରେ ବି ସମାନ ଅବସ୍ଥା । ଅଧିକାଂଶ ପମ୍ପରେ ନିର୍ଦ୍ଦିଷ୍ଟ ପରିମାଣର ତେଲ ଦିଆଯିବାକୁ ନେଇ ଅସନ୍ତୋଷ ବଢିଛି ।

ସାରା ରାଜ୍ୟରେ ତେଲ ସଂକଟର ତମାମ ଦୃଶ୍ୟ ଓ ଅଭିଯୋଗ ଭିତରେ କିନ୍ତୁ ସବୁକୁ ଖଣ୍ଡନ କରିଛନ୍ତି ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର। କହିଛନ୍ତି, ରାଜ୍ୟରେ ପେଟ୍ରୋଲ, ଡିଜେଲର ଅଭାବ ନାହିଁ । ୧୩ ଦିନ ପାଇଁ ଓଡ଼ିଶାରେ ତେଲ ଷ୍ଟକ୍ ରହିଛି । ନିର୍ଦ୍ଦିଷ୍ଟ ପରିମାଣର ତେଲ ଦେବାକୁ ସରକାରଙ୍କ ପକ୍ଷରୁ କୌଣସି ନିୟମ କରାଯାଇନି । ଭିଡ଼ ବଢ଼ିଯିବାରୁ ଟାଙ୍କି ମାଲିକ ଅଳ୍ପ ଅଳ୍ପ ପେଟ୍ରୋଲ୍-ଡିଜେଲ୍ ଦେଉଛନ୍ତି । ଏଣୁ ଆତଙ୍କିତ ହୋଇ ତେଲ ନ କିଣିବାକୁ ପରାମର୍ଶ ଦେଇଛନ୍ତି ମନ୍ତ୍ରୀ।