15-May-2026

ବଲାଙ୍ଗିର(ପ୍ରେରଣା ଖବର)- ବଲାଙ୍ଗିର ସହର ନିକଟସ୍ଥ ବିଷ୍ଣୁମୁଣ୍ଡା ଠାରେ ନୂତନ ଜିଲ୍ଲାପାଳ କାର୍ଯ୍ୟାଳୟ ଓ ଜିଲ୍ଲା କାରାଗାର ନିକଟରେ ନୂତନ ସିଭିଲ କୋର୍ଟ ତିଆରି କରା ଯିବାକୁ ଯୋଜନା ହୋଇଛି। ଲୋକସେବା ମଂଚ ପକ୍ଷରୁ ଏହାକୁ ବିରୋଧ କରାଯିବା ସହ ବୃହତ୍ତର ସ୍ୱାର୍ଥ ଦୃଷ୍ଟିରୁ ଗୋଟିଏ କମ୍ପ୍ଲେକ୍ସ ରେ ନୂତନ ଜିଲ୍ଲାପାଳ କାର୍ଯ୍ୟାଳୟ ଓ ସିଭିଲ କୋର୍ଟ ନିର୍ମାଣ କରିବା ପାଇଁ ଜିଲ୍ଲା ଯୋଜନା ବୋର୍ଡ ଅଧ୍ୟକ୍ଷ ଲକ୍ଷ୍ମଣ ବାଗଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି। ପ୍ରକାଶ ଯେ ପୂର୍ବରୁ ମିନି ସେକ୍ରେଟିଏଟ୍ ଢାଞ୍ଜାରେ ଗୋଟିଏ କମ୍ପ୍ଲେକ୍ସ ମଧ୍ୟରେ ଉଭୟ ଜିଲ୍ଲାପାଳ କାର୍ଯ୍ୟାଳୟ ଓ ସିଭିଲ କୋର୍ଟ ନିର୍ମାଣ କରାଯିବାକୁ ଯୋଜନା ପ୍ରସ୍ତୁତ କରାଯିବା ସହ ଜାଗା ମଧ୍ୟ ଚିହ୍ନଟ ହୋଇସାରିଥିଲା । ତେବେ ବିଭିନ୍ନ କାରଣରୁ ଉକ୍ତ ଜାଗାରେ ଏ ପ୍ରକଳ୍ପ କାର୍ଯ୍ୟକାରୀ ହୋଇନପାରିବାରୁ ଉଭୟ କାର୍ଯ୍ୟାଳୟକୁ ଅନ୍ୟତ୍ର ସ୍ଥାନାନ୍ତରିତ କରାଯାଇଥିଲା। ତେବେ ସଦ୍ୟ ଯୋଜନା ମୁତାବକ କାର୍ଯ୍ୟାଳୟ ନିର୍ମାଣ ହେଲେ ଉଭୟଙ୍କ ମଧ୍ୟରେ ୭ ରୁ ୮ କିମି ଦୂରତା ରହିବ ଯଦ୍ୱାରା ଜିଲ୍ଲାର କୋଣଅଣୁକୋଣରୁ ଆସୁଥିବା ଜିଲ୍ଲାବାସୀ ବହୁ ଅସୁବିଧାର ସମ୍ମୁଖିନ ହେବେ। ଏଣୁ ଜିଲ୍ଲାବାସୀଙ୍କ ବୃହତ ସ୍ୱାର୍ଥକୁ ଆଖି ଆଗରେ ରଖି ଗୋଟିଏ କମ୍ପ୍ଲେକ୍ସ ଭିତରେ ଉଭୟ ନୂତନ ଜିଲ୍ଲାପାଳ କାର୍ଯ୍ୟାଳୟ ଓ ସିଭିଲ କୋର୍ଟ ତିଆରିକୁ ଯୋଜନା ବୋର୍ଡରେ ଅନୁମୋଦନ କରି ସରକାରଙ୍କ ପାଖକୁ ପ୍ରେରଣ କରିବା ପାଇଁ ଯୋଜନା ବୋର୍ଡ ଅଧ୍ୟକ୍ଷଙ୍କୁ ଲୋକସେବା ମଂଚ ଲିଖିତ ଭାବେ ଦାବି କରିଛି। ଡା.ବାସୁଦେବ ପତି ଙ୍କ ଆବାହକତ୍ୱରେ  ବରିଷ୍ଠ ଓକିଲ ରତନ କୁମାର ମହାରଣା, ଭବାନୀ ଶଙ୍କର ଶତପଥି, ବୁଦ୍ଧିଆ ବାଗ, ରବିନାରାୟଣ ବହିଦାର ଓ ସଂଜୟ କୁମାର ବଗର୍ତ୍ତି ପ୍ରମୁଖ ଯୋଜନା ବୋର୍ଡ ଅଧ୍ୟକ୍ଷ ଶ୍ରୀ ବାଗଙ୍କୁ ଦାବିପତ୍ର ପ୍ରଦାନ କରିଥିଲେ।