08-May-2026

କଟକ(ତପନ ମହାନ୍ତି): କଟକର ଐତିହାସିକ ସତୀଚୌରା ଶ୍ମଶାନର ଆଧୁନିକୀକରଣ ଓ ନବୀକରଣ କାର୍ଯ୍ୟ ପାଇଁ  ଏକ ନୂତନ ଅଧ୍ୟାୟ ଆରମ୍ଭ ହୋଇଛି।  ସକାଳ ୧୦ ଟା ସମୟରେ କଟକ ମେୟର ସୁବାସ ସିଂହ କଟକ ମହାନଗର ନିଗମ ୱାର୍ଡ ନମ୍ବର ୬ ସ୍ଥିତ ସତୀଚୌରା ଶ୍ମଶାନରେ ପହଞ୍ଚି ଏହି ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିଛନ୍ତି। କଟକ ମହାନଗର ନିଗମ ପକ୍ଷରୁ ପ୍ରାୟ ୭ କୋଟି ଟଙ୍କା ବ୍ୟୟ ବରାଦ କରାଯାଇ ଶ୍ମଶାନର ବିଭିନ୍ନ ଉନ୍ନତିମୂଳକ କାର୍ଯ୍ୟ ହାତକୁ ନିଆଯାଇଥିବା ବେଳେ ଗେଲ୍ ଇଣ୍ଡିଆ ପକ୍ଷରୁ ପରିବେଶ ଅନୁକୂଳ ଗ୍ୟାସ ଚୁଲା ସ୍ଥାପନ ପାଇଁ ଅତିରିକ୍ତ ୧.୫ କୋଟି ଟଙ୍କାର ବ୍ୟୟ ବରାଦ କରାଯାଇଛି। ଏହି ନବୀକରଣ ଯୋଜନାରେ ପରିଦର୍ଶକ ଓ ପରିବାର ସଦସ୍ୟଙ୍କ ସୁବିଧା ପାଇଁ ଦୁଇଟି ପ୍ରତୀକ୍ଷା ହଲ୍ (ବଡ଼ ଓ ଛୋଟ), ପୁରୁଷ ଓ ମହିଳାଙ୍କ ନିମନ୍ତେ ପୃଥକ ତଥା ଆଧୁନିକ ଶୌଚାଳୟ ଏବଂ ଗାଧୋଇବା ସ୍ଥାନର ବ୍ୟବସ୍ଥା କରାଯିବ | ଶବଦାହ ପ୍ରକ୍ରିୟାକୁ ଶୃଙ୍ଖଳିତ କରିବା ପାଇଁ ପାରମ୍ପରିକ ଜାଳେଣି କାଠର ନିରାପଦ ଷ୍ଟୋରେଜ୍ ଏବଂ ଏକ ଆଧୁନିକ ପରିବେଶ ଅନୁକୂଳ ଶବଦାହ ବର୍ଣ୍ଣର ସିଷ୍ଟମ ସ୍ଥାପନ କରାଯିବାର ଯୋଜନା ରହିଛି I ଶ୍ମଶାନର ସୌନ୍ଦର୍ଯ୍ୟକରଣ ସହ ଆଧ୍ୟାତ୍ମିକ ବାତାବରଣ ବୃଦ୍ଧି ପାଇଁ ଭଗବାନ ଶିବଙ୍କ ପ୍ରତିମୂର୍ତ୍ତି ସ୍ଥାପନ ଏବଂ ଐତିହାସିକ ଗୁରୁତ୍ବ ରଖିଥ‌ିବା ବିଶିଷ୍ଟ ବ୍ୟକ୍ତିବିଶେଷଙ୍କ ନାମ ସମ୍ମାନର ସହ ସଂରକ୍ଷଣ କରିବା ପାଇଁ ଏକ ସ୍ମାରକୀ ପ୍ରାଚୀର ମଧ୍ୟ ନିର୍ମାଣ କରାଯିବ I ପୁରୁଣା ସମାଧ୍ ପଥରଗୁଡ଼ିକର ଉପଯୁକ୍ତ ସଂରକ୍ଷଣ ସହ ସୁରକ୍ଷା ପାଇଁ କମ୍ପାଉଣ୍ଡ୍ ପ୍ରାଚୀର, ନୂତନ ପ୍ରବେଶ ଦ୍ବାର, ଗାର୍ଡ ରୁମ୍ ଏବଂ ଉପଯୁକ୍ତ ଡ୍ରେନେଜ୍ ସିଷ୍ଟମ୍ ନିର୍ମାଣ କରାଯିବା ନେଇ ମେୟର ସୂଚନା ଦେଇଛନ୍ତି । ଏହି ଭିଭିପ୍ରସ୍ତର ସ୍ଥାପନ ଉତ୍ସବରେ ମେୟରଙ୍କ ସହିତ ସ୍ଥାନୀୟ ବିଧାୟିକା ଇଂ ସୋଫିଆ ଫିରଦୋସ, ଡେପୁଟି ମେୟର ସୁଶ୍ରୀ ଦମୟନ୍ତୀ ମାଝୀ, ଷ୍ଟାଣ୍ଡିଂ କମିଟି ଅଧ୍ଯକ୍ଷ ପ୍ରଦୀପ୍ତ କିଶୋର ଖୁଣ୍ଟିଆ, ଦୀପ୍ତିମୟୀ ମୂଳିଆ, ମୋନାଲିସା ଦାସ, କର୍ପୋରେଟର ରିତାଞ୍ଜଳି ବେହେରା ଏବଂ ସିଟି ଇଞ୍ଜିନିୟର ଅତନୁ ସାମନ୍ତଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଓ ଜନସାଧାରଣ ଉପସ୍ଥିତ ଥିଲେ ।